IMBUJOLENU CHIKUHWELELU CHAWU | MARIYA

Womikili Chineñi

MARIYA wafukamini hamaseki, muloña waswejeli kuneña. Wachidiña nakwanuka chabiliyi mwanindi hakufwa hanyima yakumuyandisha chikupu. Nampinji yamwaana mwituña dejima mwelili mwidima. Iseki dejima dakankili. (Matewu 27:45, 51) Mariya watela watoñojokeli nindi Yehova yomwenidi wakeñeleña antu ejima eluki nawu kufwa kwamwanindi Yesu Kristu kwamuneñesheli chikupu kubadika chaneñeluwu antu ejima.

Chelili mwaana wunatoñeki dehi, kuGologota hela Kuchañu kwatookeli, Mariya wadilili mwanindi. (Yowanu 19:17, 25) Hadaha yumiyi wayanukileña nankashi. Chuma chimu chanukiliyi chamwekeni yaaka 33 yahitiluhu. Chelili yena niYosefu anamuleti dehi mwanawu mutembeli muYerusalema, kashinakaji wumu wejina daSimeyona amoneneni kushimuna wuprofwetu. Wateneni yuma yamaneni yakakoñayi Yesu, wahosheli cheñi nindi ifuku dimu, Mariya wukatiya neyi mpoku yakabali yinamupwiki kumuchima. (Luka 2:25-35) Ilaña hampinji yayihuñu dihelukiliyi chikupu mwatalishili ana mazu awuprofwetu.

Antu ahoshaña nawu kufwa kwamwana kwayeña nankashi kumuchima. Kufwa hichilumbu watama nawa wonsu wetu kwatumwekenaña. (Aroma 5:12; 1 Akorinda 15:26) Komana tunateli kuumika yihuñu yamuchidiwu? Chitukuhanjekaña hachihandilu chaMariya kufuma hatachikiliyi Yesu mudimu windi kushika nikukufwa kwindi nakutwalekahu, tukudiza nsañu yayivulu kutalisha hachikuhwelelu chamukwashili Mariya kuumika chineñi.

“MWONSU MWAKUYILEJAYI, ILENU”

Tutalenu yuma yamwekeni yaaka yisatu nachikunku yahitiluhu: Mariya welukili nindi kudi chuma chakamwekana kumbidi. Hela wadiña nakushakama mumukala wanyanya waNazareta, antu ahosheleña hadi Yowanu Mpapatishu nihansañu yindi yakuhizumwisha yakubalumuka. Mariya wamweni nindi iyi nsañu yaleteli iyena mudi mwanindi wawedi; mpinji yakutachika mudimu windi wakushimwina yashikili. (Matewu 3:1, 13) Neyi Yesu yafuma hetala, Mariya nichisaka chindi adi kushala mwihuñu dadeni. Muloñadi?

Chidi neyi nfumwa Mariya, Yosefu, wadiña wafwa dehi. Dichi, Mariya welukili ihuñu damonañayi muntu neyi nafwishi. * Haniyi mpinji, Yesu hiyamuteneneña hohu nawu “mwana kamukwakusoñaku” ilaña nawu “mukwakusoña.” Chakadi nikujina, Yesu waswanini hamudimu watata yindi nawa diyi wadiishileña chisaka chejima mwadiña anyana atanu nawumu, ejima adiña anyiki jindi. (Matewu 13:55, 56; Maku 6:3) Hela chakwila Yesu wamudizishileña Yakoba wadiña chilondela wedi mudimu wakusoña, chisaka chadi kwiñila mukukala neyi wedi yafuma hetala. Chineli Mariya wadiña namudimu weneni; komana wadakameneni hakushala nanyidimu yejima iyi? Tuneluki wanyi. Ilaña lwihu lwalema ludi lwakwila nawu: Mariya wadi kwila ñahi neyi Yesu wakuNazarata yekala Yesu Kristu, Mesiya wakaninuwu wadiña nakutalilawu? Mukanda wamuBayibolu walumbulula iyi nsañu.—Yowanu 2:1-12.

Yesu wayili kudi Yowanu kulonda amupapatishi, kuhiñahu wekalili Mwana kaNzambi wawayishewa hela Mesiya. (Luka 3:21, 22) Nkumininaku watachikili  kutonda atumbanji twindi. Hela chakwila mudimu windi wadiña wakuzata mukunyakashana, wadiña nampinji yakuzañalela hamu nachisaka niamabwambu jindi. Wayili kuchawija chakudisumbula chadiña kuKana hamu namama yindi, niatumbanji twindi nianakwindi akumujimba, chawija chenichi chadiña mumbaka yadiña hewulu dampidi hadiña jikilomita 13 kufuma kuNazareta. Hampinji yachawija, Mariya welukili kukala kwamwekeni. Hadaha wamweni antaña jakalemba nakankaña chadakamenenuwu nichiyadiña nakudishawutwilawu. Vinyu yamanini. Kwesekeja nachisemwa, chuma chamuchidiwu chadi kuleta sonyi kudi yisaka yawu. Mariya wayitiyilili luwi nawa wamulejelumu Yesu.

Wamulejeli mwanindi nindi, “Hiyakweti vinyuku.” Chumanyi Mariya chakeñeleñayi nindi Yesu yeli? Hitunateli kushimuna jikaku, ilaña welukili nindi mwanindi wadiña iyala wabadika wukela yuma yamaneni. Hadaha wakuhweleleli nindi wukutachika kukoña yuma yamaneni hohenahana. Munjila yikwawu, wadiña nakumwila nindi, “Mwanami, ilakuhu chuma.” Yesu chamwakwiliyi mama yindi chamuhayamishili. Wahosheli nindi: “Eyi mumbanda, hinsañu yetuku?” Mazu ahosheliyi Yesu hiyadiña akasawuntuku, hela chakwila antu ahoshaña nawu adiña akasawuntu. Hela chochu, mazu ahosheliyi amwekeshaña nawu hamuzuwililuku. Yesu wadiña nakumwanukisha mama yindi nindi hateleleli kuhosha hanjila yadiña nakuzatilamu mudimu windi wakushimwinaku; chiña Tata yindi, Yehova diyi wateleli kumuleja.

Mariya wetejeli mwamufumbiliyi mwanindi, muloña wadiña mumbanda wamaana nawa wadizoza. Wabalumukilili kudi atuluñwiji [akwakuhana yakudya] nakuyileja nindi: “Mwonsu mwakuyilejayi, ilenu.” Mariya welukili nindi hateleleli kumuleja mwanindi mwakwililaku; ilaña, yena niantu amakwawu ateleli kutambwila wunlomboli kudi Yesu. Dichi Yesu wamwekesheli nindi wayitiyilili antu adisumbwileña wushona neyi chochayitiyililiyi mama yindi. Wakoñeli chihayamisha chindi chatachi, chakubalumuna menji nakwikala vinyu. Chumanyi chafuminumu? ‘Atumbanji twindi hiyakumukuhwelela.’ Mariya niyena wamukuhweleleli Yesu. Wamumweneña nindi hiMwanta nawa Nkuuli yindi bayi neyi himwanindi hohuku.

Anvwali makonu anateli kudizilaku kuchikuhwelelu chaMariya. Hela chochu, kwosi nvwali wahembahu dehi mwana wudi neyi Yesuku. Dichi, mwana wejima wabula kuwanina neyi nakuli dehi, wahitaña muyuma yakala. Nvwali nateli kutwalekahu nakumuhemba mwana weyala hela wamumbanda neyi kwiji mwana wanyanya, chatela yamumoneña nindi wakula dehi. (1 Akorinda 13:11) Indi nvwali nateli kukwasha ñahi mwana wakula dehi? Njila yimu yidi yakumukuhwelela nawu mwana weyala hela wamumbanda washinshika nateli kutwalekahu kulondela yuma yatañishaña Bayibolu nikutambwila nkisu yaYehova. Mazu anvwali amawahi akumwekesha nawu wamukuhwelela anateli kumukwasha chikupu mwana wakula dehi. Yesu wahamekeli chikupu chamukwashiluwu kudi Mariya muyaaka yadikitiliyi mumudimu windi.

“ANA KWINDI NIWENA HIYAMWITIYILUKU”

Nyikanda yaNsañu Yayiwahi yatulejaña hohu nsañu yantesha hadi Mariya hayaaka yisatu nachikunku yazatiliyi Yesu mumudimu wakushimwina. Hela chochu anukenu nenu, watela wadiña ntuluwa, hadaha wahembeleña anyana anyanya achidiña hetala. Tuneluki chaleñeleli yakañanyi kutwalekahu nakumulondela Yesu hazatileñayi mudimu wakushimwina mumukala windi. (1 Timotewu 5:8) Hela chochu, watwalekeluhu nakutoñojoka chikupu hayuma yamunyikanda yajila yadiziliyi hadi Mesiya nikupompa musinagogi yadiña mwiluña mwashakamineñayi neyi chelileña chisaka chindi.—Luka 2:19, 51; 4:16.

 Komana watela wadiña mwizaza hampinji yatañishileñayi Yesu musinagogi muNazareta. Wazañaleli chikupu hakutiya mwanindi nakuhosha nindi wuprofwetu wawuMesiya washimwinuwu dehi hayaaka yayivulu yahitiluhu washikijeweli hadi yena. Hela chochu, watela waneñeli chamweniyi akwawu amuNazareta amukaani mwanindi. Akeñeleña nikumujaha!—Luka 4:17-30.

Waneñeli cheñi chelili anyanindi awamayala amakwawu abuli kumukuhwelela Yesu. Twatañaña haYowanu 7:5 nawu amana kwaYesu awana hiyadiña nachikuhwelelu neyi chadiña namama yawuku. Twatañaña nawu: “Muloña . . . ana kwindi niwena hiyamwitiyiluku.” Ilaña kutalisha hadi ahela jaYesu ayedi, Bayibolu hiyahoshahu chuma chidi chejimaku. * Hela chochu, Mariya chamuneñesheleña hakwikala mwitala mwadiña antu akweti yikuhwelelu yashiyashana. Wazatili nañovu hakwila nawu yatwalekuhu kwikala washinshika kudi Nzambi nikukwasha chisaka chindi kulonda chiluki nsañu yalala nawa chakubula kuyikanjikija hela kuyitaadikisha.

Mpinji yimu, izanvu dawakawusoku windi, kushilahu niamana kwaYesu ayili nawu “amukwati.” Muloña elili nawu: “Naandali.” (Maku 3:21, 31) Hela chochu, Mariya hatoñojokeli muniyi njilaku, ilaña wayili hamu nawanyanindi awamayala, hadaha watoñojokeleña nindi akudiza yuma yikuleñela ekali nachikuhwelelu. Komana kudihu chuma chadiziluwu? Hela chakwila Yesu wakoñeleña yuma yamaneni nikutañisha nsañu yalala, anyana kaMariya amakwawu hiyamukuhweleleluku. Komana wahayamini, nawa wahilili, nakutachika kutoñojoka hayuma yatela kwilayi kulonda yashiki hanyichima yawu?

Komana ninenu mwekala muchisaka chambokelamu munsakililu? Munateli kudizilaku yuma yayivulu kuchikuhwelelu chamwekesheliyi Mariya. Watwalekeluhu nakukolesha antaña jindi abulili kwitiya. Ilaña, wakeñeleña eluki nawu chikuhwelelu chindi chamuleñeleleña yekali namuzañalu nikubula kwakama. Cheñi nawa, watwalekeluhu nakukwasha mwanindi weyala wadiña washinshika. Komana wamwanukileña Yesu? Komana mpinji yikwawu watoñojokeleña nindi mutenowu Yesu watwalekeluhu kushakama hamu nachisaka? Neyi watoñojokeleña mwenimu, dikwila nawu wayuulileña yitoñojoka yindi. Welukili nindi wadiña nakukooleka kwakumukwasha nikumukolesha Yesu. Komana ninenu munateli kukwasha anyanenu kulonda atwamijeñaku nyidimu yaNzambi muchihandilu chawu?

“MPOKU YAKABALI YAKAPWIKA MUMUCHIMA WEYEYI AWENI ZWA”

Komana Mariya amukiswilili hachikuhwelelu chamwekesheliyi mudi Yesu? Yehova wasomwenaña antu amukuhwelelaña, neyi chochamusomweneniyi Mariya. (Aheberu 11:6) Fwikijenu chatiyili Mariya hakutiya mwanindi nakuhosha hela hakutiya mazu ashimwineñawu antu adiña nakutiyilila kujimpanji jahanineñayi.

Komana yishimu yazatishileñayi mwanindi, yamwanukishileña Mariya yuma yakoñeleñayi Yesu hampinji yakulileñayi muNazareta? Yesu chahosheliyi hadi mumbanda wakombeleña mwitala kulonda yawani dali dajimbeli, nimumbanda wahalileña wuña wakutuña nachu dinkendi, hela wambwileña inoñu nakudisha hewulu, komana Mariya watoñojokeli hadi ona kansi weyala wamumweneña chazatileñayi iyi nyidimu yefuku nifuku? (Luka 11:33; 15:8, 9; 17:35) Yesu chahosheliyi nindi mpanda yindi yaswayi nichisenda chindi chapepela, komana Mariya watoñojokeleña hampinji yayiwahi yakunyima yamweneñayi Yosefu nakumudizisha Yesu hadiñayi kansi chakutuña mpanda chachiwahi kulonda kanyama yayisendi chachiwahi? (Matewu 11:30) Mwalala Mariya  wazañaleleña chikupu chatoñojokeleñayi hakukooleka kwamwinkeliyi Yehova, kwakukulisha nikudizisha mwana wekalili Mesiya. Watela wazañaleleña chikupu hakutiyilila kudi Yesu, ntañishi muneni, wazatishili yuma yamweneñawu antu niyuma yamwekeneña hakudizisha antu nsañu yalema.

Hela chochu, Mariya watwalekeluhu kudizoza. Mwanindi haswejeli kumuhameka nakuleñela antu adifukuleña kudi Mariyaku. Hampinji yazatileñayi mudimu windi wakushimwina, mumbanda wadiña mwizaza dawantu wabidikili nindi mumbanda wamuvwalili Yesu wakooleka chikupu. Yesu wakwili nindi: ‘Chalala antu akutiya mazu aNzambi hiyakwilamu, anakooleki.’ (Luka 11:27, 28) Antu amakwawu mwizaza chamulejeluwu Yesu nawu mama yindi nianakwindi adi hanzi, wayilili nindi antu akwila mwaya muchima waNzambi diwu amama yami nianakwami. Mariya haneñeluku, muloña welukili mwatalishiliyi Yesu, kudikunda nawamana kwetu itwapompaña nawu kwabadika kudikunda nawamana kwetu mutwasemwakena.—Maku 3:32-35.

Dichi, chakala chikupu kwiluka chineñi chatiyiliyi Mariya hakumona mwanindi chayandiliyi hampinji yafwileñayi hamutondu wakuyandishila. Kapostolu Yowanu wamumweni namesu kapu wasonekeli iyi nsañu mumukanda windi, haniyi mpinji yakala, Mariya wemeni ‘kwakwihi namutondu wakuyandishila Yesu.’ Kwosi chuma chateleleli kumukañesha ona mama yawantu wakeñeli mwanindi nawa washinshika kutwalekahu nakwimana kwakwihi namwanindi kushika nichafwiliyi. Hela chakwila koona nikuhosha kwaleñeleleña Yesu yasweji kutiya kukata, ilaña chamumweniyi mama yindi wahosheli. Wamushili mama yindi mumakasa akambanji kindi Yowanu waswejeli kukeñayi. Chineli amana kwaYesu akumujimba achidiña kanda etiyi, Yesu hamushili Mariya mumakasawuku, ilaña wamushili mumakasa akambanji kindi washinshika. Dichi Yesu wamwekesheli nindi chalema nankashi kudi iyala wudi nachikuhwelelu kwakamena akwetala dindi, sweje-e kuyidizisha nshimbi yamuBayibolu.—Yowanu 19:25-27.

Yesu chafwiliyi, Mariya waneñeli chikupu neyi chiyashimwineñahu dehi, nawu wukaneña chikupu. Neyi tukañanya kwiluka chaneñeliyi chikupu, hitunatweshi kwiluka muzañalu watiyili chimwahitili mafuku asatuku! Chamusañwiluwu Yesu, ichi chadiña chihayamisha chabadika chamweniyi Mariya! Nawa muzañalu windi waswejeli, muloña chimwahitili mafuku Yesu wamwekeni kudi Yakoba manakwindi wakusemuka nindi kudi amama yindi, chakadi nikujina wadimweni nindi kumbadi. (1 Akorinda 15:7) Yesu chamwekeniyi kudi Yakoba nikudi amanakwindi amakwawu chayileñeleli ahimpi chikupu. Chimwahitili mafuku atachikili kumukuhwelela Yesu nawu diyi Kristu. Mumpinji yantesha, ayili kukupompa kwawakwaKristu namama yawu, “hiyakukakela mbe nakulomba.” (Yililu 1:14) Chimwahitili yaaka, amanakwindi ayedi, aYakoba naYuda, asonekeli nyikanda yamuBayibolu.

Mariya amutena kakukumishaku hampinji yadiñayi hakupompa nikulomba hamu nawanyanindi. Nsañu yaMariya ayikunkulula chachiwahi chikupu nawa washili chakutalilahu chachiwahi. Muloña wachikuhwelelu chindi, womikili chineñi nawa watambwilili wuloku wawuwahi. Neyi twimbujolaña chikuhwelelu chindi, anetu nawa tukuumikaña yihuñu yidi yejima yitukumonaña mukanu kaayi katama nawa twakadiluñisha wuloku wabadika chikupu.

[Tumazu twaheshina]

[Mwevulu wudi hefu 13]

Mariya waneñeli chikupu

[Mwevulu wudi hefu 14]

Yishimu yayivulu yazatishileñayi Yesu yamwekeshaña yuma yayivulu yamudizishiluwu kudi Yosefu niMariya

[Mwevulu wudi hefu 15]

Mariya wazañaleli chamweniyi anyanindi awamayala amakwawu ekali akwaKristu ashinshika