Munateli Kufumba Ñahi Anyanenu?
Munateli Kufumba Ñahi Anyanenu?
“Natiyilileña chivuminu chamotoka wudi wejima wahitileña iku nahili. Aka diku kapampa kamuchisatu kalabiliyi Jordan kushika hetala. ‘Nakameneni. Wudi kudihi?’ ‘Wudi mukukala tahindi? Neluki ntahi nindi tunakameni?’ Chashikileñayi hetala nakeñeleña kubaluka.”—GEORGE.
“Mwanami wamumbanda wakalukili, dichi nakameneni nankashi. Chinabalumukili namweni nakwati kumutu nawa nakudila. Mwanyikindi weyala wudi nayaaka yiwana wamukatishili.”—NICOLE.
“Mwanetu Natalie wudi nayaaka 6 wamwekeneña neyi nakuhosha mwalala, cheliliyi nindi ‘Neya wanyi kazeya. Nanona hohu.’ Chakaniniyi twaneñeli nawa twatachikili kudila. Twelukili netu nakutwamba.”—STEPHEN.
NEYI mudi anvwali, komana munateli kufwikija chatiyiliwu awa anvwali anatenuwu hewulu? Neyi mumona kukala kwamuchidiwu, mwadihulaña chimunateli kufumba mwanenu hela chakwila mwajinokaña neyi mwatela kumufumba? Komana chaluwa kufumba anyanenu?
KUFUMBA HIKWILADI?
MuBayibolu izu dakwila nawu “kufumba” dambuka nezu dakwila nawu kubabesha. Kufumba kwatalisha mukuleja, kudizisha nikwolola. Hikwadifwana nakuyandisha hela lukambuku.—Yishimu 4:1, 2.
Kufumba kwafumbañawu anvwali twatela kukwifwanisha kwitempa. Ndimi wawahishaña iseki, kutukumwina, kwinkaku wushi nawa waselañamu nikushamu yitumbu kulonda mbutu yibuli kukwatika tububu. Chinakukula mbutu, ndimi wakotolañaku tunyitayi twamumbadi kulonda mbutu yikuleña chiwahi. Ndimi weluka nindi kuzatisha njila jambokamboka kwaleñelaña kwañula mbutu yayiwahi. Munjila yoyimu, anvwali niwena akamenaña anyanawu munjila jajivulu. Hampinji yoyimu, atela kuyifumba, kufwana mbutu yinakukotolawu tunyitayi twamumbadi, anateli kwolola anyanawu kubula kwila yuma yatama nikuyikwasha kukula munjila yayiwahi. Hela chochu, ndimi watela kukotola tunyitayi twambutu mesu awunda kuchina kukisañana mbutu. Anvwali niwena atela kufumba anyanawu munjila yakukeña.
Nzambi atenawu muBayibolu, Yehova wemikila anvwali chakutalilahu chachiwahi chiyatela kulondela. Kufumba kwafumbañayi akwakudifukula indi amwovwahilaña kwazatikaña nawa kwakuwahi chakwila antu ‘akeña iku kufumba.’ (Yishimu 12:1) ‘Akwataña kufumba mbe’ nawa ‘akukosomokaku wanyi.’ (Yishimu 4:13) Munateli kukwasha anyanenu kwovwahila mumunakuyifumba neyi mulondela njila jisatu jazatishañayi Nzambi hakufumba: Dikwila nawu kufumba kwatela kwikala (1) kwakukeña, (2) nakutoñojokelaku, ni (3) kwila mumwahosha.
KUFUMBA KWATELA KWIKALA KWAKUKEÑA
Kukeña dikwamusañumunaña Nzambi kulonda yatufumbi. Bayibolu yahosha nawu: “Yehova wahosholaña antu akeñayi; dimu mwelaña tata yamuntu namwanindi atiyayi kuwaha.” (Yishimu 3:12) Kubombelahu, Yehova, “wenzala nawushona, watoñaña antu, hazuwaña swayuku.” (Kwidika 34:6) Dichi, Yehova watuyandishaña wanyi neyi nakutufumba. Nawa hazatishaña mazu atamaku, kukeñakeña yiluwa mpinji yejima hela mazu akasawuntu anateli kukatisha kumuchima neyi ‘kutapola kwampoku yakabali.’—Yishimu 12:18.
Mwalala anvwali hiyanateli kwimbujola chikupu chakutalilahu chachiwahi chaNzambi chakudiwunjikaku. Mpinji yikwawu munateli kukañanya kudiwunjika, ilaña mwatela kwanukaña mpinji yejima nenu kubabesha muntu henohu munahili kwakwashanaña wanyi nawa kunateli kuyileñela mwikali nalukambu. Cheñi, kubabesha muntu neyi munahili hikufumba wanyi. Ilaña munakañanyi hohu kudiwunjika.
Ilaña neyi mufumba muntu munjila yakukeña nikudiwunjika munateli kufuma yuma yayiwahi. Shinshikenu chamanishiliwu kukala aGeorge niaNicole, anvwali ayedi atenawu hakutachika kwachinu chibaaba.
“Chafuntiliyi Jordan, ami niñodami twahilili nankashi, ilaña twadiwunjikili nakutiyilila chadiña nakulumbululayi. Chineli wadiña wufuku nankashi, twafukwili netu tukahanjeka iyi nsañu nabudidi. Twalombeli hamu nawa twayili nakukama. Chikwachili, nyichima yetu yawundili nawa twahanjekeli iyi nsañu munjila yayiwahi chakwila twamushikili mwanetu hamuchima. Wetejeli kubula kwila yuma yitwamukanishili nawa wetejeli nindi waluwañesheli. Tunatiyi kuwaha nankashi, muloña twelukili netu kufumba muntu neyi munahili kwakwashanaña wanyi. Chelili twadiña nakutiyilila neyi nakuhosha, yuma yejima yendeli hohu chachiwahi.”—George.
“Nahilili nankashi chinamweni mwanami weyala namukatishi muhelindi. Chatela nimubabeshi, namulejeli kuya mukapeka kindi muloña nahilili nankashi nawa nadi kwila yuma yatama. Hanyima yakuwundisha muchima mwivumu, namulumbulwili nami ndombu yatama nawa namulejeli chamukatishiliyi muhelindi. Iyi njila yamukwashili. Wadanakeneni nikumukumbata muhelindi.”—Nicole.
Eñañi, kufumba munjila yayiwahi, hela chakwila munabombelumu nikubabesha kwakwashanaña neyi mwikala namuchima wakukeña.
KUFUMBA NAKUTOÑOJOKELAKU
Yehova wafumbaña munjila yashikila “mwawuñaji.” (Yeremiya 30:11; 46:28) Weluka yuma yejima, kubombelaku niyabulaña kumwekana. Indi avwali anateli kwila ñahi chuma chochimu? Stephen, atenawu hakusambila wahosheli nindi: “Hela chakwila twahilili nawa twelukili wanyi chuma chaleñeleli Natalie yakaani nindi weyili wanyi kazeya, twelukili netu hikansi.”
Robert nfumwa Nicole, niyena washinshikileña yuma yejima yaleñeleli. Neyi anyana analuwañeshi, wadihulaña nindi: ‘Dikatachi tahindi dichaaku chawu? Komana mwana nazeyi hela nakutiya kukata? Komana iyi yililu yinakumwekesha kukala kukwawu?’
Anvwali atoñojokelañaku eluka nawu anyanawu achidi atwansi. Kapostolu Pawulu mukwaKristu welukili iyi nsañu, wasonekeli nindi: “Chinadiñi kansi nahoshelaña yawansi, natiyilaña mwawansi, natoñojokelaña yawansi.” (1 Akorinda 13:11) Robert wahosheli nindi: “Neyi nanuka yuma yinelileña hinadiña kansi, chankwashañaku kubula kuhila.”
Bayi mukalishañaku, ilaña neyi anyanenu akoña chiluwa yibabeshenu. Neyi mwiluka wuswa wukwetiyi mwanenu niyuma yikwawu, mukumufumbaña chiwahi nawa mukumutoñojokelaku.
YIFUMBENU NAKWILA MUMUNAHOSHI
Mukanda waMalaki 3:6 wahosha nawu; “Ami Yehova, hinabalumukañaku.” Ambuña aNzambi akuhwelela chikupu iyi nsañu yalala nawa eluka nawu akiñewa. Anyana niwena mwatela kuyifumba neyi mumunahoshi. Neyi mukuhimpaña mumunahoshi kwesekeja nachimunahinduki, mwanenu wukuneña nawa wukwiluka wanyi yuma yatela kwilayi.
Anukenu nenu Yesu wahosheli nindi: “Chimukuhoshaña, kuminenu dakwila nenu, Eña, eña; Nehi, nehi.” Avwali atela kulondela awa mazu hakufumba anyanawu. (Matewu 5:37) Toñojokenu nakanañachima henohu kanda muyisoñamishi anyana neyi chakwila mukuyibabesha wanyi. Neyi mumusoñamisha mwanenu nenu mukumubabesha neyi yaluwañesha, ilenu mumunahoshi.
Anvwali atela kutiyañanaña hakwila afumbi chiwahi anyanawu. Robert wahosheli nindi: “Neyi anyanetu anshinjila kwila yuma yinayikanishiwu kudi ñodami nawa neluki wanyi nami nakani, nahimpaña yitoñojoka yami kulonda niteji munahoshiyi ñodami.” Neyi anvwali anaditeji wanyi chakumanisha kukala, atela kuhanjeka iyi nsañu kumbadi kwakubula anyana kulonda adikasi mumu.
KUFUMBA KWALEMA CHIKUPU
Neyi mwimbujola chafumbañayi Yehova nakukeña, kutoñojokelaku nikwila mwahoshañayi, munateli kukuhwelela nenu anyanenu akakula chiwahi. Kufumba kwenu kwakukeña kukukwasha anyanenu kupama nikwiluka chakudihemba. Bayibolu yahosha nawu: “Mufumbi mwana endi munjila yatela kuyayi, chakakulayi hakafuma mwoku.”—Yishimu 22:6.
[Chikasha chidi hefu 12]
Kufumba kwamuBayibolu kwashindamena ha . . .
Kukeña: Kufumba kwakuwahi kwashindamena hakukeña bayi kuzuwaku. Neyi mwana naluwañeshi bayi mumufumba henohu muchidi mwahilaku.
Kutoñojokelaku: Fwilenu kwiluka yuma yinaleñeli mwanenu yaluwañeshi nawa niwuswa wukwetiyi.
Kwila mumunahoshi: Neyi mumuleja mwanenu nenu mukumubabesha neyi yaluwañesha, ilenu mumunahoshi.
[Mwevulu wudi hefu 11]
TIYILILENU
[Mwevulu wudi hefu 11]
LOMBENU
[Mwevulu wudi hefu 11]
HANJEKENU