MALWIHU EHULAÑAWU ANTAÑI . . .

Hinyi Waleñeli Nzambi?

Fwikijenu tata yawantu nakuhanjeka namwanindi weyala wudi nayaaka 7. Hakumuleja nindi, “Yaaka yakunyima nankashi, Nzambi waleñeli iseki niyuma yejima yekalamu nawa waleñeli itañwa, kakweji nitutumbwa.” Mwana chinatoñojoki chantesha haniyi nsañu, hakwihula nindi, “Tata, hinyi waleñeli Nzambi?”

Tata yawantu hakumwakula nindi, “Kwosi wamuleñeli Nzambi, wekalañaku mpinji yejima.” Chineli mwana wuchidi kansi, nateli kutiya munamulejuwu chakadi kwihula cheñi malwihu amakwawu. Ilaña neyi hakukula wukutachika kutoñojoka cheñi hanilu lwihu. Chinakumukalila kutiyishisha chinateli muntu kwikalaku chakadi ntachikilu. Muloña yileñaleña yejima mwiwulu nihamaseki yikweti ntachikilu. Hakudihula nindi, ‘Hanu dinu Nzambi wafumini kudihi?’

Indi Bayibolu yahosha nawudi? Yahosha neyi chochahoshayi tata yawantu. Mosi wasonekeli nindi: ‘Eyi Yehova, . . . nimapidi achidiñi kanda ayivwali, hela iseki nampata yamunu mwishina wuchidi kanda wutiyi nyisoñu yakuyivwalaku, kufumisha kumashiita, oko-o, nakutwala kunyaka yahaya nyaka, yeyi Nzambi hohu.’ (Masamu 90:1, 2) Kaprofwetu Isaya niyena wahosheli nindi: “Hiwunelukuku? Hiwunatiyuku? Nzambi wahaya nyaka, Yehova, Nleñi wansa jeseki”! (Isaya 40:28) Mukanda waYuda niwena wahosha nawu Nzambi wadiña kwoku, “nihelili nyaka yichidi kanda.”—Yuda 25.

Iji nsona jatulejaña nawu Nzambi ‘hiMwanta wahaya nyaka,’ neyi chahosheliyi kapostolu Pawulu. (1 Timotewu 1:17) Dikwila nawu Nzambi wekala kwoku kufumisha kumashiita oko-o. Nawa wakekalaku haya nyaka. (Chimwekeshu 1:8) Chineli Nzambi diyi Chinaweji diwatela kushakama haya yaaka.

Muloñadi wutwakañenyaña kutiyisha iyi nsañu? Muloña twashakamaña hohu yaaka yantesha, twakañanyaña kutiyisha chamonañayi Yehova mpinji. Chineli Nzambi washakamaña haya nyaka, wamonaña ikombakaji danyaka nindi hifuku dimu. (2 Petulu 3:8) Chakutalilahu: komana mpasu yashakamaña hohu mafuku 50 yinateli kwiluka yaaka 70 hela 80 yitwashakamaña? Inehi! Ilaña Bayibolu yahosha nawu twekala neyi ampasu kudi Nleñi yetu. Niyitoñojoka yetu yambuka chikupu nayitoñojoka yaNzambi. (Isaya 40:22; 55:8, 9) Kudi yuma yitunateli kubula kutiyisha hadi Yehova nawa hitunateli kuhayamaku.

Hela chakwila chikukala kutiyisha chikuma chakwila nawu kwosi wamuleñeli Nzambi, tunateli kumona netu ichi chikuma chalala. Neyi kudi muntu wamuleñeli Nzambi, dikwila nawu owu muntu diyi Nleñi. Ilaña Bayibolu yahosha nawu Yehova diyi “waleñeli yuma yejima.” (Chimwekeshu 4:11) Kubombelahu, tweluka netu yileñaleña yadiñaku wanyi. (Kutachika 1:1, 2) Yafumini kudihi? Nleñi wayileñeli diyi wasambilili kwikalaku. Wadiñakoku cheñi henohu kanda kwikaluku yileñaleña yikweti maana, chidi neyi Mwana weyala wasemuka kankawindi niañelu. (Yoba 38:4, 7; Akolosi 1:15) Chakadi nikujina, diyi wadiña watachi kwikalaku. Kwosi wamuleñeli nawa kwosi chuma chadiñaku chadikumuleña.

Wumi wutukweti niyileñaleña yejima yamwekeshaña nawu kwekala Nzambi wahaya nyaka. Diyi waleñeli yileñaleña yejima, Diyi wayilombolaña kulonda yendeña chiwahi nawa wekala koku mpinji yejima. Yena hohu diyi woneneni muya wawumi muyuma yejima yikweti wumi.—Yoba 33:4.