Munateli Kumumona Nzambi Wabulaña Kumwekana?
Munateli Kumumona Nzambi Wabulaña Kumwekana?
“NZAMBI hiSpiritu,” kwosi muntu wunateli kumumona. (Yowanu 4:24) Ilaña Bayibolu yahoshaña nawu antu amakwawu amumweni Nzambi. (Aheberu 11:27) Amumweni ñahi? Munateli kumumona Nzambi ‘wabulaña kumwekana’?—Akolosi 1:15.
Tudifwikijenu namuntu wavwalika mputamesu. Komana kubula kumona kunateli kumuleñela yabuli kwiluka yuma yinakumwekana mukaayi? Inehi. Mputamesu welukaña yuma kuhitila munjila jashiyashana, jamukwashaña kumona antu, yuma niyuma yinakumwekana mukaayi. Iyala wumu mputamesu wahosheli nindi “hitwamonaña namesu hohuku, ilaña tunateli kumona yuma yinakumwekana kuhitila muyitoñojoka.”
Munjila yoyimu, hela chakwila himunateli kumona Nzambi namesu enuku, munateli kumumona ‘namesu amunyichima yenu.’ (Aefwesesa 1:18) Shinshikenu njila jisatu jinateli kuyikwasha kumona Nzambi.
‘AYILUKILAÑA KUYUMA YALEÑELIYI’
Mputamesu wukweti wuswa wakutiya nikukwata wazatishañayi hakumona yuma yinateli kubula kumonayi namesu. Munjila yoyimu, anenu nawa munateli kuzatisha mesu enu nakushinshika yileñaleña kulonda mumoni Nzambi wabulaña kumwekana waleñeli iyi yuma. ‘Yililu yindi yakamonewaña yamwekanaña chikupu kufumisha tuhu haleñeluwu mpata yamunu mwishina, muloña ayilukilaña kuyuma yaleñeliyi, joju ñovu jindi jahaya nyaka niwuNzambi windi, kulonda abuli mwakuleyela.’—Aroma 1:20.
Chakutalilahu, toñojokenu heseki detu. Iseki adileña munjila yayiwahi nankashi kulonda tudiluñisheña. Neyi tutiya kampepela kakawahi, kadiyena kakawahi kufuma kumwaana, yakudya yatowala hela kamina kakawahi kembañawu atujila twadiluñishaña. Komana iyi yawana hiyamumwekeshaña Nleñi yetu nawu watoñojokelañaku, wakamenaña nawa wekala nachisambuku?
Yumanyi yimunateli kudiza hadi Nzambi neyi mumona yuma yaleñayi? Mwatela kwiluka nenu, mawulu amwekeshaña ñovu yaNzambi. Wunsahu wunakuwanawu asayantisiti makonu wunakumwekesha nawu yuma yamwiwulu yinakuvulilaku swayi swayi. Neyi mutala mwiwulu nawufuku, dihulenu nenu: Indi ñovu yendeshaña yuma yamwiwulu swayi swayi yafumaña kudihi? Bayibolu yatulejaña nawu Nleñi ‘wasweja kunyiña.’ (Isaya 40:26) Yileñaleña yaNzambi yamwekeshaña nawu diyi “Chinaweji” nawa “wasweja ñovu.”—Yoba 37:23
“WAMULUMBULWILI CHACHIWAHI”
Mama yawanyana ayedi amputamesu wahosheli nindi “Elukaña yuma kuhitila mukuyileja. Neyi mudi hanzi, yilejenu yuma yejima yimunakumona. Yenu mesu awu.” Chochimu, hela chakwila “hikwekala muntu wamonahu dehi Nzambuku,” Mwana kaNzambi Yesu, “wekala muntulu yaTata, diyi namulumbululi chachiwahi.” (Yowanu 1:18) Chineli diyi wadiña watachi kuleña nawa Mwana wavwalika nkawindi, Yesu wekala “mesu” etu akumona yuma yekala mwiwulu. Diyi watela kulumbulula chiwahi chekalayi Nzambi wabulaña kumwekana.
Talenu yuma yantesha yahosheliyi Yesu wadiña naTata yindi yaaka yayivulu, hakumulumbulula Nzambi:
Nzambi wadikitaña chikupu. “Tata yami wuchidi kukalakala nihanu.”—Yowanu 5:17.
Nzambi weluka yuma yitwakeñaña. “Tata yenu neluki Matewu 6:8.
yuma yimunabuli himuchidi kanda mulombi kudi yena.”—Nzambi watwinkaña. “Tata yenu wudi mwiwulu . . . watuntwishaña itañwa dindi nihadi atama nihadi amawahi, wanokeshaña nvula nihadi aloña nihadi aheña.”—Matthew 5:45.
Nzambi watulemesha hamuntu hamuntu. “Tujila twanyanya tuyedi hiyatulandishaña nakadaluku? Hosi kakajila kamu kaholokelaña heseki chakadi Tata yenuku; ilaña ninsuki jakunyitu yena jajeni ajichinda dehi jejima. Dichi bayi mutiyaña womaku; enu mwalema chakubadika tujila twatuvulu.”—Matewu 10:29-31.
MUNTU WAMUMWEKESHELI NZAMBI WABULAÑA KUMWEKANA
Amputamesu elukaña yuma munjila yambukaku nawantu amonaña. Mputamesu wukutena mwevulu nindi hiwulelu munabuli mwaana bayi neyi himwidima munabuli chejeji chamwaanaku. Chochabulañayi mputamesu kumona mwevulu nimwaana, anetu nawa hitukutwesha kumwiluka Yehova kankawetuku. Dichi, Yehova watwinka muntu wamwekesheleña chikupu yililu Yindi.
Iwu muntu diyi Yesu. (Afwilipi 2:7) Yesu hahosheleña hohu nsañu yaTata yinduku ilaña watulejeli chekalayi Nzambi. Kambanji kaYesu Fwilipu wamwilili nindi: “Mwanta, tuleji Tata.” Yesu wakwili nindi: ‘Muntu wunanmoni ami namoni Tata.’ (Yowanu 14:8, 9) Yumanyi yimunateli ‘kumona’ mudi Tata muyuma yeliliyi Yesu?
Yesu wadiña nakukeña, wadizoza nawa wakasunuka. (Matewu 11:28-30) Yililu yindi yayiwahi yakwokweleña antu. Yesu waneñeleña neyi chaneñeleñawu antu nawa wayizañalesheleña. (Luka 10:17, 21; Yowanu 11:32-35) Neyi munakutaña hela kutiya nsañu yamuBayibolu yaYesu, fwikijenu neyi iyi yuma yamwekeni munakuyimona namesu. Neyi mutoñojoka chayakameneneñawu antu kudi Yesu, mukumona yililu yayiwahi yaNzambi nawa mukukundama kwakwihi Nayena.
NEYI TUSHINSHIKA WUNSAHU WEJIMA
Nsoneki wumu wahosheli chelukañayi mputamesu yuma mukaayi nindi: “Welukaña yuma yantesha hohu munjila yayivulu, chidi neyi (kukwata yuma, kutiya ivumba, kutiya niyuma yikwawu), nawa chabombayi iyi nsañu yejima wukwiluka yuma yamukaayi.” Munjila yoyimu, chimwashinshika yuma yaleñayi Nzambi, chimwataña nsañu yahosheliyi Yesu hadi Tata yindi nikushinshika chamwekesheliyi Yesu yililu yaNzambi, tukumwiluka Yehova chikupu. Mukumumonaña Nzambi.
Yoba wadiñaku kushankulu niyena wamumweni Nzambi. Hatachi wahosheli ‘yuma yabulili kwilukayi.’ (Yoba 42:3) Ilaña chashinshikiliyi yileñaleña yaNzambi yakuhayamisha, Yoba wahosheli nindi: “Nakutiyili kwamumatu hohu, ichi dinu nakumoni namesu ami.”—Yoba 42:5.
Anenu nawa neyi mushinshika yileñaleña, mukumumona Nzambi. “Neyi wakamukeñakeña [Yehova], wakamuwana.” (1 Kushindulula 28:9) A Yinsahu jaYehova akuyikwasha kumukeñakeña nawa mukumuwana Nzambi wabulaña kumwekana.
[Mazu ekoku adi hefu 9]
‘Neyi wakamukeñakeña Yehova, wakamuwana’