BAYIBOLU YAHIMPAÑA YIHANDILU YAWANTU

Nendeleña nawuta kwejima kunayileña

Washimwini Annunziato Lugarà

CHAAKA CHAKUVWALIKA: 1958

ITUÑA KWAFUMAYI: ITALY

KUHANDA KWINDI: WADIÑA MUKADIZAVU KAWAKAMANDOMBU

CHIHANDILU CHAMI CHAKUNYIMA: Navwalikilili mumusumba wanyanya muRome, mwiluña mwashakamineña atuzweñi nawa dimunakulilili. Chihandilu chadiña chakala. Amama nayimwenuhu wanyi ilaña nayilukili, nawa twatiyañeneña wanyi nawatata. Natachikili kuwana njila mwakudihandishila.

Chinashikijili yaaka ikumi, natachikili kwiya. Hinadiña nayaaka 12, natemukili hetala katachi. Kakavulu atata ejileña nakunsenda hachishina cheneni chawakapokola nakutwala kwitala. Natobokeleña nawantu mpinji yejima, nadiña wamandombu nawa naheleli antu ejima. Chinashikijili yaaka 14 natemukili hetala lwejima. Natachikili kunwa yitumbu yashetana nawa nashakamineña mumukwakwa. Chineli nadiña wanyi nakwakukama nakamineña munyotoka yambala nichikukucha. Neyi nahinduki nakeñeleña hadi menji kulonda niweli.

Nelukili nankashi kwiya chakwila neyileña muyola kuhiñahu natachikili kwiya mumatala amaneni nawufuku. Natachikili kuya mpuhu yatama nawa natachikili kwenda nezanvu datama danleñeleli nitachiki kwiya munyambawulu. Hamuloña wakwila nadiña wazuwa, anlemesheleña nankashi mwizanvu. Nendeleña nawuta kwejima kunayileña chakwila nakamineña nawu kumutu. Nekalili mukwamandombu, kunwa yitumbu yashetana, kwiya, kutukana, nikwila yililu yatama. Akapokola ankeñeleña nankashi. Akwatileña kakavulu nawa hadi yaaka yayivulu nelileña niñila mukaleya anfumishamu.

BAYIBOLU CHIYAHIMPILI CHIHANDILU CHAMI: Chinafumini mukaleya, nayili kudi amama awanyiki. Nelukili wanyi nami amama awanyiki nianyanawu ayedi ekala dehi aYinsahu jaYehova. Añilili kuyanawu kukupompa kwawaYinsahu. Nayilinawu chineli nakeñeleña kwiluka  chiyapompañawu. Chitwashikili Mwitala daWanta, nakaanini kushakama kwacheñi ilaña nashakamini kwakwihi nachisu kulonda nintaleña antu anakwiñila nikwidika. Nasendeli niwuta wami.

Kuna kupompa kwahimpili chihandilu chami. Natoñojokeleña nami nidi mwituña dacheñi. Antu añimushili namuzañalu neyi hiyamabwambu jami. Inakwanuka aYinsahu inawanini, adiña amawahi nawa ashinshika. Yililu yawu yambukili chikupu nayililu yinadiña nayu.

Natachikili kudiza Bayibolu nawaYinsahu. Kudiza Bayibolu nankashi kwakwashili kwiluka nami natela kuhimpa yililu yami. Natiyilili kufumba kwekala haYishimu 13:20, kwahosha nawu: “Endaku nawakwamaana nineyi wakekala mukwamaana; ilaña wadikunda nawayisupi wakamwenamu jakala.” Dichi neluki nami natela kuleka kudikunda nakadizanvu kawakwamandombu. Kuleka kudikunda nanaka kadizanvu kwadiña kwakala, ilaña Yehova wakwashili.

Nadiwahishili. Nalwishili chikupu hakwila nileki kunwa makanya niyitumbu yashetana. Natewili nsuki, nalekeli kuvwala masikiya nawa nalekeli kuhosha chatama. Dikadiña katachi muchihandilu chami kwiluka chakudiyuula muyuma yinelileña.

Nadiluñishileña wanyi kutaña nikudiza, dichi chankalilileña nankashi kushaku maana hakudiza Bayibolu. Hela chochu, nazatili nañovu, nkumininaku namukeñeli Yehova nawa chinleji chami chatachikili kuyiñisha. Kakavulu naneñeleña chakwila najinokeleña neyi Yehova wakañanakena hayuma yejima yatama yinakoñeli. Ilaña neyi nitaña Yehova chamwanakeneniyi Mwanta Davidi wakoñeli nshidi yahamesu bwi natiyileña kuwaha.—2 Samweli 11:1–12:13.

Kushimwina kwitala nikwitala nikwena kwankalilili. (Matewu 28:19, 20) Natiyileña woma nami hadaha nikubulakana muntu wunelili katama. Ilaña mukuhita kwampinji woma wamanini. Natachikili kudiluñisha kukwasha amakwawu kulonda amwiluki Tata yetu wamwiwulu wanakenaña chikupu.

CHINAHETELUMU: Kumwiluka Yehova kunampulwishi. Amabwambu jami amavulu afwa dehi amakwawu adi mukaleya, ilaña ami inakuhanda chiwahi nawa nikweti kuchiñeja kumbidi. Nadizi kwikala wadizoza, kwovwahila nawa naleka mandombu. Natiyañanaña nawantu ejima amuchituñilu. Nazañalalaña kwikala nawulu wawuwahi nañodami Carmen. Wejima wetu twatiyaña kuwaha kukwasha antu kudiza Bayibolu.

Nazataña nakashinshi, mpinji yikwawu nazatilaña munyambawulu, chatela niiyi nawahishañamu hohu.

[Mazu ekoku adi hefu 14]

Ichi chadiña chuma chatachi muchihandilu chami, chakwiluka mwakudihembela