BAYIBOLU YAHIMPAÑA YIHANDILU YAWANTU

Nakeñeleña Hohu Kwila Yuma Yakuditiyisha Kuwaha

Washimwini Christof Bauer

CHAAKA CHAKUVWALIKA: 1951

ITUÑA KWAFUMAYI: GERMANY

KUHANDA KWINDI: MUKWAKUDINKA WANTA NAWA WADIÑA NAYILILU YAKUDIMENA

CHIHANDILU CHAMI CHAKUNYIMA: Hinadiña kansi, chisaka chetu chashakamineña mumusumba waLeipzig, ku East Germany, kwakwihi netuña daCzech niñinza yaPoland. Hinadiña nayaaka 6, chisaka chetu chabuukilili kwituña dikwawu muloña wamudimu wazatileñawu atata, katachi twayili kuBrazil kuhiñahu Ecuador.

Chinashikijili yaaka 14, antemesheli kushikola yakubuuka kuGermany. Chineli anvwali jami adiña kwakulehi kuSouth America, nadihembeleña amaweni. Nadimeneni amaweni. Nadiña nakwakama wanyi yililu yami chiyahilishileña antu amakwawu.

Chinashikijili yaaka 17, anvwali jami afuntili kuGermany. Hatachi nashakamineña nawu. Ilaña chaaku chami chakukeña kudimena chanleñeleli nikañanyi kushakama nawu. Chinashikijili yaaka 18, nafumini hetala.

Nakañenyi kushakama hamu nawa natachikili kukeñakeña jakwila. Hanyima yakushinshika yihandilu yashiyashana nimazanvu amboka mboka, nelukili nami chuma cheneni chinatela kwila muwumi wami hikwendujola munidi iseki dadiwahi henohu kanda adijilumuni.

Nafumini kuGermany nakuya kuAfrica nahonda yinalandili. Chimwahitili mpinji, nafuntili kuEurope kulonda nakaloñeshi Honda yami. Chimwahitili ifuku dimu, nayili kuchikumu chakaloña muPortugal. Nalekeli kwendela haHonda nawa natachikili kwendela muwatu.

Nadikwatili wubwambu nakadizanvu kawanyikwenzi kadiña nakudiloñesha kuzambuka kaluñalwiji kaAtlantic. Hakachi kawu hadiña mumbanda wejina da Laurie wekalili ñodami mukuhita kwampinji. Dichi, katachi twayili kuchitutu chaCaribbean. Twashakamini chantesha muPuerto Rico, kuhiñahu twafuntili cheñi kuEurope. Twakeñeleña watu wukweti ikina kulonda tushakameñamu. Ilaña chimwahitili tukweji tusatu, kwamwekeni yuma yatukañesheli kutwalekahu kwila yuma yitwakeñeleña kwila. Añiñijili mudimu wawushidika kudi nfulumendi yamuGerman.

Nazatili tukweji 15 muwushidika wahamenji muGerman.  Iyi diyi mpinji yitwadisumbwili naLaurie nawa twadiloñesheli kulonda tutwalekuhu kwendujola. Henohu kanda nitachiki mudimu wawushidika, twalandili chivuvu chawatu. Chinadiña nakuzata mudimu wawushidika, twatwesheli kuwahisha ichi chivuvu chawatu nakwikala kawatu kanyanya. Twakeñeleña kushakamamu kulonda tutwalekuhu kwendujola nakutalatala kaayi kakawahi. Hanyima yakuleka mudimu wawushidika, henohu kanda tumanishi lwendu lwetu, aYinsahu jaYehova atwendeleli nawa atachikili kutudizisha Bayibolu.

BAYIBOLU CHIYAHIMPILI CHIHANDILU CHAMI: Hatachi, namweneña nami hinatela kuhimpa chihandilu chamiku. Nadiña wasumbula nawa nalekeli dehi kunwa makanya. (Aefwesesa 5:5) Kutalisha hankeñelu yetu yakukeña kwendujola mukaayi, namweneña nami kushinshika yuma yaleñayi Nzambi kwadiña kwalema chikupu.

Hela chochu, kuhosha walala, nateleleli kuhimpa muchihandilu, sweje-e yililu yami. Chineli naswejeli kudinka wanta nikudimena, nadimweneña nami nateli kwila chuma chejima chakadi wukwashu. Nakeñeleña hohu kwila yuma yakuditiyisha kuwaha.

Ifuku dimu, natañili Mpanji yaya mpuhu yaYesu yahaMpidi. (Matewu, kapetulu 5-7) Hatachi nelukili wanyi mwatalishiliyi Yesu chahosheliyi hakwikala namuzañalu. Chakutalilahu, wahosheli nindi adi namuzañalu wowu atiyaña nzala nimpwila. (Matewu 5:6) Nadihwili nami muntu wudi mukukankila nateli kwikala ñahi namuzañalu. Chinatwalekeluhu kudiza, nelukili nami wejima wetu twatela kumwiluka Nzambi ilaña twatela kwikala adizoza hakwila tumwiluki. Chidi neyi chahosheliyi Yesu nindi: “Atuzweñi muspiritu anakooleki.”—Matewu 5:3.

Chitwatachikili kudiza Bayibolu muGermany, ami niLaurie twabuukilili kuFrance, kuhiñahu kuItaly. Kwejima kutwayileña, twawanineña aYinsahu jaYehova. Natiyili kuwaha hakumona chiyadikeña wumu namukwawu nichiyanuñañana. Nelukili nami aYinsahu anuñañana mukaayi kejima. (Yowanu 13:34, 35) Chimwahitili mpinji, Laurie ninami twapapatisheweli nakwikala aYinsahu jaYehova.

Hanyima yakupapatishewa, natwalekeluhu kuhimpa yililu yami. Ami niLaurie twayili kuAfrica, kuhiñahu twazambukili kaluñalwiji kaAtlantic nakuya kuUnited States. Chitwadiña hakachi hakaluñalwiji wuyedi wetu mukawatu kanyanya, dihu nelukili nami nakehelamu chikupu neyi nidesekeja naNleñi yetu wabadika. Chineli nadiña nampinji yeneni muloña wakwila kwosi yuma yakwila hakachi kakaluñalwiji, natachikili kutaña Bayibolu mpinji yejima. Nsañu yahosha hachihandilu chaYesu hampinji yadiñayi hamaseki yanshikili hamuchima. Wadiña iyala wawanina nawa wadiña nawuswa wabadika chuma chidi chejima ilaña welileña wanyi yuma yakuditiyisha yomweni kuwaha. Wakeñeleña kutiyisha kuwaha Tata yindi wamwiwulu bayi yomweninduku.

Chinatoñojokeli chikupu hayuma yeliliyi Yesu, nelukili nami natela kutwamijaku Wanta waNzambi muchihandilu chami, chatela nitwamijiku yuma yacheñi yinakeñeleña kwila. (Matewu 6:33) Ami naLaurie chitwashikili kuUnited States, twafuukwili kuleka kwendujola nikushakama kweniku kulonda tushi maana kukudifukula kwetu.

CHINAHETELUMU: Chinelileña yuma halwami, hinelukileña yuma yadi kufumamuku. Ilaña ichi nawana maana amawahi akunlombola. (Isaya 48:17, 18) Nawa inakudiluñisha chihandilu chachiwahi kubadika chakunyima, kudifukula kudi Nzambi nikukwasha antu amakwawu kumwiluka.

Kuzatisha yishina yamuBayibolu kunakoleshi chikupu wulu wetu. Tukweti mwana wamumbanda wamwiluka nikumukeña Yehova.

Hela chochu, kudi kukala kutwamonaña muchihandilu chetu. Ilaña Yehova watukwashaña, nawa hitwamba kazeya hela kuleka kumukuhwelelaku.—Yishimu 3:5, 6.

[Mazu ekoku adi hefu 15]

Nelukili nami natela kutwamijaku Wanta waNzambi muchihandilu chami