Komana Nshimbi Jayinkeluwu aIsarela kudi Nzambi Jadiña Jaloña?

KUBADIKA yaaka 20 yinahituhu, yota yanyiloña mwituña dimu yetejeli wunsahu wakutwamba kutalisha hadi amayala ayedi eliliwu nawu anajahañani nawa niwena ayilejeli nawu akuyijaha. Hanyima yakwiluka nawu iyi nsañu yakutwamba, akwakuhakula nyiloña alwishili nañovu kulonda amumbiku ona muntu wakasiluwu. Ilaña akwakuhakula nyiloña amakwawu akuluka yitembi akañenyi kukwasha ona mukwawu muloña adiña amujaha dehi.

Chineli kukala kwamuchidiwu kunateli kumwekana muyota yidi yejima, Bayibolu yahosha nawu “Wakayaña mwaloña hohu.” (Kuhituluka 16:20) Neyi ansompeshi ahakula mwaloña, antu ahetelañamu. Munshimbi jayinkeluwu aIsarela akushankulu, Nzambi wayilejeli ansompeshi kubula kwikala nachaambu hakusompa nyiloña. Tushinshikenu hanilu lushimbi kulonda tumoni neyi chakwila ‘mwelañayi [Nzambi] mwejima mwawuñaji hohu.’—Kuhituluka 32:4.

ANSOMPESHI ‘AMAANA, AKWETI KASHINSHI, ATIYAKANA’

Antu ahetelañamu nankashi neyi ansompeshi eluka kuzata mudimu wawu chiwahi, asompaña mwaloña nawa hiyatambulaña majika kanwaku. Nshimbi jayinkeluwu Isarela jamwekeshaña nawu Nzambi wakeñeleña ansompeshi kwikala ashinshika. Hatachikiluwu lwendu muchinkalampata, Mosi amulejeli kukeña “amayala ashinshika amwakama Nzambi, amayala alala akadi makasu, ahelaña kudya yawukombi” kulonda ekali ansompeshi. (Kwidika 18:21, 22) Chimwahitili yaaka 40, wakonkomweneni cheñi nindi ansompeshi ateleli kwikala ‘amaana, akweti kashinshi nawa atiyakana.’—Kuhituluka 1:13-17.

Chimwahitili yaaka yayivulu, Mwanta Yehoshafwati * wakuYuda walejeli ansompeshi nindi: “Toñojokenu chachiwahi chimukwila; muloña himwasompeshelaña muntuku, mwamusompeshelaña Yehova, muloña diyi mudi nakusompeshaña nindi hamu. Dichi dinu ikalenu nawoma waYehova, babelenu yimukwila, muloña kudi Yehova Nzambi yetu hikwekala hela kuheña, hela kwakama antu kumesu, hela kutambula yamukunkuluku.” (2 Kushindulula 19:6, 7) Dichi mwanta wayanukishili ansompeshi nindi neyi ekala nachaambu hela lwisu hakusompa nyiloña, Nzambi wakayinka muloña neyi chuma chatama chimwekana.

Neyi ansompeshi amuIsarela ela mwayilejeluwu kudi Nzambi, muza washakamineña chiwahi. Dichi Nzambi wayinkeli lushimbi mwadiña yishina yayikwashileña kusompa chiwahi hela muloña wukali ñahi. Yishinanyi yayinkeluwu?

YISHINA YAYIKWASHILEÑA KUSOMPA CHIWAHI

Hela chakwila ansompeshi atondeleñawu adiña amaana nawa amayala ashikilamu, hiyateleleli kushindamena hamaanawu hela wuswa wawuku. Yehova Nzambi wayinkeli yishina yadi kulondelawu kulonda asompesheña chiwahi. Iyi diyi yishina yayinkeluwu ansompeshi amuIsarela.

Ateleleli kwihujola chachiwahi. Nzambi wazatishili Mosi kuleja ansompeshi amuIsarela nindi: ‘Neyi himukutiyilila nsañu jawanakwenu, mwakasompeshaña mwaloña.’ (Kuhituluka 1:16) Ansompeshi  anateli kusompa chaloña neyi akweti wunsahu wejima. Chumichi chaleñeleli Nzambi yaleji ansompeshi nindi: “mwakehulamu, mwakashinshikamu chachiwahi, mwakehujolamu chakashinshi.” Ansompeshi muchota ateleleli kwiluka chikupu nawu wunsahu wukwetuwu ‘walala’ henohu kanda akunkululi muloña.—Kuhituluka 13:14; 17:4.

Ateleleli kwihujola ayinsahu. Wunsahu wahanineñawu ayinsahu wadiña walema nankashi hakusompa nyiloña. Nshimbi yaNzambi yahosheli nawu: “Chinsahu wumu kumunyamukila muntu nansañu yakuluwa nehi, hela namuloña himuloña wanavulumuniyi; nsañu akayikoleshela kutunwa twawayinsahu ayedi, hela kutunwa twawayinsahu asatu.” (Kuhituluka 19:15) Nzambi walejeli ayinsahu nindi: “Hansañu yakutwamba bayi wakakwata hokuku; bayi wakadibomba namuntu watama nakwikala chinsahu chaheñaku.”—Kwidika 23:1.

Ayinsahu ateleleli kushimuna mwalala. Kushimuna wunsahu wakutwamba muchota wadiña himuloña weneni chikupu: “Ansompeshi akehujoli chachiwahi; neyi akamona chinsahu hichinsahu wakutwamba, nashimuni dehi wunsahu wakutwambila mana kwindi, henohu mwakamwili mwomwakeñeliyi kumwila mana kwindi; dichi chiwakafumisha chuma chatama mukachi keyi.” (Kuhituluka 19:18, 19) Dichi neyi muntu yatwamba muchota kulonda yasendi maheta amukwawu, wateleleli kufweta maheta esekana namaheta akeñañayi kusenda. Neyi yatwamba chakwila muntu wunatwambiliyi amujaha, niyena ateleli kumujaha. Iyi nshimbi yaleñeleleña antu kuhosha chalala.

Ansompeshi ateleleli kusompa chakadi chaambu. Chawanawu wunsahu wejima, ansompeshi ateleleli kutiyañana nakuketula muloña. Dichi lushimbi lwaNzambi lwekalili lwalema nankashi haniyi mpinji lwakwila nawu: “Kuheñeshaña wuñaji chinjila;  kumwakama kazweñi, nanochu chadiyi kazweñi hela muneni, kumulemesha nanochu chadiyi muneni chinjila; chiña wakasompeshaña mukwenu mwaloña hohu.” (Alevi 19:15) Ansompeshi asompeleña kwesekeja nawunsahu wukwetuwu walala, bayi kutala chinakumwekanayi muntu hela chifulu chikwetiyuku.

Iyi yishina, yayinkeluwu aIsarela kushankulu kudi Nzambi, nimakonu yinateli kuzatika muyota yanyiloña. Neyi ansompeshi alondela iyi yishina, anateli kuhakula chiwahi.

ANTU AHETELELEÑAMU MUWUÑAJI WALALA

Mosi wayihwili aIsarela nindi: “Indi kudi muza wukwawu weneni wukweti yidika nawuñaji waloña, neyi chijaloña nshimbi iji jinukuyileja lelu?” (Kuhituluka 4:8) Mwalala, kwosi muza wukwawu waheteleleñamu. Muchiyuulu chaMwanta Solomoni, walondeleleña nshimbi jaYehova hadiñayi mukwenzi, antu “ashakamini chakadi kwakama” nawa ahandileña chiwahi, ‘adileña nakunwa nakuluña.’—1 Anyanta 4:20, 25.

Chawushona, aIsarela alekeli kulondela nshimbi jaNzambi. Nzambi wamulejeli kaprofwetu Yeremiya kuhosha nindi: “Talenu, wena analeki dehi izu daYehova, indi dinu maana aduwu nawu adi ñahi?” (Yeremiya 8:9) Dichi Yerusalema wekalili “mukala wamashi “ nawa wenzeli “yishimashima.” Nkumininaku iwu mukala awujilumwini nawa wekalili mahembi hadi yaaka 70.—Ezekeli 22:2; Yeremiya 25:11.

Kaprofwetu Isaya wadiñaku hampinji himwadiña makabi nankashi muIsarela. Chamweniyi yuma chiyahimpikili, wahosheli awamazu kutalisha hadi Yehova Nzambi niNshimbi Jindi nindi: “Chiwukwikala wuñaji weyi hanu heseki akwakushakama munu mwishina akadiza kuloña.”—Isaya 26:9.

Isaya watiyili kuwaha chamulejeluwu kuprofweta hadi Mwanta Mesiya, Yesu Kristu nindi: “Hakasompesha chakumona kwanamesu hohuku; hakahoshela chakutiya kwanamatu hohuku; wakasompesha atuzweñi mwaloña adizoza mwituña wakayihoshela mwoloka.” (Isaya 11:3, 4) Iyi nkisu yayiwahi nankashi yakadiluñishawu antu akayuulañawu kudi Mwanta Mesiya muWanta waNzambi.—Matewu 6:10.

[Tumazu twaheshina]

[Chikasha chidi hefu 8, 9]

Komana Nshimbi jaNzambi Jetejeli Kwila Katama Nakatama?

Antu amavulu aditadikishaña mwatalisha mazu akwila nawu “disu nadisu, iji neji,” ekala muBayibolu. (Kwidika 21:24) Antu amakwawu amonaña nawu Nzambi weteja kwila katama nakatama. Ilaña yitoñojoka yamuchidiwu yambuka chikupu nalushimbi lwaNzambi lwakwila nawu: “Kuditenda chinjila; kushila anyana kawantaña jeyi nkunyi kumuchima chinjila.” (Alevi 19:18) Hanu dinu awa mazu ekala mumukanda waKwidika atalisha mudihi?

Mukanda waKwidika 21:22 wahosha hadi amayala ayedi anakuzuña wumu hakachi kawu yakatisha mumbanda wudi nevumu, hakuvwala mwana wamwisu. Neyi mama yawantu nimwana apuluka, nfumwindi hiyamwitejeleña kumwila ona iyala katamaku. Ilaña, iyala wakatishili ona mumbanda wateleleli ‘kumufutisha owu wamukatisha mwejima mwakamutoñwela mwinimumbanda; akafuti mwakatiyañenawu ansompeshi.’ Munjila yikwawu ansompeshi akumuleja muntu wakatishili mumbanda kumufweta nfumwindi hamuloña wunakoñiyi. Neyi mumbanda hela mwana yafwa nanochu chamukatishiliyi, ansompeshi akumujaha ona iyala.

Dichi ansompeshi diwu azatishileña lushimbi lwakwila nawu “wumi nawumi, disu nadisu, iji neji . . .” bayi muntu wuyanakatishuku. (Kwidika 21:23, 24) Ichi chishina chayanukishileña ansompeshi nawu ateleleli kubabesha antu kwesekeja namuloña wunakoñuwu. Richard Elliott Friedman wadiza jaBayibolu wahosheli nindi: “Chikuma chacheni chakwila nawu ansompeshi atela kubabesha antu kwesekeja namuloña wunakoñuwu.”

Chumanyi chaletesheli antu atoñojokeña nawu Nshimbi jaNzambi jetejeli muntu kwila katama nakatama? Hamukanda waMatewu 5:38, 39, hekala mazu aYesu alema akwila nawu: “Enu munatiyi cheliluwu nawu, Disu nadisu, iji neji. Ilaña ami nukuyileja nami bayi muleta ñovu nawatamaku, muntu wukukweta kwikidi dachidiilu, mushetumwini nidikwawu.” Chinakumwekana neyi kwiji mumafuku aYesu akulumpi jansakililu abombelelumu lushimbi lukwawu mulushimbi lwekala haKwidika 21:23, 24 nakwiteja kwila katama nakatama. Hela chochu, Yesu wahosheli hatooka nindi Nshimbi jayinkeluwu aIsarela kudi Nzambi himwadiña ntañishilu yamuchidiwuku.

[Mwevulu wudi hefu 9]

Antu anateli kusompa chiwahi neyi alondela yishina yekala mushimbi jaNzambi