“Neyi kudi chuma chimunakukeña, nlejenu nawa nukuyilila.” Hadaha himunateli kuleja muntu imwabula kwiluka awa mazu hela muntu imweluka chantuku. Ilaña munateli kuleja ibwambu denu awa mazu chakadi kukala. Amabwambu akeñaña nankashi kudilila yuma wumu namukwawu.

Bayibolu yahoshaña nawu mpinji yejima Yehova welaña yuma yazañaleshaña antu jindi. Chakutalilahu, Mwanta Davidi wadiña ibwambu daNzambi chikupu, wahosheli nindi: “Eyi Yehova Nzambi yami, nyidimu yeyi yakuhayama yiwuneli yinavuli, niyitoñojoka yeyi yiwatutoñojokaña. . . . yinasweji kuvula, kutwesha kuyichinda nehi.” (Masamu 40:5) Kubombelahu, Yehova welaña yuma yazañaleshaña niantu achidi kanda amwiluki, ‘wayitiyishaña kuwaha nayakudya, nikuluña mwaya nyichima yawu mwejima.’—Yililu 14:17.

Chineli Yehova wakeñaña kuzañalesha antu, komana antu akeñaña kwikala amabwambu jaNzambi niwena atela kwilaña yuma yakutiyisha ‘muchima windi kuwaha.’ (Yishimu 27:11) Hanu dinu chumanyi chimwatela kwila kulonda mumuzañalesheña Nzambi? Bayibolu yakula nawu: “Kwila yuma yayiwahi nikudyañana bayi muchivulamenaku; muloña Nzambi watiyaña kuwaha nanyilambu yidi chochochu.” (Aheberu 13:16) Komana chinayi mukwila nawu kwila yuma yayiwahi nikudyañana diyuma yakeñekaña hohu hakumuzañalesha Yehova?

Bayibolu yashimunaña nawu, ‘chakadi kukuhwelela hichinatweshi kumutiyisha Nzambi kuwahaku.’ (Aheberu 11:6) ‘Abarahama wamukuhweleli Yehova’ dihafumini ‘amuteni nawu ibwambu daYehova.’ (Yakoba 2:23) Yesu Kristu niyena wakonkomweneni nindi hakwila Nzambi yatukiswili twatela ‘kumukuhwelela Nzambi.’ (Yowanu 14:1) Hanu dinu munateli kwikala ñahi nachikuhwelelu chakeñañayi Nzambi mudi antu akeñañayi nindi ekali amabwambu jindi? Chuma chatachi chimwatela kwila hikudiza Izu daNzambi, Bayibolu mpinji yejima. Chimwela mwenimu, ‘mukusweja kwiluka mwakeñañayi’ nawa mukwiluka ‘chakumutiyisha kuwaha kwakweni.’ Dichi chimukutwalekahu kwiluka mwakeñayi Yehova nakwila yuma yoloka yimunakudiza, mukumukuhwelela chikupu nawa wubwambu wenu nayena wukukola nankashi.—Akolosi 1:9, 10.