Yumanyi yimunateli kwila kulonda mwikali ibwambu daNzambi? Tunahanjeki haniyi yuma yinalondeluhu yimwatela kwila kulonda mwikali ibwambu dindi:

1. Kwiluka ijina daNzambi, Yehova nikudizatisha.

2. Kuhanjeka mpinji yejima naNzambi mukulomba nikudiza Izu dindi Bayibolu.

3. Kutwalekahu kwila yuma yamuzañaleshaña Yehova.

Chimwashinshika iyi yuma, komana mukuhosha nenu munakwila yuma yakeñekaña hakwikala ibwambu daNzambi? Kuduhu yuma yikwawu yimunakumona nenu mwatela kuzatilahu? Kuhosha hohu chalala, chakeñekaña kuzata nañovu, ilaña toñojokenu hayuma yafumañamu.

Jennifer, wakuUnited States wahosheli nindi, “Neyi muzata nañovu kulonda mwikali nawubwambu wakola naNzambi mwafumaña yuma yayiwahi. Iwu wubwambu waletaña nkisu jajivulu: kusweja kumukuhwelela Nzambi, kwiluka chikupu yililu yindi sweje-e dinu kumukeña nankashi. Dichi kwikala nawubwambu wawuwahi naNzambi kwalema nankashi.”

Neyi munakukeña kudiluñisha wubwambu wakola naNzambi, aYinsahu jaYehova akutiya kuwaha kuyikwasha. Anateli kuyidizisha Bayibolu chakadi kuyifwetesha. Munateli cheñi kuya kukupompa kwawu kwadizañawu Bayibolu Hetala daWanta mwiluña denu, kumunateli kudikunda nawantu alemesha wubwambu wawu naNzambi. * Neyi mwila mwenimu, anenu nawa mukutiya neyi chatiyili ñimbi yamasamu wahosheli nindi: “Ilaña ami kwami chachiwahi kukundama kwakwihi naNzambi.”—Masamu 73:28.