Mpinji jikwawu, idi izu datalisha kudi muntu weyala wasokolawu. Kunyima, amayala amakwawu ayisokweleña nawa iyi yadiña njila yimu yakuyibabeshelamu. Amakwawu ayisokweleña neyi anayikwati wuduñu. Amayala ashinshika asokweleñawu ayinkeleña mudimu wakuhemba ambanda kuñanda hela kuchipañu. Chakutalilahu, ntuñu Hegayi niShashegazi azatileña mudimu wakuhemba antombu niañodi jaMwanta wawaPerisi Ahasuwerusi nawa iwu mwanta hadaha diyi ataneneñawu nawu aXerxes I.—Esita 2:3, 14.

Kwesekeja naChitiyañenu chaNshimbi, ntuñu hiyamwitejeleña kwikala mukachi kachipompelu chawantu jaNzambuku. (Kuhituluka 23:1, NW) Hela chochu, kwosi wunsahu wamwekeshaña nawu mwenyimbu wamuIsarela hela mwenyi washakamineña mukachi kawu welishiluwu kwikala ntuñu kulonda yakalakaleña nyidimu yamuñanda yamwantaku. Kwesekeja nachahosheli Nshimbi, anduñu ayalameshileña bayi neyi kuyisokolaku. Ilaña, nyunza yaKumusela yadiña natushidikilu twakwilisha anyana akwatileñawu wunduñu munjita kwikala antuñu.

Hakulumbulula chakasompeshayi antu kumbidi, Yesu wahosheli nindi: “Chakenzayi Mwana kamuntu nalubanji lwakulema kwindi, . . . wakaambola muza namuza, neyi chaambulañayi kabiña anyikoku nawampembi.” (Matewu 25:31, 32) Muloñadi atubiña chambwilileñawu awa ayimuna?

Kakavulu, anyikoku nawampembi ayibiñileña nawa adilileña hamu nampinji yamwana. Nawufuku ayiñijileña mumayinda kuchiina kuyidya kudi ayisumi, kuyiya nikufwa namashika. (Kutachika 30:32, 33; 31:38-40) Anyikoku nawampembi ayambwilileña mayinda kuchiina ampembi azuwañana kukatisha nyikaji yanyikoku yakula dehi nitunyana. Mukanda waAll Things in the Bible wahosha nawu, atubiña ambwileña nyikoku nawampembi neyi “adi natunyana, anakuyikamuna mayeli nawa neyi anakuyitewula.” Chakutalilahu chaheniyi Yesu chashindameneni hayuma yelukiluwu antiyilili jindi niyuma yelileñawu muloña muIsarela wakushankulu antu ahembelaña nyikoku niampembi.