WUDI HEFU DATACHI | NFULUMENDI YAKADI MAJIKA KANWA
Wanta waNzambi—Hinfulumendi Yakadi Majika Kanwa
Hakulumbulula chahosheleliyi nindi majika kanwa amunfulumendi akala kumanisha, mukulumpi watalaña hamali muNicaragua wahosheli nindi, “anlomboli niwena hiyenyimbu, neyi antu ela majika kanwa, anlomboli niwena anateli kwila majika kanwa.”
Neyi antu anakwila majika kanwa, mukwiteja nenu antu adi munfulumendi yejima atela kwila majika kanwa, netu? Neyi dimu, dikwila nawu nfulumendi yakadi majika kanwa yakafuma kudi antu wanyi. Bayibolu yahosha nawu nfulumendi yeniyi, hiWanta waNzambi, nfulumendi yalejeliyi Yesu atumbanji twindi kulomba.—Matewu 6:9, 10.
Wanta waNzambi hinfulumendi yalala yinakuyuula mwiwulu. Yikafumishahu nfulumendi jawantu jejima. (Masamu 2:8 9; Chimwekeshu 16:14; 19:19-21) Wanta wakakoñela antu yuma yayivulu nawa wukafumishahu nfulumendi yamajika kanwa. Shinshikenu hayuma 6 yaWanta yinakumwekesha nawu chumichi chakamwekana.
1. ÑOVU
KUKALA: Nfulumendi yawantu yatambulaña mali kudi antu jawu munyisonku nimunyombu. Njila mwatambwilañawu mali yaleteshaña anlomboli amakwawu kwiya, amakwawu atambulaña maseleka kudi antu anakukeña kuyifumishilaku nyisonku hela mali amakwawu ahanañawu kunfulumendi. Chumichi chaletaña kukala, nfulumendi yikunuñaku nyisonku kulonda yisinsishumu mali analuwankani nawa majika kanwa akuswejelaku. Munfulumendi yamuchidiwu, antu ashinshika akuyandilamu.
CHAKUMANISHA KUKALA: Ñovu yaWanta waNzambi yafumaña kudi Yehova * Nzambi watwesha yejima. (Chimwekeshu 11:15) Hiwatambulaña nyisonku hakwila nawu wutwalekuhu kuyuulaku. Ilaña, Nzambi wukweti ‘ñovu yabadika’ nawa wahanaña, wakayinka antu akayuulañawu muniwu Wanta yuma yakeñañawu.—Isaya 40:26; Masamu 145:16.
2. NYUULI
KUKALA: Susan Rose-Ackerman ashimunawu muchibaba chinafumuhu wahosheli nindi, “nfulumendi yatela kuleka majika kanwa” hakwila nawu amani. Nfulumendi ayidiwulaña neyi yinakuleja atupokola niantu adi hayifulu yanyanya kuleka majika kanwa henohu antu adi hayifulu yamaneni anakwila majika kanwa. Ninyuuli alemeshawu kudi antu wawanina wanyi. Neyi chahosha Bayibolu nawu, ‘hamaseki hihekala muntu waloña welaña chachiwahuku.’—Mukwakutaŋisha 7:20.
Yesu wakaanini maseleka amwinkeluwu
CHAKUMANISHA KUKALA: Kwambukaku nawantu abula kuloña, Yesu Kristu atondawu kudi Nzambi kwikala Nyuuli waWanta helaña chuma chatamaku. Yesu wamwekesheli chumichi hampinji yakaaniniyi maseleka, dikwila nawu “mawanta ampata yamunu mwishina ejima, nikulema kwawu.” Yesu amulejeli nawu akumwinka awa mawanta neyi yodifukula kudi nyuuli wamukaayi, Diyabolu. (Matewu 4:8-10; Yowanu 14:30) Nihampinji yamukabishileñawu nakumujaha, Yesu watwalekeluhu kwikala washinshika chakwila wakaanini kunwa walwa wabatuka wadi kuwundisha kukata ilaña wadi kumushetesha. (Matewu 27:34) Yesu chamusañwiluwu kudi Nzambi wayili mwiwulu, chumichi chamwekeshaña nawu washikahu kuyuula muWanta.—Afwilipi 2:8-11.
3. KUHIMPA CHIYUULU
KUKALA: Mumatuña amavulu antu avotaña mpinji yejima, akeñaña nawu afumishuhu anlomboli amajika kanwa hayifulu. Kuhosha hohu chalala, makampeni nikuvota kwaleñelaña kwila majika kanwa, nimumatuña mwekala maheta. Kuhitila muyawana yahanañawu hampinji yakampeni niyuma yikwawu, muntu waheta nateli kukokola anlomboli adihu hanoyu mpinji niakahiñahu.
Ñaji Paul Stevens wamuChota Chanyiloña Cheneni chamu U.S. wasonekeli nindi, ikoku damuchidiwu “hidafumpaña nshimbi ninjila mwayuulilaña Nfulumendi hohuku ilaña nikashinshi kawantu kamanaña.” Dihafuma antu amavulu mukaayi kejima kwiluka nawu nyitayi yajipolitiki diyi yasweja majika kanwa.
CHAKUMANISHA KUKALA: Wanta waNzambi wukafumishahu kampeni nimajika kanwa nawa wukatwalekahu kuyuula haya nyaka. (Danyeli 7:13, 14) Chineli Nyuuli amutonda kudi Nzambi, Wanta hiwashindamena hamavoti awantuku nawa hiyakawufumishahu kudantuku. Chineli iwu Wanta wahaya nyaka, wukakoña yuma yikakwasha antu haya nyaka.
4. NSHIMBI
Wanta waNzambi hinfulumendi yalala yinakuyuula mwiwulu
KUKALA: Hakusambila, antu atoñojokaña nawu kutuña nshimbi jajiha kukuwahisha yuma. Hela chochu, ankuluñaña ahoshaña nawu kuvulisha nshimbi kwakojejaña hohu majika kanwa. Kubombelahu, hela chakwila azatishaña mali amavulu hakutuña nshimbi yakumanisha majika kanwa, hiyazatikañaku.
CHAKUMANISHA KUKALA: Nshimbi jaWanta waNzambi jabadika chikupu janfulumendi jawantu. Chakutalilahu, chatela yashimuni nshimbi jajivulu, Yesu waheni lushimbi lwatenañawu nawu Lushimbi Lwalema. Wahosheli nindi: “Dichi yejima yimunakeñi antu kuyililenu, ninenu nawa yililenu mwomumu.” (Matewu 7:12) Sweje-e, iyi nshimbi yaWanta yahosha hayuma yasañumunaña kwila chuma. Yesu wahosheli nindi, “Keñaku mukwenu neyi chiwadikeña eyi aweni.” (Matewu 22:39) Chineli Nzambi welukaña jidi kumuchima wamuntu, mwamweni diyi wahanaña iyi nshimbi.—1 Samweli 16:7.
5. YILILU
KUKALA: Yililu yakojejaña majika kanwa hilwisu nikudikeña. Anlomboli amunfulumendi niantu amwekeshaña yililu yamuchidiwu. Hakwila nawu itala dakuhembela yuma diyashimunawu muchibaba chinafumuhu damuSeoul dihumukeña, anlomboli amunfulumendi atambwili maseleka kudi akwakutuña elukili nawu neyi ahana maseleka, akuzatisha mali antesha kubadika kulanda yuma yakola yakutuña nachu.
Hakwila nawu majika kanwa amani, antu atela kuyidizisha chakuleka yililu yidi neyi lwisu nikudikeña. Dichi, nfulumendi yawantu yidana wuswa niñovu yakudizisha antu chakuleka iyi yililu.
CHAKUMANISHA KUKALA: Wanta waNzambi wamanishaña majika kanwa kuhitila mukudizisha antu chakuleka yililu yakojeshaña majika kanwa. * Chayidizishañawu muniyi njila chayikwashaña ‘kwikala amaha muyitoñojoka yawu.’ (Aefwesesa 4:23) Chatela ekali nalwisu nikudikeña azañalalaña nayuma yikwetiwu nawa atoñojokelañaku akwawu.—Afwilipi 2:4; 1 Timotewu 6:6.
6. ANTU
KUKALA: Nimumaluña mwashakamañawu chiwahi nawa mwekala antu akweti yililu yayiwahi, antu amakwawu elaña majika kanwa. Dichuma chaleñelaña ankuluñaña nawu nfulumendi yawantu kwila yimanisha majika kanwa nehi. Nfulumendi yakuhwelela nawu yinateli kukeheshaku majika kanwa niyuma yatama yafumañamu.
CHAKUMANISHA KUKALA: Mutayi waUnited Nations Watalaña Hakukeheshaku Majika Kanwa wahosheli nawu, hakumanisha majika kanwa nfulumendi yatela kwikala “yashinshika nawa yatela kuzatilahu aweni.” Ichi hichuma chachiwahi, Wanta waNzambi welaña yuma yayivulu kubadika kuhosha hohu haniyi yililu, wakeñaña antu amuniwu Wanta kwikala ashinshika. Bayibolu yahosha nawu “akalwisu” “niakwakutwamba” hiyakeñila muWantaku.—1 Akorinda 6:9-11; Chimwekeshu 21:8.
Antu anateli kudiza kwovwahila iyi nshimbi yayiwahi neyi chelili akwaKristu akusambila. Chakutalilahu, kambanji Shimona chakeñeleñayi kulanda spiritu yajila kudi apostolu, akaanini maseleka nakumuleja nawu: “Balumukaku mumuchima wuleki ichi chuma chatama.” Shimona chelukiliyi wubanji wachuma chafwilileñayi, walejeli apostolu nawu amulombeluku kulonda yaleki maseleka.—Yililu 8:18-24.
YUMA YITWATELA KWILA HAKWIKALA ANSWANA AWANTA
Munateli kuswana Wanta waNzambi hichikweti muloña netuña kumwafumaku. (Yililu 10:34, 35) Iwu Wanta wukweti progiramu yakudizisha antu mukaayi kejima nawa yikuyidizisha chimwatela kuswana Wanta. A Yinsahu jaYehova akutiya kuwaha kuyileja chakudiza Bayibolu chawana hetala, nawa munateli kudiza mujiminiti 10 mulungu nimulungu. Munateli cheñi kudiza ‘nsañu yayiwahi yaWanta waNzambi,’ nichiwakafumishahu nfulumendi jamajika kanwa. (Luka 4:43) Munateli kumwila Chinsahu wamwiluña denu hela munateli kuya haWebu sayiti yetu ya jw.org.
Mukukeña kudiza Bayibolu chawana hetala?
