Kufwa kwaYesu Nikusañuka—Chikunateli Kuyihetesha
“Mukuhweleli Mwanta Yesu, wuhandi.”—Yililu 16:31.
Kapostolu Pawulu niSilasi diwu ahosheli awa mazu hampinji yalejeleñawu mukwakuhemba kaleya wamuMasidoniya musumba wamuFwilipi. Indi awa mazu atalisha mudihi? Hakwila twiluki kukuhwelela mudi Yesu chikwatela kutuhandisha, twatela kwiluka chitwafwilaña. Talenu Bayibolu chiyahosha.
Antu hiyayileñeli nawu afweñaku
“Yehova Nzambi watweli muntu, yomusha nimwitempa daEdeni, nindi, Kadidimi, kadihembi chachiwahi. Yehova Nzambi wamulejeli muntu, nindi: ‘Nyitondu yamwitempa yejima wukudya tuhu. Ilaña mutondu wakwiluka nachu niyayiwahi niyatama eyi bayi wakawidyaku; muloña ifuku diwakadya chalala wakafwa.’”—Kutachika 2:15-17.
Nzambi washili Iyala watachi, Adama, mwitempa daEdeni, paradisa yahamaseki nawa mwadiña tunyama twamumpata twatuvulu ninyitondu yituuta. Yadiña nyitondu yasoñeleña nkabu yateleleli kudyayi Adama. Hela chochu Yehova wamulejeli Adama kubula kudya kumutondu wumu nawa wamusoñamishili nindi neyi yadyaku, wakafwa.
Komana Adama watiyilili chamukaanishiluwu? Welukili chekala kufwa, muloña wamweneña chafwileña anyama. Neyi Adama amuleñeli nawu wakafwa, kusoñamisha kwaNzambi kwadikwikala kwamukunkulwayi. Neyi Adama wamwovwahilili Nzambi nakubula kudya kumutondu wadi kushakama haya nyaka chakubula kufwa.
Antu amakwawu ahoshaña nawu welili wuvumbi bayi neyi wadyili kumutondaku, ilaña hidimuku. Yehova wakeñeleña Adama nañodindi Evu ‘kusemununa, nakuvula, nikuwanina heseki, nakudovwahisha.’ (Kutachika 1:28) Amukaanishili kudya kumutondu. Yehova wawuteneni nindi “mutondu wakwiluka nachu niyayiwahi niyatama” muloña wemeneneñaku wuswa windi wakwiluka nachu yuma yikuyiwahila antu nikuyitamina. Neyi Adama wabulili kudya mukabu wanona mutondu, wadikumwekesha kwovwahila nikusakilila kudi Nleñi yindi wamukiswilili nankashi.
Adama wafwili muloña wadikañili naNzambi
‘Nzambi hakumwila Adama, nindi, Chiwunadyi kumutondu wunakulekesheli nami bayi wakawidyaku, . . . kudya yakudya chiña wunasulwili kumesu eyi, nichiwamba kafunta cheñi mumaseki, muloña dihu hakufumishiluwu, nochu wakafunta cheñi mwomulunkuñu.’—Kutachika 3:17, 19.
Adama wadiili kumutondu wamukaanishiluwu. Waluwañesheli chikupu hakudikaña. Kudikaña kwamwekesheli hatooka nawu wadiwili chikupu yuma yejima yayiwahi yamwinkeliyi Yehova. Chadiiliyi kumukabu, Adama wamukaanini Yehova, wakeñeli kudiyuula nawa mwafumini yuma yomisha mbaña.
Neyi chochahosheliyi Yehova, Adama wafwili. Nzambi wamuwumbili Adama “nalunkuñu lwamaseki” nawa wamulejeli nindi “wakafunta cheñi mwomulunkuñu.” Adama hatwalekeli kuhanda mumujimba wacheñi hela kuya kwiluña dacheñuku. Chafwiliyi, hadiña cheñi nawumiku, wadiña tuhu neyi lunkuñu kwamufumishiluwu.—Kutachika 2:7; Mukwakutaŋisha 9:5, 10.
Twafwaña muloña twafuma kudi Adama
“Kudi iyala wumu nshidi yeñilili mumpata yamunu mwishina, ninshidi yaleteli kufwa; chochenochu nawa nikufwa kwashikeneni antu ejima, muloña wejima wawu avulumwini.”—Aroma 5:12.
Adama chadikañiliyi hela netu chavulumwiniyi, mwafumini yuma yomisha mbaña. Chavulumwiniyi wajimbesheli kukooleka kwakushakama haya nyaka bayi neyi yaaka 70 hela 80 yitunakushakama makonuku. Kubombelahu, Adama chavulumwiniyi wekalili mukwanshidi nawa wasambwishili anyanindi.
Wejima wetu twafuma kudi Adama. Kuhitila mudi Adama twaswana nshidi nawa twekala nanyijimba yabula kuwanina yatuleñelaña tuvulumuneña nikufwa. Pawulu washimwini yihuñu yitwamonaña. Wasonekeli nindi: “Ami nidi wachisemwa chaheseki, anlanda dehi kuwuduñu wanshidi. Ami nshona! O kukala kunamonaña! Wukuñamwina kumujimbiwu wakufwa, hinyi?” Pawulu wadakwili yomweni nindi: “Nasakilili Nzambi nami Yesu Kristu Mwanta wetu diyi natweshi.”—Aroma 7:14, 24, 25.
Yesu waheni wumi windi kulonda tukashakami haya nyaka
“Tata watemesheli Mwana ekali Chamwinu chawantu ampata yamunu mwishina.”—1 Yowanu 4:14.
Yehova Nzambi waloñesha njila yakufumishilamu kukala kwejima kutwamonaña muloña wanshidi kulonda yatupulwishi kukufwa kwakubula kusañuka. Munjilanyi? Watemesheli Mwanindi wakeñayi kufuma mwiwulu kulonda yavwaliki wawanina neyi chadiñayi Adama. Kwambukaku naAdama, Yesu ‘havulumwineñaku.’ (1 Petulu 2:22) Chineli wadiña wawanina, hadiña muwuduñu wakufwaku nawa wadi kushakama haya nyaka muloña wakuwanina.
Ilaña Yehova wetejeli Yesu kumujaha kudi ayilumbu jindi. Chimwahitili mafuku asatu Yehova wamusañwili namujimba wawuspiritu kulonda yafunti mwiwulu. Mwiwulu, Yesu wahanini wumi windi walema wawanina kudi Nzambi kulonda yakuuli nachu chuma chajimbesheli Adama chadi kumukwasha nianyanindi. Yehova wetejeli iwu mulambu, kulonda ejima akumukuhwelela Yesu akatambuli wumi wahaya nyaka.—Aroma 3:23, 24; 1 Yowanu 2:2.
Yesu wafuntishili chuma chajimbesheliyi Adama. Watufwilili kulonda tuheti wumi wahaya nyaka. Bayibolu yahosha nawu: ‘Yesu, . . . watompeleli antu ejima kufwa naluwi lwaNzambi, . . . nanochu chamweniyi makabi akufwa.’—Aheberu 2:9.
Iyi ntanjikilu yamwekeshaña chekalayi Yehova. Wuñaji windi wasweja waleñeleli antu abula kuwanina akañanyi kudikuula aweni. Hela chochu, kukeña niluwi kwamuleñeleli yawani njila yamukwashili kushikija nkeñelu yindi hela chakwila chamukatili nankashi kumuchima, waheni Mwanindi kulonda yakuuli antu.—Aroma 5:6-8.
Yesu amusañwili niantu amakwawu akayisañula
‘Kristu amusañula dehi mudi afu, nekali dehi nyikabu yatachi yawenawa anakami tulu twakufwa. Muloña chaleteluwu kufwa kudi muntu, kudi muntu nawa diku kwenjili kusañuka kwawafu. Muloña chafwañawu antu ejima mudi Adama, dichi nawa antu ejima akayihandishila mudi Kristu.’—1 Akorinda 15:20-22.
Tweluka chikupu netu Yesu wadiñi kwoku nawa wafwili, hanu dinu, chumanyi chinakumwekesha nawu amusañwili? Wunsahu waweni wunakumwekesha nawu Yesu amusañwili wudi wakwila nawu wamwekeni kudi antu amavulu hampinji yashiyashana nawa kumaluña ambokamboka. Hampinji yimu, wamwekeni kudi antu akubadika ha 500. Kapostolu Pawulu wasonekeli iyi nsañu mumukanda windi wasonekeleliyi Akorinda, nakuhosha nindi, antu amakwawu amumweni Yesu achidi kwoku nawa ashimwineña yuma yamwenuwu nikutiya.—1 Akorinda 15:3-8.
Pawulu chasonekeliyi nindi Kristu nekali dehi “nyikabu yatachi” yanana akasañulawu, walumbulwileña nindi amakwawu akayisañula. Yesu yomweni wahosheli nindi mpinji yakenza ‘antu ejima adi mumajamu, akedikamu.’—Yowanu 5:28, 29.
Hakwila tukashakami haya nyaka, twatela kumukuhwelela Yesu
“Chaswejeliyi Nzambi kukeña mpata yamunu mwishina, waheni Mwanindi wumu hohu, kulonda muntu wukumukuhwelela aheti wumi wahaya nyaka, akabuli kunoña.”—Yowanu 3:16.
Nsañu yakutachikilahu muBayibolu yatulejaña mpinji yatachikili kufwa nichajimbeli Paradisa. Nsañu yakukumishaku yatulejaña mpinji yakafumishahu Nzambi kufwa hamaseki nakuleta Paradisa. Antu akashakamaña cheñi namuzañalu chakadi makabi haya nyaka. Mukanda waChimwekeshu 21:4 wahosha nawu: “Hikwakekala nawa cheñi kufwaku.” Hakwila twiluki netu ichi chikaninu chakashikijewa, vasi 5 yahosha nawu: ‘Mazu awa alala chikupu.’ Yuma yakanayi Yehova, wakayila chikupu.
Mwakuhwelela nenu ‘awa mazu alala chikupu’? Komana dinu mwilukenu chikupu Yesu Kristu nawa mukuhwelelenu. Neyi mwila mwenimu, Yehova wukuyikiswila. Yehova wukuyikiswila chikupu makonu nawa mukwikala nakuchiñeja kwakwikala nawumi wahaya nyaka muParadisa hamaseki mwakabula kwikala ‘cheñi kufwa hela kuneña hela kudila hela kukata.’
