Jairo wavwalikili nachikatu chakuwoñu chaCerebral palsy chatenañawu nawu spastic quadriplegia. * Nawa mujimba windi wela kalepa. Woñu windi wakañanyaña kutemesha nsañu kunyijila, nyendu nimakasa yazatikaña wanyi, yakuminaña dakupotomoka. Mpinji yikwawu, Jairo wadikatishaña muloña wakwila mujimba windi wazeya. Antu adi kwakwihi niwena wayikatishaña neyi aneluki wanyi. Chawushona, mpinji yejima nyendu yindi nimakasa twayikasilaña kukakinga kindi kuchina kudikatisha.

Kukula kwaJairo kwayikatu hohu. Chashikijiliyi tukweji tusatu, wakatili chikatu chakuwoñu nawa wahwidilileña. Kakavulu aMama amufwempeleña nakumutemwishila kuchipatela nawu nafwi.

Hamuloña wakumufwempa, mafwaha aJairo aheñeli. Chashikijiliyi yaaka 16, wahoyomokeli mulukuma nawa amuladikili chikupu hekata nimulukuma. Nanukaña chadilileñayi Jairo wufuku wejima hakukusuka kwachilonda.

Wufwayi waJairo weneni nankashi chakwila washindamena hadi akwawu, kumudiisha, kumuvwika nikumukamika. Amama nawaTata diwu avula kwila yumiyi. Hela chakwila Jairo wakeñaña wukwashu mpinji yejima, anvwali amulejaña nawu wumi windi hiwashindamena hadi antu hohuku ilaña nihadi Nzambi.

Anvwali jetu hiyaYinsahu jaYehova, amuntañilaña Jairo nsañu yamuBayibolu kufuma tuhu kuwansi windi. Eluka chikupu nawu muntu nateli kwila namuzañalu neyi yekala ibwambu daNzambi. Jairo waholokeleli muyikatu yazeyesheli chikupu mujimba windi, ilaña wateleli kwikala nachikuhwelelu chakola muyuma yikamwekana kumbidi. Hela chochu, ajinokeleña neyi chakwila Jairo watela kutiya nsañu yamuBayibolu.

Ifuku dimu, henohu Jairo wuchidi kansi, aTata amwihwili nawu, “Jairo, hoshaku?” Ahosheli cheñi nawu, “Neyi mwalala wankeña, wukuhosha.” Atata chamulejeluwu nawu yahoshi hela tuhu izu dimu, madilu enzeli mumesu aJairo. Hela chakwila wakeñeleña kuhosha, wakuminini dakubokomwena. Atata aneñeli chamudilishiluwu Jairo. Jairo chadililiyi chamwekesheli nawu watiyili  chahosheluwu aTata. Ilaña wakañenyi hohu kuhosha.

Hashimbwili wanyi, anvwali amweni nawu Jairo wanyeñumwineña mesu neyi kudi yuma yinakukeñayi. Chamukalilileña Jairo hakwila yahoshi chuma chinakukeñayi. Ilaña anvwali chelukiluwu chazatishileñayi mesu neyi nakukeña chuma nawa neyi amwinka chuma chinakukeñayi, Jairo wamwekeneña kuzañalala hamesu. Dichasakilileñayi.

Nkuluñaña wadizishaña antu chakuhosha watulejeli njila yayiwahi yakuhoshelamu, nindi twatela kunyamuna makasa ejima ayedi neyi hitukumwihula lwihu lukwakulayi nindi eña hela nehi. Kuchikasa chachidiilu kwakwitejela, kuchimuswa kwakukaanina. Neyi yatala kuchidiilu neteji, neyi yatala kuchimunswa nakaani.

Muchaaka, aYinsahu jaYehova apompaña kasatu kupompa kwanyanya nikweneni, kwahoshañawu mpanji yaBayibolu kwizaza deneni. Jairo watiyileña kuwaha nankashi nampanji yachipapatishu. Ifuku dimu henohu Jairo wudi nayaaka 16, aTata amwihwili nawu, “Jairo, wunakukeña kupapatishewa?” Hohenohu, watalili kuchikasa chawaTata chachidiilu nindi nakukeña kupapatishewa. Amwihwili cheñi nawu, “Wunamukani Nzambi mukulomba neyi wukamukalakela haya nyaka?” Jairo watalili cheñi kuchikasa chawaTata chachidiilu. Jairo wamwekesheli nindi nadihani kudi Yehova.

Chadiziliyi nsañu yayivulu yamuBayibolu, Jairo wamwekesheli cheñi nindi welukili chalemena chipapatishu chawakwaKristu. Dichi, mu 2004, wakwili lwihu lwalema lwakwila nawu, “Munadihani enu aweni kudi Yehova kulonda mwili nkeñelu yindi?” Jairo wafumbwili mesu kwiwulu hakwakula ilu lwihu. Dichakeñeleñayi nindi yakaakuli. Chashikijiliyi yaaka 17, wapapatisheweli nakwikala Chinsahu chaYehova.

Mu 2011, twaweni njila yikwawu mwahosheleleñayi Jairo, kompyuta yakontololañawu nadisu. Idi ikina delukaña chinakwenda kantu kadisu kulonda yasakuli nsañu yidi hasikilini. Chalabulayi hela chakutalayi nsañu yinasakuliyi hasikilini chidi neyi nachinti hamawusi yakompyuta. Ashiluhu bodi yanyevulu yayinjikijilu yamazu yamukwashileña Jairo kuhosha. Neyi yatala hachinjikijilu chimu nakulabula, kompyuta yikuhosha nsañu yidi hakana kachinjikijilu.

 Jairo wakwashileña nankashi akwawu kumwiluka Nzambi chelili yasweji kwiluka nsañu yamuBayibolu. Hakudifukula kwachisaka kwamumulungu nimulungu, welaña yantala, yatala hakompyuta. Dichinjikijilu chanlejañayi nachu nindi nimusonekeli nsañu yakakulayi hakupompa kwawakwaKristu kwamalwihu niñakwilu.

Hakupompa, wakeñaña chiwahi chinjikijilu kulonda yachinti nsañu yinakukeña kwaakulayi, antu ejima akutiya izu dindi dahakompyuta. Wakoleshaña antu amuchipompelu neyi yatumba chimwemweta. Alex, ibwambu daJairo wakansi wahosheli nindi, “Natiyaña kuwaha neyi Jairo yahoshahu hansañu yejima yitunakuhanjika yamuBayibolu.”

Jairo wazatisha cheñi mesu indi kuleja antu yuma yakuhwelelayi. Wachintaña hachinjikijilu chahakompyuta hekala mwevulu wetempa mudi atunyama niantu ashiyashana anashakami hamu mukuwunda. Neyi yachinta hanichi chinjikijilu, izu dindi dahakompyuta dikuhosha nawu, “Bayibolu yakana nawu iseki dakekala paradisa mwakabula yikatu nikufwa, Chimwekeshu 21:4.” Neyi muntu namwekeshi mpwila, wukuchinta hakachinjikijilu kakwawu nawa kompyuta yikuhosha nawu, “Munakukeña tudizileña hamu Bayibolu?” Chatuhayamishili hakumona ankaka awamayala aneteji kudiza. Twazañalalaña hakumona Jairo anakumukwasha kudi mukwawu Chinsahu kudizisha ankaka Bayibolu chovu chovu. Wenowu muzañalu wutwatiyili hakumona ankaka anakupampatishewa hakupompa kweluña muMadrid muAugust 2014.

Niantañishi ahashikola hatañilañayi eluka nawu Jairo wamwakama Nzambi. Rosario, wekala hakachi kawankuluñaña amudizishaña chakuhosha, wahosheli nindi: “Neyi inakukeña kwitiya nakekala Chinsahu chaYehova. Namoni chikuhwelelu chaJairo chichinamukwashi kwikala nachihandilu chikweti nkeñelu hela chakwila wakata.”

Jairo watiyaña kuwaha neyi nimutañila chikaninu chamuBayibolu chakwila nawu: “Mukwakubalakata [wakakiluka] neyi nkayi, niidimi dakamama dakemba tumina.” (Isaya 35:6) Hela chakwila waneñaña mpinji yikwawu, kakavulu wekalaña namuzañalu. Wekala namuzañalu muloña wumi windi washindamena hadi Nzambi nikuhanjeka nawakwawu akwaKristu. Muzañalu wukwetiyi nichikuhwelelu chindi chakola hiwunsahu wunakumwekesha nawu kumukalakela Yehova kwaleteshaña chihandilu chayihuñu kwikala chamuzañalu.