Mwadihulahu dehi malwihu amuchidiwu? Neyi dimu, hiyenu mwehulaña nkawenuku. Antu mukaayi kejima ehulaña malwihu alema muwumi wawu. Komana munateli kuwana ñakwilu?

Antu amavulu anateli kwiteja nawu, “Eña!” Muloñadi? Muloña anawani ñakwilu yalala yamalwihu awu muBayibolu. Munakukeña kwiluka chahosha Bayibolu? Munateli kuhetela muprogilamu yakudiza Bayibolu chawaana yadizishañawu aYinsahu jaYehova. *

Kuhosha chalala, antu amavulu ahoshaña nawu: “Nidi nampinji wanyi.” “Nukutwesha wanyi.” “Nidi nanyidimu.” Ilaña amakwawu dichahoshañawu wanyi. Etejaña kudiza nsañu yatañishaña Bayibolu. Talenu yakutalilahu yantesha:

• “Nayileña muchaachi yaKatolika niyawaProtestanti, mutembeli yawaSikh, mumonastery yawaBuddha, nawa nadizili nsañu yahosha hayileñaleña niyakwitiya hashikola yamuñoñi. Ilaña kwosi wakwili malwihu ami ahosha hadi Nzambi. Nkumininaku, Chinsahu chaYehova wenjili kwitala dami. Netejeli kudiza Bayibolu muloña natiyili kuwaha chakwiliyi malwihu kuzatisha Bayibolu.”—Gill, England.

• “Nadiña namalwihu amavulu hansañu yawumi, ilaña pasita wamuchaachi yetu wakañenyi kwakula. Dichi Chinsahu chaYehova wakwili malwihu ami kuzatisha Bayibolu. Chanyihwiliyi neyi inakukeña kudiza Bayibolu, netejeli namuzañalu.”—Koffi, Benin.

• “Nakeñeleña kwiluka chuma chamwekanaña neyi muntu nafwi. Nelukili nami afu akatishaña amomi, ilaña nakeñeleña kwiluka chahosha Bayibolu. Dichi natachikili kudiza Bayibolu nebwambu dami Chinsahu.”—José, Brazil.

• “Nesekeli kutaña Bayibolu ilaña nayitiyileña wanyi. Dichi aYinsahu jaYehova enjili nawa anlumbulwilili chiwahi wuprofwetu wawuvulu wamuBayibolu. Nakeñeleña kudiza nsañu yikwawu.”—Dennize, Mexico.

• “Najinokeleña neyi kwinji Nzambi wañakamenaña. Dichi nalombeli kudi Nzambi nsoneki yaBayibolu. Ifuku dalondeleluhu aYinsahu enjili kwitala dami nawa netejeli kudiza Bayibolu.”—Anju, Nepal.

Iyi yakutalilahu yinatwanukishi mazu aYesu akwila nawu: “Atuzweñi muspiritu anakooleki, muloña wanta wamwiwulu wunekali wawu.” (Matewu 5:3) Antu afwilaña chikupu kumwiluka Nzambi. Dichi Nzambi diyi wunateli kuyikwasha kulonda amwiluki nawa wayikwashaña kuhitila Mwizu dindi Bayibolu.

Yumanyi yabombela mukudiza Bayibolu? Munateli kuhetelamu ñahi? Awa malwihu akuyakula muchibaaba chinalondeluhu.