Malwihu amuBayibolu Anayakuli
Muloñadi wutwatela kwanakana kufwa kwa Yesu?
Chihandilu chetu chikekala ñahi kumbidi chineli Yesu watufwilili?—Isaya 25:8; 33:24
Kufwa kwaYesu hichuma chalema chamwekeni kulonda yafuntishi cheñi wumi wamuchidi wamuntu chiwadiña. Muntu hiyamuleñeli nawu yeleña yuma yatama, yakateña hela kufwaku. (Kutachika 1:31) Ilaña nshidi yeñilili mwituña kuhitila mudi iyala watachi, Adama. Yesu waheni wumi windi kulonda yatukuuli kunshidi nikukufwa.—Tañenu Matewu 20:28; Aroma 6:23.
Nzambi wamwekesheli kukeña kwakweni chatemesheliyi Mwanindi hamaseki kulonda yotufwili. (1 Yowanu 4:9, 10) Yesu wayilejeli atumbanji twindi kwanakana kufwa kwindi nachidika chadinkendi nivinyu. Kwanakana kufwa kwindi hachaaka hachaaka kwamwekeshaña nawu tunakusakilila hakukeña kwamwekesheli Nzambi niYesu.—Tañenu Luka 22:19, 20.
Anyi atela kudya dinkendi nikunwa vinyu?
Hampinji yatachi yayilejeleñayi Yesu atumbanji twindi kwanakana kufwa kwindi, wahosheli hansañu yachitiyañenu. (Matewu 26:26-28) Ichi chitiyañenu chayenzunwinini atumbanji niantu antesha njila yakwikala anyanta niatupristu nindi mwiwulu. Hela chakwila antu amavulu anakanaña kufwa kwaYesu, ilaña ana ekala hohu munichi chitiyañenu diwu adyaña dinkendi nikunwa vinyu.—Tañenu Chimwekeshu 5:10.
Kwakwihi nayaaka 2,000 yinahituhu, Yehova nakutonda antu akekala anyanta. (Luka 12:32) Antu akashakama hamaseki haya nyaka amavulu kubadika akaya mwiwulu.—Tañenu Chimwekeshu 7:4, 9, 17.
You May Also Like
CHITWEKALA
Chanukishu chakufwa kwaYesu
Chaaka nichaaka mamiliyoni antu apompaña hamu nakwanakana kufwa kwaYesu. Tunayitambiki kulonda mwakeluki kufwa kwindi chikunayikundami.
