Kufuma tuhu kumashiita, antu afwikijaña kushakama chihandilu chachiwahi chakufunta kuwukwenzi nikwikala namujimba wawuwahi haya nyaka. Chawushona, kuhosha hohu chalala: Twafwaña. Awa mazu adi hewulu ahosheliyi Yoba yaaka 3,000 yinahituhu achidi kuzatika makonu.

Antu ejima afwilaña kushakama haya nyaka. Bayibolu yatulejaña nawu Nzambi watuleña nampwila yakushakama haya nyaka. (Mukwakutaŋisha 3:11) Neyi watuleña muniyi njila, munateli kutoñojoka nenu Nzambi wukweti kukeña nateli kutuleña nampwila yikabula kushikijewa? Neyi munahoshi nenu wakayishikija, ñakwilu yenu yidi chiwahi. Izu daNzambi dahosha nawa kufwa hichilumbu nawa dakana nawu ‘akamunoñesha.’—1 Akorinda 15:26.

Chakadi nikujina, kufwa hichilumbu. Kwosi muntu wakeñaña kufwa. Neyi kumwekana wubanji, twawombolokaña, twaswamaña hela kutemuka. Neyi tukata, twakeñaña njila yakudukilamu. Twazataña nañovu kulonda tutondolweli yuma yikutuleñela tufwi.

Kudihu chuma chinateli kuyileñela mukuhweleli nenu iwu chilumbu akamunoñesha? Eña. Yehova Nzambi, Nleñi, haleñeli antu nawu ashakameña hohu yaaka yantesha nikufwaku. Nzambi haleñeli antu nawu afweñaku. Wayileñeli nindi ashakameña haya nyaka heseki nawa yuma yahoshañayi wayishikijaña.—Isaya 55:11.

Indi kufwa akakwinoñesha ñahi? Kufuma tuhu kumashiita, antu akeñaña nawu afumishuhu kufwa ilaña anakañanyi. Nimakonu antu afwilaña nawu afumishuhu kufwa. Asayantisiti anatuñi yitumbu yakuuka nachi yikatu yikwawu. Azatishaña nituyuma twanyanya twatuñaña chifwanisha kufuma muyuma yonaña yashakamaña yaaka yayivulu. Kumaluña amavulu, haavareji, antu anakushakama yaaka yayivulu kubadika mafuku akunyima. Ilaña kufwa kunatwalekuhu. Neyi chochahosha Bayibolu nawu, “wejima wawu akabalumuka cheñi lunkuñu.”—Mukwakutaŋisha 3:20.

Nsañu yayiwahi yidi yakwila nawu bayi tushindamena hadi antu netu akafumishahu kufwaku. Yehova Nzambi waloñesha dehi chakatupulwishayi hela kufumishahu kufwa kuhitila mudi Yesu Kristu.