CHINELI izu dakwila nawu “mukwankunyi nakristu” anadizatishi hampinji yayilehi kutena yuma yayivulu chidi neyi anyuuli nimafilimu, twatela kwihula netu: Mukwankunyi nakristu hinyi? Komana idi izu datukundama ninetu makonu? Mwamweni, muBayibolu dimutwatela kusandujola neyi tunakukeña kwiluka mukwankunyi nakristu, muloña dimwamusonekawu kapampa katanu.

Kapostolu Yowanu diyi nsoneki waBayibolu hohu watena izu dakwila nawu “mukwankunyi nakristu.” Wamulumbulwili ñahi mukwankunyi nakristu? Talenu awa mazu ekala mumukanda windi watachi: “Enu anyana anyanya, mpinji yakukuminina yinashiki dehi, yimwatiyili nawu mukwankunyi naKristu wukwinza; katataka kunamwekani dehi akwankunyi naKristu amavulu, dihu hitunelukili netu mpinji yakukuminina yinashiki dehi. Afumini mukachi ketu, ilaña hiyadiñi ayetuku . . . Ntwambi hinyi? Yowu wadikalaña nindi Yesu hidiyi Kristuku. Yenowu wadikalaña nindi hikwekala Tata naMwanaku, diyi mukwankunyi naKristu.”—1 Yowanu 2:18, 19, 22.

Twadizilaña kwodi kunawa mazu? Yowanu wahosheli nindi “akwankunyi naKristu amavulu” dikwila nawu mukwankunyi nakristu himuntu wumu hohuku, ilaña hizanvu dawantu. Antu hela mazanvu ekala akwankunyi nakristu atandishaña makudi, akanaña nawu Yesu hidiyi Kristu hela Mesiyaku nawa aluwañeshaña wubwambu wekala hakachi kaNzambi naMwanindi Yesu Kristu. Awa antu ekala mukwankunyi nakristu aditenaña nawu hiyaKristu hela añimenu jakristu, ilaña chineli “afumini mukachi ketu” alekeli kulondela yuma yalala yatañishaña Bayibolu. Kubombelahu, idi izanvu dadiña kwoku hampinji yasonekeliyi Yowanu mukanda windi, ‘mumpinji yakukuminina,’ hadaha mumafuku akukumishaku awapostolu.

Yumanyi yikwawu yasonekeliyi Yowanu kutalisha hadi mukwankunyi nakristu? Hampinji yahosheleñayi hadi atuprofwetu akutwamba Yowanu wasoñamishili nindi: ‘Mazu ejima onenewa ahosha nawu Yesu Kristu wenjili mumujimba, diwu akudi Nzambi; nimazu ejima onenewa abulaña kwiteja Yesu, hiyakudi Nzambuku, akudi mukwankunyi naKristu imwatiyili nawu wukwinza, nochu katataka nekali dehi mumpata yamunu mwishina.’ (1 Yowanu 4:2, 3) Kuhiñahu, mumukanda windi wamuchiyedi, Yowanu wahosheli cheñi hanichi chikuma nindi: “Akwakudimbana amavulu anayi nakutambatamba mukachi kawantu, alekaña kwiteja nawu Yesu Kristu wenjili mumujimba. Diyi mukwakudimbana, diyi mukwankunyi naKristu.” (2 Yowanu 7) Mwamweni, Yowanu wamwilukili mukwankunyi nakristu nindi hiyantu nimazanvu ejima atandishaña nsañu yakutwamba hadi Yesu Kristu nintañishilu yindi.

Henohu Yowanu kanda yasoneki nsañu yamukwankunyi nakristu, Yesu Kristu wasoñamishili atumbanji twindi nindi: “Babelenu atuprofwetu akutwamba, enzaña kudenu avwala yitembi yanyikoku, ilaña mukachi hiyatuñwidi atuhuka.” (Matewu 7:15) Kapostolu Pawulu niyena wasoñamishili aKristu amuTesalonika nindi: “Bayi ayidimba kudi muntuku; muloña kusenuka chiña kusambila kwinza, ninowu muntu wanshidi asambila kumumwekesha, yowu mwana kakunoña.”—2 Atesalonika 2:3.

Dichi, mumafuku awapostolu, atuprofwetu akutwamba niakwakudimbulula adiña kwoku, afwilileña kuzeyesha chipompelu chawakwaKristu. Antu ejima atandishaña nsañu yakutwamba hadi Yesu Kristu nintañishilu yindi, ‘hiyakwankunyi nakristu.’ Mazu aPawulu akwila nawu “mwana kakunoña” amwekeshaña chayimonañayi Yehova.

Indi makonu wudi kwoku? Antu nimazanvu ekala akwankunyi nakristu achidi kumudimbulula Kristu nintañishilu yindi. Atandishaña nsañu yakutwamba kulonda antu abuli kumwiluka Tata, Yehova Nzambi niMwanindi Yesu Kristu. Tudi nawunsahu wunateli kutukwasha kwikala ababala nawakwankunyi nakristu. Tushinshikenu yakutalilahu yiyedi.

Hadi yaaka yayivulu, machechi anatandishi ntañishilu yakwila nawu mudi Nzambi wumu mwekala anzambi Asatu, nakuhosha nawu Tata niMwana himuntu wumu hohu. Mukwankunyi nakristu naluwañeshi antu kulonda abuli kumwiluka Yehova Nzambi niYesu Kristu. Iyi ntañishilu yakañeshaña antu akweti nyichima yayiwahi kubula kumwimbujola Yesu Kristu nikukundama kwakwihi naNzambi neyi chashimuna Bayibolu nawu eleña.—1 Akorinda 11:1; Yakoba 4:8.

Machechi aluwañeshaña antu kuhitila mukuyileja nawu azatisheña maBayibolu mwafumishawu ijina daNzambi, Yehova. Azatishaña awa maBayibolu hela chakwila ijina daYehova dekala mapampa 7,000 muNyivuñilu yatachi. Chumanyi chinafumimu? Ichi dinu mukwankunyi nakristu nasweji kuluwañesha antu kulonda abuli kumwiluka Nzambi.

Kwambuka, kwiluka ijina Nzambi, Yehova kunakwashi akwakudifukula amavulu ashinshika kukundama kwakwihi naNzambi. Chumichi, dichamweniyi Richard, wanukaña mpinji yahanjekeliyi nawaYinsahu jaYehova ayedi. Richard walumbulwili nindi, “Anlejeli muBayibolu nawu ijina daNzambi walala diyi Yehova. Nahayamini hakutiya nawu Nzambi wukweti ijina, nsañu yinabula kutiyahu dehi.” Kufuma tuhu yina mpinji, wahimpili chihandilu chindi kulonda yalondeleña yuma yahosha Bayibolu nikumuzañalesha Yehova. “Kwiluka ijina daNzambi kunankwashi kukolesha wubwambu wami nayena.”

Hadi yaaka yayivulu yinahitihu, mukwankunyi nakristu naleñeli antu amavulu kubula kumwiluka Nzambi. Ilaña kudiza Izu daNzambi, Bayibolu, kunatukwashi kwiluka mukwankunyi nakristu nikusubuka kunsañu yindi yakutwamba.—John 17:17.