Komana Nzambi waketeja antu kutwalekahu kuyandisha akwawu nikuyitiyisha woma? Inehi, neyi chitunamoni, Nzambi wakafumishahu makabi ejima kushilahu niantu ayandishaña akwawu. Dichi Nzambi waleñeli antu niiseki nakukeña nindi mwiluki nenu kukuma kudi kwakwihi. Yumanyi yashimunayi kulonda twiluki netu kukuma kudi kwakwihi?

Chakutalilahu: Neyi mudi motoka munakuya kwiluña kumwabula kwiluka, mwatela kutala haintaneti, hamapu ninsañu yikwawu kulonda mwiluki kumunakuya. Chimwatachika kuwana yinjikijilu yidi neyi yimwamona haintaneti hela hamapu mukwiluka nenu keña mushiki kumunakuya. Munjila yoyimu, Nzambi watwinka Izu dindi, dashimunaña yuma yinakumwekana mukaayi. Neyi tumona iyi yuma yinakumwekana, twelukaña chikupu netu tudi mumafuku akukuminina.

Bayibolu yahosha nawu kwakekala nyaka yakala muchihandilu chawantu kushika nikwifuku dakukuma. Munawa mafuku mukamwekana yuma yamboka mboka mukaayi kejima yabula kumonahu dehi antu. Tushinshikenu yuma yantesha yashimunawu Mwizu daNzambi.

1. YUMA YATAMA YINAKUMWEKANA MUKAAYI Wuprofwetu wekala haMatewu kapetulu 24 washimuna yuma yatukwashaña kwiluka netu tudi mumafuku akukuminina. Iyi yinjikijilu yamwekeshaña nawu ‘kukuma’ kudi kwakwihi nawa yikatwalekahu kushika nimpinji ‘yakenza kukuma.’ (Mavasi 3, 14) Yumiyi yinabombelumu njita, nzala, nyitentanshi kweñi nakweñi, kuluwa, nikukeña kwawantu amavulu kwakaya nakukeha nawa akulumpi jansakililu akadimbaña antu. (Mavasi 6-26) Dichi yuma yikwawu yamuchinjikijilu yatachikili dehi kumwekana. Hela chochu, kukuma chikukashika kwakwihi, iyi yuma yikasweja kutaminaku. Kushilahu niniyi yinjikijilu yisatu yinalondeluhu.

2. YILILU YAWANTU Bayibolu yahosha nawu ‘mumafuku akukuminina,’ antu akekala nayililu yatama. Yahosha nawu: “Antu akekala akwakudikeña, akwakufwila mali, akwakudisamba, akwakudinka wanta, akwakutukana; akekala antu abulaña kwovwahila anvwali jawu, abulaña kusakilila, abula kujila, abulaña kukeñañana mwasemwakenawu, oma muchima, akakutuñula akwawu, abulaña kudihemba, asweja kuzuwa, abulaña kukeña yayiwahi, anfukeji, akwakuchinchika, akwakuditohesha, antu akeñaña yakuditiyisha aweni kuwaha, kukeña Nzambi nehi.” (2 Timotewu 3:1-4) Mwalala, yililu yatama yatachikili dehi, ilaña ‘mumafuku akukuminina’ dihu yinaswejeliku kutama nawa iyi mpinji yinashikilumu kuyitena netu “nyaka yakala.” Komana munakumona iyi yililu mudi antu amakonu?

3. ISEKI ANAKUDIKISAÑANA Bayibolu yahosha nawu Nzambi “wakujilumuna akukisañana iseki.” (Chimwekeshu 11:18) Indi antu anakukisañana ñahi iseki? Mumpinji yaNowa antu akisañeni iseki: “Iseki datokeli kumesu aNzambi, iseki dawaninini kwamadombu hohu. Nzambi wamweni iseki dinatoki dehi kwadu.” Dichi Nzambi wahosheli hadi ana antu atama nindi ‘nakayijilumuna.’ (Kutachika 6:11-13) Komana kudihu yuma yimunakumona yinakumwekesha nawu mukaayi munenzali madombu? Kubombelahu antu anasweji kutama chakwila anateli kukisañana iseki kuhitila mukujilumuna antu ejima. Akweti yitwa yashiyashana. Nawa anakukisañana iseki munjila yikwawu. Yuma yakwashaña yileñaleña yonaña yekala hamaseki, chidi neyi mpepela yitonaña, atunyama, nyitondu nituluñalwiji yinakuzata kwesekeja nankeñelu yachu wanyi, muloña anakuyizatisha munjila yatama.

Dihulenu nenu, ‘Hadi yaaka yantesha yinahituhu,  komana antu adiña nañovu yakujilumuna iseki chikupu?’ Ilaña chayinu mpinji akweti ñovu yakwila mwenimu muloña wayozelu yikwetuwu yafwana. Kuyilaku hambidi mujakutuña tuña kunaleteshi antu kutoñojoka nawu anateli kwila yuma yejima yinakeñuwu. Hela chochu, antu hiyakweti ñovu yakufuukula hela kukañesha yuma yikamwekena iseki kumbidiku. Henohu yuma yejima yidi hamaseki kanda ayimanisha kuyikisañana, Nzambi wakajilumuna antu anakukisañana iseki. Ichi dichakanayi Nzambi.

4. MUDIMU WAKUSHIMWINA MUKAAYI KEJIMA Chinjikijilu chikwawu chinakumwekesha nawu kukuma kudi kwakwihi chiyashimwineñahu dehi, chidi chakwila nawu kukekala mudimu weneni wukazatikaña: ‘Ninsañu iyi yawanta yayiwahi akayishimwañena mwahita matuña ejima mwashakamawu antu, kulonda yakayilili nyuza yejima wunsahu; henohu dihu hakenza kukuma.’ (Matewu 24:14) Iwu mudimu wakushimwina wambukaku chikupu namudimu wazatañawu akwansakililu hadi yaaka yayivulu yinahituhu. Mumafuku akukuminina, nsañu yadimena akayikonkomwena, ‘iyi nsañu yayiwahi yawanta.’ Mwelukahu izanvu dansakililu dashimwinaña iyi nsañu? Nawa neyi kudiku antu amakwawu anakushimwina iyi nsañu, hiyantu amwiluña denu, anashimwini iyi nsañu yayiwahi “mwahita matuña ejima mwashakamawu antu, kulonda yakayilili nyuza yejima wunsahu”?

Webu sayiti ya www.pr418.com yashindamena haniyi ‘nsañu yayiwahi yaWanta.’ Haniyi webu sayiti hekala nyikanda yalumbululaña iyi nsañu mumadimi akubadika ha 700. Mwelukahu nsakililu yikwawu yakonkomwenaña iyi nsañu yayiwahi yaWanta mukaayi kejima munjila yamuchidiwu? Henohu kanda kwikali Intaneti, aYinsahu jaYehova ayilukili nawu ashimwinaña nankashi nsañu yayiwahi yaWanta waNzambi. Kutachika mu 1939, hefu dahewulu damagazini yaKaposhi Kakutalila hekalaña mazu akwila nawu “Kanakubidika Wanta waYehova.” Mukanda wahosha hansakililu wahosheli nawu mudimu wakushimwina wazatañawu aYinsahu jaYehova “wunayiluku hambidi chikupu.” Iwu mudimu wakushimwina wunakumwekesha nawu ‘kukuma keña kwinzi’ kuhitila muWanta waNzambi.

Komana munamoni nenu yinjikijilu yiwana yamuBayibolu yakusoñamisha yinashimuniwu muchinu chibaba yinakumwekana? Hadi yaaka yakubadika ha 100 yinahituhu, mumagazini yaKaposhi Kakutalila mwekalaña nsañu yamwekanaña mukaayi yakwashaña antu atañaña iyi  magazini kwiluka nawu kukuma kudi kwakwihi. Hela chochu, antu amakwawu akanaña nakuhosha nawu, iyi nsañu hinsañu jawantu nawa anateli kuyisoneka kwesekeja nachinakukeñawu. Ahoshaña cheñi nawu chineli njila jakuhanjekelamu jinakuvulilaku, dichinaleteshi kaayi kasweji kutama. Hela chikwila ahoshaña mwenimu, kudi wunsahu wawuvulu wunakumwekesha nawu tudi mumpinji yakala mukuhanda kwawantu.

Ankuluñaña amakwawu ahoshaña nawu tunakumona yuma yamboka mboka hanu hamaseki. Chakutalilahu muchaaka cha 2014 izanvu daScience and Security Board dasoñamishili akaUnited Nations Security Council mumagazini yaBulletin of the Atomic Scientists hayuma yatama yinateli kuleta wubanji kudantu. Awa asayantisiti ahosheli nawu: “Kushinshika haniyi yuma yatama yinateli kuleta wubanji hadi antu kunaleteshi twiluki netu yuma yinataminiku chikupu.” Antu amavulu aneluki chikupu nawu tunashiki mumpinji yakala muchihandilu chawantu. Ansoneki aniyi magazini niantañi aneluki chikupu nawu tudi mumafuku akukuminina nawa kukuma kudi kwakwihi. Chatela mwakameña muloña wayuma yikamwekana kumbidi, mwatela kutiya kuwaha. Muloñadi? Muloña munateli kupuluka kukuma chikwakenza.