Yumanyi yimwatoñojokaña neyi mutiya mazu akwila nawu “kukuma kudi kwakwihi?” Komana mwatoñojokaña hadi pasita wunakutañisha muchechi, nakubidika nankashi, nakunyamuna nimakasa mwiwulu nawa wukweti niBayibolu muchikasa? Ntahindi mwatoñojokaña hadi kashinakaji wukweti wevu wawulehi, navwali munkukumba, nakasi nimuya mumbunda nawa nemani kunsa yanjila nakwati nichinjikijilu hakusoneka nawu kukuma kudi kwakwihi? Kutoñojoka yumiyi kunateli kuletesha antu amakwawu kwakama, amakwawu anateli kujinooka hela kuseha.

Bayibolu yahoshaña nawu: ‘Kukuma kwakenza.’ (Matewu 24:14) Iku kukuma akwitenaña cheñi nawu ‘ifuku deneni daNzambi’ nawa “Amagedoni.” (Chimwekeshu 16:14, 16) Nsakililu yayivulu yatañishaña nsañu yamboka kutalisha hakukuma nawa iyi nsañu yaleñelaña antu amavulu kwakama. Hela chochu, Bayibolu yalumbulula chiwahi nsañu yahosha hakukuma, yalumbulula mwatalisha kukuma nimukwabula kutalisha. Izu daNzambi datukwashaña kwiluka nawu kukuma kudi kwakwihi. Bayibolu yatulejaña niyuma yitwatela kwila kulonda tukapuluki. Chatachi, tuhanjekenu nsañu yalala yahosha hakukuma nimukwatalisha. Kwesekeja nachahosha Bayibolu, indi ‘kukuma’ kwatalisha mudihi?

1. HIKWATALISHA MUKWILA NAWU ISEKI AKADIJILUMUNA NAKESIKU.

   Bayibolu yahosha nawu: “[Nzambi] wahatishili iseki hamashina adu, kulonda dibuli kuswila chahaya nyaka.” (Masamu 104:5) Iyi nsona ninsona jikwawu jatukwashaña kwiluka nawu Nzambi wakajilumuna wanyi iseki hela kwiteja nawu adijilumuni haya nyaka.—Mukwakutaŋisha 1:4; Isaya 45:18.

2. HICHUMA CHIKAMWEKANA MUKUKASHIMWISHAKU.

   Bayibolu yahosha nawu Nzambi watoñola dehi mpinji yakenza kukuma. Yashimuna nawu: “Ilaña itañwodu hela mpinji oyu kwosi wayilukaku, chalala hela añelu amwiwulu hela Mwana, chiña Tata. Babalenu, tonenu, lombenu; muloña himuneluki mpinji oyuku.” (Maku 13:32, 33) Chakadi nikujina, Nzambi (“Tata”) watoñola dehi “mpinji oyu” hamba kaletayi kukuma.

3. HIKWATALISHA MWIKWILA NAWU ANTU HELA YUMA YAHOLOKAÑA MULUZWIZU DIYIKALETA KUKUMAKU.

   Yumanyi yikaleñela kukuma kukenzi? Mukanda waChimwekeshu 19:11 wahosha nawu: ‘Hinukumona mwiwulu munenzuluki dehi. Kutala kudi kawalu katooka nimukwakwendelahu, anamuteni nawu, Washinshika, Walala.’ Vasi 19 yabombelahu nawu: “Hinukumona owu kanyama nianyanta ankanu ahanu hamaseki ninjita jawu, anapompi dehi hamu, akadasi njita nayenowu wudi nakwendela hakawalu, ninanjita yindi.” (Chimwekeshu 19:11-21) Hela chakwila iyi nhoshelu yachifwikija, tunateli kukunkulula netu: Nzambi wakatemesha añelu kwinza nakujilumuna ayilumbu jindi.

1. HIKUKUMA KWANFULUMENDI JAWANTU.

   Bayibolu yalumbulula nawu: “Nzambi wamwiwulu wamba kaloñesha wanta wakubula kukisika  haya nyaka, wantowu hiyamba kawushiyila antu acheñuku; wakahumonaña mawantawa ejima puchi puchi, nakuyinoñesha, wakemana mbe haya nyaka.” (Danyeli 2:44) Neyi chinashimuniwu muchikuma chamuchisatu, ‘anyanta ankanu ahanu hamaseki ninjita jawu,’ akayijilumuna hampinji ‘yakadipompeshawu hamu nawu asi njita nayenowu wudi nakwendela hakawalu, ninanjita yindi.’—Chimwekeshu 19:19.

2. HIKUKUMA KWANJITA, MADOMBU NIWUÑANJI WAHEÑA.

   “[Nzambi] wakumishaña majita mwakumina iseki dejima.” (Masamu 46:9) “Akwakwoloka diwu akashakama mwituña, antu alala diwu akashalamu. Hakwila antu atama akayifumisha mwituña antu akwatilaña akwawu makasu akayibwitamu.” (Yishimu 2:21, 22) “Tiya, hinukubalumuna yuma yejima yiikali yayiha.”—Chimwekeshu 21:4, 5.

3. HIKUKUMA KWANSAKILILU YABULAÑA KWOVWAHILA NZAMBI NIKUKWASHA ANTU.

   ‘Atuprofwetu hiyakuprofweta yakutwamba niatupristu hiyakukwatilaku ñovu. . . . Mwakela ñahi neyi kukuma kunenzi?’ (Yeremiya 5:31) “Amavulu amba kañila hefuku odu nawu, Mwanta, Mwanta, hitwaprofweteli mwijina deyuku? Hitwafumishili ademoni mwijina deyuku? Hitwakoñeli nyidimu yañovu yayivulu mwijina deyuku? Henohu nakayakula nami, Hinayilukili hela ifuku nidimuku; fumenu kudami enu mwakoñaña yakuluwa.”—Matewu 7:21-23.

4. HIKUKUMA KWAWANTU ELAÑA YUMA YATAMA KUSHILAHU NIAYIHAKWILAÑAKU.

   Yesu Kristu wahosheli nindi: “Kufwa namuloña kunafumi hakwila chejeji chenjili dehi mumpata yamunu mwishina, ilaña antu hiyakeñeli chejejuku, akeñeli mwidima muloña nyidimu yawu yatama.” (Yowanu 3:19) Bayibolu yahosha hakujilumuka kwamwekeni mukaayi kejima mumafuku aNowa muntu washinshika. Yahosha nawu, ‘Mpata yamunu mwishina yadiñuku yajiminini mumenji, hakwinza mawulu niiseki aduku katataka, anayiswekeli kesi nezu dodimu, anayiswekeli ifuku dakusompesha nikujilumuka kwawantu asekeshaña Nzambi.’—2 Petulu 3:5-7.

Neyi chimunamoni “ifuku dakusompesha nikujilumuka” dinakwinza anadesekeji nakujilumuka ‘kwakaayi’ kwamwekeni mumafuku aNowa. Kaayinyi kajilumwinuwu? Iseki dajilumukili wanyi, ilaña ‘antu asekeshaña Nzambi’ ayilumbu jaNzambi diwu ‘ajilumwinuwu.’ Hampinji yakenza “ifuku dakusompesha,” antu adilishaña kwikala ayilumbu jaNzambi niwena akayijilumuna. Ilaña amabwambu jaNzambi akayipulwisha, neyi chamupulwishiluwu Nowa nichisaka chindi.—Matewu 24:37-42.

Fwikijenu dinu iseki chidakawaha hampinji yakafumishahu Nzambi yuma yejima yatama. Chakadi nikujina, Bayibolu yahosha nsañu yayiwahi kutalisha hakukuma, bayi nsañu yatamaku. Hela chochu, munateli kwihula nenu, Komana Bayibolu yashimuna mpinji yakenza kukuma? ‘Komana kukuma kunashiki dehi kwakwihi? Nateli kwila ñahi kulonda nakapuluki?’