Paul, iyala wukweti anyana ayedi wahosheli nindi, “Chelili mali atachiki kumana ñovu mwituña detu, wuseya wayakuda wakandamineñaku. Twemeneña munyisululu mpinji yeneni, ilaña kakavulu yakudya yamanineña henohu kanda tushiki kwadiña yakuda. Antu akoseli nankashi muloña wanzala, amakwawu adiña nakuhwidijela mumukwakwa. Wuseya watuyuma twanyanya watachikili namamiliyoni, kuhiñahu namabiliyoni. Nkumininaku, mali etuña amanini ñovu nakwikala amukunkulwayi. Akawunti yami yakubanki ninsuwalansi nipeshoni jejima jaluwankeni.”

Paul welukili nindi, hakwila chisaka chindi chihandi, wateleli ‘kutoñojoka nakashinshi.’ (Yishimu. 3:21) Walumbulwili nindi, “Nadiña kontalakita wamalayiti, ilaña natachikili kuzata tunyidimu twejima tunawanineña hela chakwila wufwetu wadiñileña wantesha.” Watwalekeluhu nindi, “Antu amakwawu anfweteleña yakudya hela yuma yakwitala. Neyi anyinka nyifuku yamasopu yiwana, nazatishileñahu yiyedi iyi yinashali nalandishileña. Kuhiñahu, nalandili tunyana katusumbi 40. Chitwakulili, natulandishili nakulandamu nyana katusumbi 300. Nkumininaku, nahimpili tusumbi 50 nanyifuku yawuña 50. Muniyi nyifuku, nahembelelumu chisaka chami niyisaka yayivulu yawakwetu hampinji yayilehi.”

Paul welukili cheñi nindi chuma chalema chatela kwilukayi muntu hikumukuhwelela Nzambi. Nzambi wukutukwasha neyi tukutwalekahu nakwila mwatulejañayi. Yesu wahosheli hansañu yakufwila yuma yitwakaankilaña nindi, ‘Lekenu kwakama, . . . muloña Tata yenu weluka chimunakankili yumiyi.’—Luka 12:29-31.

Chawushona, Satana chilumbu muneni waNzambi, wadimbaña antu amavulu mukaayi kulonda ashindameni chikupu hayuma yakumujimba. Antu akamaña nankashi hayuma yafwilañawu, yamwekanaña niyafwikijañawu nawa afwilaña kwikala nayuma yinakubula  kukeñeka hanoyu mpinji. Amavulu adiñijaña munyikudi nawa avulamenaña mazu akwila nawu, “mukwakusondama hinduñu yamukwakusondamisha.”—Yishimu 22:7.

Antu amakwawu afuukulaña mwaluwa nankashi. Paul washimwini nindi: “Antu amavulu itwadikumashanini nawu ashili yisaka niamabwambu jawu nakuya kumatuña acheñi nakukeña ‘maheta.’ Amakwawu ayili chakadi yipapilu yalumbwa yakwiñila nachu mwituña dacheñi, akañenyi kuwana nyidimu. Atachikili kuswamujoka akapokola nikukamujoka munyikwakwa. Hiyashili maana hawukwashu waNzambuku. Ilaña etu twafuukwili kukabakena hamu neyi chisaka munsañu jamali, netu Nzambi wukutukwasha.”

Paul watwalekeluhu kuhosha nindi: “Yesu nindi, ‘Bayi mwakama ifuku dakumadikuku, muloña ifuku dakumadiki dikudakama dadeni. Kutama kwefuku dimu kunawanini.’ Kulomba kwami kunalombeleña mpinji yejima kwadiña kwakwila nawu, Nzambi ‘yatwinki kuda kwetu kwefuku dalelu’ kulonda tutwalekuhu kuhanda. Nawa watukwashileña neyi chochashiikiliyi Yesu. Mpinji yejima hitwekalileña nayuma yitwakeñeleña nankashuku. Nemeneña mumusululu kulonda nilandi yakuda chakadi kwiluka yakuda yalandishileñawu. Hampinji yinashikileña kumbidi nadiña nakuwana kudi hohu yogati. Yogati nayiheleli. Ilaña hiyakuda nawa diyi twadili. Namusakililaña Nzambi muloña hayina mpinji, chisaka chami hichakaminena nanzalaku.” *

“Chayinu mpinji yuma yinatupeleli. Tunadizi netu chuma chalema chinateli kumanisha kwakama hikukuhwelela mudi Nzambi. Yehova * wukutukwashaña neyi tutwalekahu kwila nkeñelu yindi. Tunamoni kushikijewa kwaMasamu 34:8 yahosha nawu: ‘Tompenu mutiyi chawahayi Yehova; muntu wabatamaña mudi yena nakooleki.’ Chuma chinafumumu, hitunakutiya cheñi woma wakumona kukala kwamali hela yuma yikwawuku.

“Ichi dinu tuneluki chikupu netu antu hiyanateli kuhanda namali hela mudimuku, ilaña chiña nayakuda hohu. Tunakutalila chikupu mpinji yakashikijewa chikaninu chaNzambi chakwila nawu: ‘Kwakekala yakuda yayivulu hamaseki.’ Chayinu mpinji, ‘neyi tukweti yakuda niyakuvwala, tukuzañalala nayumiyi.’ Twakoleshewaña namazu amuBayibolu akwila nawu: ‘Ikalenu nanyichima yakadi kufwila mali; toñojokenu yuma yimudi nayu nenu yinawanini dehi; muloña yomweni nahoshi nindi, “Hinamba kakulekaku, hela kukushiya hinakakushiyaku.” Dichi twahoshaña chakadi woma netu, “Yehova diyi nkwashi yami, hinutiya womaku.”’” *

Twatela kwikala nachikuhwelelu chakola neyi chadiñi naPaul nichisaka chindi hakwila ‘twendi naNzambi.’ (Kutachika 6:9) Hela tudi muwuzweñi wamali chayinu mpinji hela twakekala nawu kumbidi, tunadiziluku chikupu kuchikuhwelelu chadiña naPaul nichatoñojokeleñayi.

Hanu tunateli kwiladi neyi tunakwakama muloña wakukala kwamuchisaka?