Nakulila kuLos Angeles, California, muU.S.A., munyikala yashiyashana mwekala anyana atama anwaña yitumbu yashetana munyikwakwa. Anvwali jami adiña nawanyana 6, yami nadiña wamuchiyedi.

Twakulilili muchechi yaevanjeliko mwayileñawu amama. Hela chochu, hinadiña kampululu, nelileña yuma yatama. Hamulungu nayileña nakwimba kwaya muchechi. Mukachi kamulungu nahemeneña yisela, kunwa yitumbu yashetana nikwila wuvumbi.

Nakeñeli madombu nankashi. Nazatishileña chuma chidi chejima kulonda netani nachu. Yuma yinadizileña kuchechi yankwashileña wanyi. Nahosheleña nami “Kutenda kwambala kwaMwanta nawa yami anakuzatishayi.” Hampinji yinadiña hashikola yeneni muma 1960, anluwañesheli kudi izanvu dapolitiki delukiluwu muloña wanyidimu yawu yakufwila kukwasha antu kwikala nawuswa dateneneñawu nawu Black Panthers. Nadiñijili muyunyoni yawatudizi. Kakavulu twaleteleña mapumba nawa twenzeleña mashikola hakapinji kantesha.

Chamwekeni neyi mapumba amanishileña wanyi ndulu yami. Natachikili kuhela antu. Chakutalilahu, mpinji jikwawu twatalileña nawamabwambu jami mafilimu awanduñu amuAfrica chayiyandishileñawu muUnited States. Chumichi chatuneñesheleña nankashi nawa tweteleña anyana kawanyitooka adiña mwitala dakutalila mafilimu. Kuhiñahu, twayileña kumatala awanyitooka kulonda tuyeti.

Henohu kanda nishikiji yaaka 20, ami niamanakwami twakoñeli nyiloña yamaneni nankashi. Atwimakeneni chikupu kudi atupokola. Mwanyikami wumu wadiña hakachi kawambanji nawa ninami nadikundileña nawu. Chihandilu chami chataminineñaku hohu.

Anvwali jebwambu dami wumu adiña aYinsahu jaYehova. Antambikili kuya nakupompa nawu nawa netejeli. Hadodina ifuku, namweni nami aYinsahu ambuka chikupu nawantu amakwawu. Wejima wawu adiña namaBayibolu hakupompa. Atwansi niwena ahanineña jimpanji. Natiyili kuwaha chinatiyili nawu Nzambi wukweti ijina, daYehova, nichadizatishileñawu. (Masamu 83:18) Muchipompelu mwadiña antu afuma kumatuña acheñi, ilaña mwadiña chaambu chekowa wanyi.

 Hakusambila, hinakeñeleña kudiza Bayibolu nawaYinsahuku, ilaña natiyileña kuwaha kuya nakupompa. Ifuku dimu, hinayili nakupompa nawaYinsahu, amabwambu jami ayili kwembileñawu tumina. Kwayiluwu, eteli kansi wumu nakumujaha muloña wakaanini kuyinka jeketi yindi. Chikwachili, atachikili kuditiya nawu anajahi muntu. Atachikili kusekesha iwu muloña hayisompesheleñawu muchota. Amavulu ayikasili nawu akafwila mukaleya. Kuhosha hohu chalala, natiyili kuwaha muloña nadiña nawu wanyi hanidi ifuku. Nafuukwili nami nukuhimpa chihandilu chami nawa natachikili kudiza Bayibolu.

Chineli nadiña nachililu chakumwekesha chaambu chekowa, yililu yinamweni mudi aYinsahu yanhayamishili. Chakutalilahu, chelili Chinsahu wumu wamutooka hakuya kwituña dacheñi, washileña anyanindi kudi muntu wiyila. Cheñi, mutooka wumu wahembeleña kansi wumu wiyila wakeñeleña kwakushakama. Nelukili nami mazu ekala haYowanu 13:35 akwila nawu: “Neyi mukukeñañana, dihu hakayilukilawu antu ejima nawu mudi atumbanji twami” ayitelela aYinsahu jaYehova. Nelukili nami nawani amanakwami alala.

Mukudiza Bayibolu, natachikili kutoñojoka nami natela kuhimpa yitoñojoka yami. Nahimpili yitoñojoka yami kulonda nikali wawunda nikwiluka nami iyi diyi njila yayiwahi yinatela kuhandilamu. (Aroma 12:2) Mukuhita kwampinji, natachikili kuyilaku hambidi. MuJanuary 1974 napapatisheweli nakwikala Chinsahu chaYehova.

Chinapapatisheweli, natwalekeluhu kuhimpa chililu chami chakukuma kumuchima. Chakutalilahu, hampinji yinashimwinineña kwitala nikwitala, nahañili ikombi wanoneli wayilesi mumotoka yami. Chinelili nami nimukwati, waholweli wayilesi nawa watemukili. Chinayilejeli akwetu mutwashimwinineña chinatambula wayilesi yami, eluda wadiña hezanvu wañihwili nindi, “Stephen, neyi wamukwata wadi kumwila ñahi?” Ilu lwihu lwankwashili kutoñojoka nami natela kuhimpa yililu yami kulonda nikali wawunda.

MuOctober 1974 natachikili mudimu wampinji yejima, nazatileña maora 100 mukakweji nikudizisha antu Bayibolu. Kuhiñahu, nadiña nakukooleka kwakuzataku mudimu wakudikeñela hakasanji kamutayi keneni kawaYinsahu jaYehova muBrooklyn, New York. Mu 1978, nafuntili kuLos Angeles nakuhemba amama akatileña. Chimwahitili yaaka yiyedi, nasumbwili ñodami, Aarhonda. Wankwashileña nankashi kuhemba aMama kushika nimpinji yafwiliwu. Chimwahitili yaaka, ami niAarhonda twayili kushikola yaWatchtower Bible School of Gilead nawa atutumini kuPanama, kutunakuzatila wumishonali.

Kufuma hinapapatisheweli, namoni yuma yayivulu yaleteshaña kutoñojoka jamadombu. Neluki kushinda kweseka kwamuchidiwu, chidi neyi kufuma hadi antu anakunvuloka hela kushinda kweseka kwamuchidiwu munjila yikwawu. Antu amavulu kushilahu niñodami anhamekaña chinashindaña kukala kwamuchidiwu. Ninami aweni nahayamaña chikupu. Hinatela kudihameka hayuma yinahimpiki muchihandilu chamuku. Ilaña, neluka nami hiyuma yinakumwekesha nawu Bayibolu yikweti ñovu yakuhimpa chihandilu chamuntu.—Aheberu 4:12.

Bayibolu yinankwashi kwikala nachihandilu chikweti nkeñelu nikwikala wawunda chikupu. Chayinu mpinji netaña antu wanyi, ilaña nayikwashaña kwikala nawubwambu wawuwahi naNzambi. Nadizishahu dehi muntu Bayibolu wadiña chilumbu chami hampinji yinadiñi kushikola. Chamupapatishiluwu, nakamineña nindi mukapeka kamu. Chayinu mpinji hibwambu dami chikupu. Ami niñodami tunakwashi antu 80 kwikala aYinsahu jaYehova kuhitila mukudiza nawu Bayibolu.

Nidi namuzañalu weneni muloña Yehova nanyinki chihandilu chachiwahi nikwikala hamukanka wawamanakwetu ashinshika.