MUTU WUDI HEFU DATACHI | CHITUNATELI KUUMIKA NAYUMA YATWAKAMESHAÑA
Antu Ejima Anakwakamena.
“Nayili nakulanda yakuda ilaña nawani hohu mabisketi niwena anakandami wuseya mapampa 10,000. Chikwachili, yakuda yamanini mumasitolu.”—Paul, Zimbabwe.
“Nfumwami wantambikili nakunleja nindi nakufuma hetala. Nukuumika ñahi nachuma chinañiliyi? Anyanami akuya kudihi?”—Janet, United States.
“Alamu chiyadila, nayaña lufuchi nakuswama nikukama hamaseki neyi nyitenda nzumbu yinakulendoka. Hela munahiti maora amavulu nashalaña nakuzala kumakasa.”—Alona, Israel.
Tunakushakama mumpinji yinakwakamawu antu, “nyaka yakala.” (2 Timotewu 3:1) Amavulu adi nakukala kwamali, kubula kutiyañana muchisaka, njita nawa anakutiya woma wanyisoñu yafwana niwubanji wadimwekanaña niwakojejañawu antu. Kwekala cheñi kudakamena: ‘Aka kachitumbu tumbu kakabalumuka nakwikala kansa?’ ‘Ezukulwami akashakamaña mwituña damuchidinyi?’
Kwakama kwejima hikwatamaku. Etu amavulu twatiyaña woma henohu kanda tusoneki kweseka hela kutwihujola hakukeña mudimu. Kwikala nawoma kwatukwashaña kubula kuholokela muwubanji. Ilaña kusweja woma kwafwana. Mukusandujola kwakuvulu kwakatataka mwadiña akulumpi akubadika ha 68,000 kwamwekesheli nawu niantu abulaña kwakama nankashi afwaña swayi. Dihafumini Yesu hakwihula nindi: “Mwinenwinyi wukwila akame-e anuña kuchiminu chindi chikunku?” Mwamweni kwakama hikunateli kunuñilaku muntu mafukuku. Dichi Yesu nindi: ‘Lekenu kwakama.’ (Matewu 6:25, 27) Chumanyi chikutukwasha kubula kwakama?
Ñakwilu yinashindameni hakuzatisha maana anateli kutukwasha kumukuhwelela Nzambi chikupu nikuchiñeja chikupu yuma yakumbidi. Hela chakwila hitunakumona yihuñu yamaneni chayinu mpinjuku, kumbidi twakayimona. Tutalenu iji njila chijakwashili Paul, Janet niAlona kuumika yuma yakamineñawu.
