MUTU WUDI HEFU DATACHI | A YINSAHU JAYEHOVA HIYANYI?
A Yinsahu jaYehova Hiyantu Amuchidinyi?
Tuyantu anuñañana mukaayi kejima nawa hitwadibombaña namazanvu ansakililu yikwawuku. Hela chakwila kasanji ketu keneni kekala kuUnited States, ilaña aYinsahu jaYehova amavulu ashakamaña mumatuña amboka-mboka. Etu aYinsahu jaYehova 8 miliyoni twadizishaña antu Bayibolu mumatuña akubadika ha 230. Twadizishaña kwesekeja namazu aYesu akwila nawu: ‘Ninsañu iyi yaWanta yayiwahi akayishimwañena mwahita matuña ejima mwashakamawu antu, kulonda yakayilili nyunza yejima wunsahu.’—Matewu 24:14.
Hichikweti muloña nakutwashakamañaku, ilaña twovwahilaña nshimbi kwesekeja nachinleji chetu. Ilaña, hitwadiñijaña munsañu yamatuña nachiyuuluku. Muloña twalondelaña kufumba kwaYesu kwakwila nawu akwaKristu “hiyampata yamunu mwishinaku.” Dichi hitwadiñijaña munsañu yamatuña nachiyuulu niyuma yikwawu hela majitaku. (Yowanu 15:19; 17:16) MuNjita yaKaayi yamuchiyedi, aYinsahu jaYehova ayikasili, ayikabishili nikuyijaha muloña wakubula kudiñija munsañu jamatuña nachiyuulu. Wadiña bishop muGerman wasonekeli nindi: “Diwu anateli kuhosha chikupu nawu adiñijaña wanyi munsañu jamatuña muThird Reich.”
“[A Yinsahu jaYehova] akweti yililu yayiwahi chikupu. Tunateli kuzatisha antu amuchidiwu akweti yililu yayiwahi munsañu yamatuña nachiyuulu, ilaña hiyadiñijaña munsañu jamuchidiwuku. . . . Alemeshaña nshimbi janfulumendi, ilaña akuhwelela nawu Wanta waNzambi hohu diwu wakamanisha makabi awantu ejima.”—Nová Svoboda newspaper, Czech Republic.
Hela chochu, hitwadambulaña nawakwetuku. Yesu wayilombeleluku atumbanji twindi kudi Nzambi nindi: “Hinalombi nami wuyifumishi mumpata yamunu mwishinaku.” (Yowanu. 17:15) Mwatumonaña tunakuya nakuzata, nakulandalanda nikuya kumashikola kwayañawu antu ejima.
