MUTU WUDI HEFU DATACHI | A YINSAHU JAYEHOVA HIYANYI?
Yumanyi Yakuhwelelawu aYinsahu jaYehova?
A Yinsahu jaYehova akuhwelela nawu, ‘Nyikanda yajila yejima ayonena dehi kudi Nzambi nawa yayiwahi.’ (2 Timotewu. 3:16) Twazatishaña Bayibolu kulonda tumwiluki Nleñi nikwikala nachihandilu chachiwahi.
Bayibolu yahoshaña nawu: “Kulonda akeluki nawu yeyi hohu, yeyi wukweti ijina deyi daYehova, yeyi Mukwakubadika Kwiwulu deseki dejima.” (Masamu 83:18) Chineli tudi aYinsahu jindi, twadifukulaña kudi Yehova Nzambi hohu, nawa twafwilaña kutiyakesha ijina dindi.—Isaya 43:10-12.
Chineli tudi akwaKristu, twakuhwelela netu Yesu, “Mwana kaNzambi,” * wenjili heseki nawa wekalili Mesiya. (Yowanu 1:34, 41; 4:25, 26) Chelili nafwi dehi, Yesu amusañwili nawa wayili mwiwulu. (1 Akorinda 15:3, 4) Kuhiñahu, wekalili Mwanta waWanta waNzambi. (Chimwekeshu 11:15) Iwu Wanta hinfulumendi yayeni yikaleta Paradisa hamaseki. (Danyeli 2:44) Bayibolu yahoshaña nawu, “Akwakudizoza akaswana ituña, akatiya kuwaha nankashi nakushakama chachiwahi chamwena.”—Masamu 37:11, 29.
“Chatañawu muBayibolu, atiyaña neyi Nzambi nakuhosha nawena. Neyi amona kukala, atañaña Mwizu daNzambi nakusandujola kulonda eluki chakukumanisha. . . . Eluka nawu Izu daNzambi dadumi.”—Catholic clergyman Benjamin Cherayath, Münsterländische Volkszeitung newspaper, Germany
A Yinsahu jaYehova akuhwelela nawu nshimbi jamuBayibolu jakwashaña antu nimakonu. (Isaya 48:17, 18) Dichi, twovwahilaña iji nshimbi. Chakutalilahu, Bayibolu yatulejaña kubula kwila yuma yinateli kutamisha yitoñojoka ninyijimba yetu, dichi hitwanwaña makanya hela kuzatisha yitumbu yashetanaku. (2 Akorinda 7:1) Twatondolwelaña cheñi yuma yikwawu yakaanishawu muBayibolu yidi neyi kusheta walwa, kwila wuvumbi nikwiya.—1 Akorinda 6:9-11.
^ par. 5 Bayibolu yamushimuna cheñi nawu Yesu diyi, “Mwana kaNzambi wumu hohu” muloña diyi watachi kuleña kudi Yehova yomweni.—Yowanu 3:18; Akolose 1:13-15.
You May Also Like
NTAÑISHILU YALEMA YAMUBAYIBOLU
Komana Nzambi Wukweti Ijina?
Nzambi wukweti nkumbu jajivulu: Wabadika Ñovu, Nleñi niMwanta. Ilaña ijina daNzambi adizatisha mapampa 7,000 muBayibolu.
