Amabwambu ahanjekaña mpinji yejima, hakwila wubwambu wawu wukoli. Munjila yoyimu, Nzambi nakukeña nindi tuhanjekeña nindi hakwila twikali nawubwambu wakola nayena. Wahoshaña nindi: “Mwamba kantambika, mwamba kaya nakulomba kudami, ninami namba kayitiyilila.” (Yeremiya 29:12) Neyi mukuhanjekaña naNzambi, “mukukundama kwakwihi [nayena], niyena wukukundama kwakwihi nanenu.” (Yakoba 4:8) Bayibolu yatulejaña nawu: “Yehova wudi kwakwihi nawantu ejima akumutambika.” (Masamu 145:18) Neyi tukulombaña mpinji yejima kudi yena, wubwambu wetu wukukola chikupu.

Yesu wahosheli nindi: ‘Hinyi welaña neyi mwanindi weyala namulombi dinkendi, yena yamwinka ilola? Hela namulombi inshi, yamwinka kapela? Dichi neyi enu . . . mweluka kwinka anyanenu yamukunkulu yayiwahi, Tata yenu wudi mwiwulu abuli kubadika kuyinka akumulomba yuma yayiwahi!’ (Matewu 7:9-11) Nzambi nakuyileja nindi lombenuña muloña “yena wayihembaña” nawa nakukeña kuyikwasha. (1 Petulu 5:7) Cheñi nakukeña nindi mumulejeña kukala kwenu. Bayibolu yatulejaña nawu: “Bayi mwakama chumaku; ilaña mulejenu Nzambi yuma yejima yimunakeñi nakulomba, nakulembelela, nakusakilila.”—Afwilipi 4:6.

Antu eluka chahandañawu antu, ashimuna nawu antu amavulu akeñaña kulomba. Antu akaanaña nawu hikwekala Nzambuku niantu asekeshaña Nzambi niwena alombaña. * Chumichi chinakumwekesha nawu antu ayileñeli nampwila yakukeña yuma yakuspiritu. Yesu wahosheli nindi: “Atuzweñi muspiritu anakooleki.” (Matewu 5:3) Njila yimu mutunateli kumanishila iyi mpwila hikuhanjeka mpinji yejima naNzambi.

Neyi tukulombaña kudi Nzambi neyi chakeñañayi, kuwahanyi kukafumamu?