Muloñadi Antu Chalombelañawu?
“Nahemeneña yisela yalwisu nankashi. Nakeñeleña kuwina mali amavulu. Ilaña chazatikili wanyi.”
—Samuel, * wakuKenya.
“Kushikola twadizili kuhembela kumutu kulomba kwatudizishiluwu.”
—Teresa, wakuPhilippines.
“Nalombaña neyi nidi mukukala. Nalombaña nami añanakeni nshidi jami kulonda nikali mukwaKristu wamuwahi.”
—Magdalene, wakuGhana.
Mazu anashimunuwu aSamuel, Teresa niMagdalene anamwekeshi nawu antu alombaña yuma yamboka-mboka, amakwawu alombaña yuma yalala. Antu amakwawu alombaña chakufuma hamuchima; amakwawu nehi. Hela chakwila alombaña nawu ahiti kweseka kushikola hela kulombelelaku izanvu dayisela nawu dichombeshi akwawu, kulombelaku chisaka chawu kudi Nzambi hela yuma yikwawu, yumiyi yinakumwekesha nawu antu amavulu ekala nampwila yakulomba. Akwakusandujola awana nawu niantu abulaña kuya kumachechi niwena alombaña mpinji yejima.
Mwalombaña? Neyi mwalombaña, yumanyi yimwalombaña? Hela mwalombaña hela nehi, munateli kudihula nenu: ‘Komana mukulomba mwafumaña yuma yayiwahi? Kuduhu muntu watiyaña?’ Nsoneki wumu wahosheli nindi kulomba “hinjila yakuukilamu . . . .” Akwayipatela niwena dichahoshañawu nawu, kulomba hinjila “yikwawu yakuukilamu.” Komana antu alombaña, alombaña hohu neyi hichaaku hela kutiya kuwaha, indi kwiji nawu hinjila yakuyuukilamu neyi anakulomba?
Kwambukaku, Bayibolu yatulejaña nawu kulomba bayi neyi hinjila yakuukilamu hohuku. Yatulejaña nawu kudi muntu watiyaña neyi tunakulomba munjila yayiwahi nawa neyi tunakulomba chuma chashikilamu. Komana dimu? Tushinshikenu hayuma yatuleñelaña kukuhwelela.
^ par. 2 Majina amakwawu anayihimpi.
