“MULOÑADI AMI HOHU? Muloñadi Nzambi chetejelayi yumiyi kummwekena?” Awa diwu malwihu adihwileñayi Sidnei wayaaka 24-wamuBrazil. Hanyima yakwikala mumaposu ahamenji, wendeleleña hohu mukakinga kawayifwayi.

Makabi afumaña mumaposu, yikatu, kufwisha muntu imwakeña, wubanji wadimwekenaña hela njita, yumiyi yaleñelaña antu kumutwika Nzambi nyiloña. Yumiyi yakuyambaku. Nkakulula Yoba wakushankulu, wamweni yihuñu mukulondashana. Mukubula kwiluka wamutwikili Nzambi nyiloña, nakuhosha nindi: “Nakubilelaña, eyi kuñakula nehi; nemanaña, eyi kuntala nehi. Nakumoni dehi komana wunkatu hohu kweyi; hiwukunkabisha nañovu yakuchikasa cheyi.”—Yoba 30:20, 21.

Yoba helukili kwafumineña yihuñu yindi hela chuma chaleñeleli yamoneña yihuñu hela waleteli yihuñuku. Kukooleka, Bayibolu yatulejaña chuma chacheni chaleñeleli yumiyi yimwekani nichitunateli kwila neyi tumona yuma yamuchidiwu.

Bayibolu yatulejaña hadi Nzambi nawu: “Mudimu windi walala chikupu; muloña mwatwalañayi mwejima mwawuñaji hohu; hiNzambi wakashinshi wakadi ninaha haheñelayi, waloña zwa, woloka.” (Kuhituluka 32:4) Kwesekeja nachinashimunuwu, komana chalala Nzambi “waloña zwa nawa woloka” nateli kwiteja nindi antu akabakaneña hela kuzatisha chuma chidi chejima kulonda yayibabeshi nachu hela kuyitookesha nachu?

Kwambukaku, Bayibolu yatulejaña nawu: “Muntu anesekuwu, bayi ela nindi, Anañeseki kudi Nzambuku; muloña Nzambi hiyamwesekaña nayuma yatamaku, hela yena yomweni hesekaña muntuku.” (Yakoba 1:13) Twatañaña muBayibolu nawu Nzambi wayinkeli antu chihandilu chachiwahi. Wayinkeli antu atachi, Adama naEva mukala wawuwahi niyuma yonsu yakeñeleñawu nimudimu wawuwahi wakuzata. Nzambi wayilejeli nindi: “Semununenu, muvuleña, muwanini heseki, mudovwahishi.” Adama naEva hiyateleleli kumutwika Nzambi nyiloñaku.—Kutachika 1:28.

Ilaña nshakaminu yamakonu yinambuki chikupu nachiyadiña hakusambila. Kufuma tuhu kunyima, antu adi muyihuñu chikupu. Iyi nsañu yinashimunuwu yalala muloña: “Kuleña kwejima kwaabaña nakufunyisha hamu, nikulelu.” (Aroma 8:22) Chumanyi chaleñeleleli?

Hakwila twiluki chakabakenañawu antu, twatela kwiluka yuma yamwekeni kunyima kulonda twiluki chatachikiluwu. Kañelu wadikañili, watenañawu nawu Satana Diyabolu, wayidimbili aAdama naEva kulonda akaani nshimbi yaNzambi yayinkeluwu yakwiluka nachu yayiwahi niyatama kwesekeja nachayilejeluwu nawu bayi adya ‘mutondu wakwiluka nachu niyayiwahi niyatamaku.’ Diyabolu wamulejeli Eva nindi hiyakafwaku neyi adikaña naNzambi, dikwila nawu wamwinkeleña Nzambi muloña wakutwamba. Satana cheñi wamutwikili Nzambi muloña wakubula kuyinka antu wuswa wakufuukula yayiwahi niyatama. (Kutachika 2:17; 3:1-6) Satana wamwekesheli nindi antu anateli kudishakamina chakadi kuyiyuula kudi Nzambi. Yuma yejimiyi yaleñelaña tutachiki kudihula lwihu lwalema nawu, komana Nzambi washikilamu kuyuula?

Satana wayitwikili cheñi antu muloña wukwawu. Wayitwikili antu muloña nindi hiyamukalakelaña Nzambi chamukunkulwayuku. Kutalisha hadi Yoba washinshika, Diyabolu wamulejeli Nzambi nindi: “Hiwunamukolekeli niyena, niitala dindi, niyuma yindi yejima ikoli kwi-ndo mbadi jejimaku? . . . Ololaku ntahi chikasa cheyi katataka wukwati hayuma yindi yejima, wutali neyi wukubula kukuhosha chatama kumesu eyi.” (Yoba 1:10, 11) Hela chakwila Satana wahosheleña hadi Yoba, ilaña awa mazu akundama kudi antu ejima nawu hiyamukalakelaña Nzambi chamukunkulwayuku.

Njilanyi yayiwahi yateleleli Nzambi kumanishilamu iku kukala kweneni? Nzambi wukweti maana abadika, wadiña nanjila yayiwahi yakumanishilamu iku kukala, njila yadi kutuleñela tubuleña kumutwika nyiloña. (Aroma 11:33) Wayitejeli antu kudiyuula awenawu  hakapinji kanti kulonda amoni chiyuulu chanyi chashikilamu kuyuula antu chiwahi.

Yihuñu yinakumonawu antu makonu yinakumwekesha nawu chiyuulu chawantu chinakañanyi kuyuula chikupu. Bayi neyi nfulumendi yamukaayi yinakañanyi hohu kuleta kuwunda, kukiñewa nikubula muzañaluku, ilaña yinakisañani cheñi iseki chikupu. Yumiyi yinakumwekesha chikupu nsañu yalala yamuBayibolu yakwila nawu: “Mudi muntu wendaña himwekala yakuyula nyendu yinduku.” (Yeremiya 10:23) Chiyuulu chaNzambi hohu dichinateli kuleta kuwunda kwahaya nyaka, muzañalu nichihandilu chachiwahi kudi antu, muloña diyi nkeñelu yaNzambi.—Isaya 45:18.

Indi Nzambi wakashikija ñahi nkeñelu yindi kudi antu? Anukenu mazu ayilejeliyi Yesu atumbanji twindi nindi lombenuña nenu: “Wanta weyi winzi. Muchima weyi awili hamaseki neyi chawilañawu mwiwulu.” (Matewu 6:10) Eñañi, Nzambi hampinji yindi yatoñolayi kuhitila muWanta windi, wakafumishahu makabi ejima. (Danyeli 2:44) Wuzweñi, nyisoñu nikufwa akayifumishahu. Kutalisha kudi atuzweñi, Bayibolu yashimuna nawu Nzambi “wakamupulwisha wabula yuma hakadilayi.” (Masamu 72:12-14) Kutalisha kudi akata, Bayibolu yatukana nawu: “Mwenimbu hakahosha nindi, Ami nakataku.” (Isaya 33:24) Chochimu nikudi antu anakami mumajamu achanukishu, Yesu wahosheli nindi: “Mpinji yakenza henohu antu ejima adi mumajamu akatiya izu dindi; akedikamu.” (Yowanu 5:28, 29) Iyi yikaninu yatuzañaleshaña chikupu.

Sidnei wudi nayaaka 17 itwashimuna kumatachikilu achinu chibaaba wadiña mumaposu, wahosheli nindi: “Hinamutwikili Yehova Nzambi nyiloña namaposu inamwenuku, ilaña natela kwiteja nami hatachi namutwikileña nyiloña. Mpinji jikwawu naneñaña chikupu nawa nadilaña neyi nitoñojoka hawufwayi wami. Hela chochu, kuhitila mukutaña Bayibolu, neluki nami Nzambi hidiyi wambabesheli nanawa maposuku. Chochahosha Bayibolu nawu, ‘mpinji nakululakana chatululakenaña tuhu wejima wetu.’ Kulomba mpinji yejima kudi Yehova nikutaña nyikanda yekala namazu akukundeja, yinankwashi kwikala wakola kuspiritu nakutwalekahu.”—Mukwakutaŋisha 9:11; Masamu 145:18; 2 Akorinda 4:8, 9, 16.

Neyi twiluka muloña waweni Nzambi chetejelayi makabi nichitwakabakenaña, chikutukwasha kubula kumutwika Nzambi nyiloña neyi tunamoni makabi. Tweluka chikupu netu Nzambi ‘wasomwenaña antu amukeñakeñaña.’ Muntu wukumukuhwelela Yena niMwanindi hiyakamutiyisha nsonyuku.—Aheberu 11:6; Aroma 10:11.