Kuduhu Muntu Watiyaña Neyi Munakulomba?
Antu amakwawu atoñojokaña nawu kulomba hikumba hohu mpinji, muloña kwosi watiyaña neyi anakulomba. Amakwawu alombaña, ilaña atoñojokaña nawu kwosi wakulaña kulomba kwawu. Muntu wumu wakaanaña nindi hikwekala Nzambuku, wamufwikijili Nzambi chekalayi nakulomba nindi: “Kuminaku dakunshawutilaku chantesha.” Wahosheli nindi Nzambi watwalekeluhu “kumwena.”
Ilaña, Bayibolu yatulejaña nawu Nzambi wekala kwoku nawa watiyaña neyi antu anakulomba. MuBayibolu mwekala awa mazu alejeluwu antu akunyaka nawu: “Chiwakakaluka muteti [Nzambi] wakakutiyila luwi; chakatiyayi, wakakwakula.” (Isaya 30:19) Vasi yikwawu yamuBayibolu yahosha nawu: “Ilaña Yena watiyaña kuwaha nakulomba kwalombañawu akwakwoloka.”—Yishimu 15:8.
Yesu walombeli kudi Tata yindi, ‘nawa amutiyili.’—Aheberu 5:7
Bayibolu yashimuna cheñi antu akwiluwu kulomba kwawu kudi Nzambi. Vasi yimu yahosha nawu Yesu walombeli ‘nikulembelela . . . kudi Muntu watwesheli kumupulwisha’ nawa “amutiyili.” (Aheberu 5:7) Yakutalilahu yikwawu yekala haDanyeli 9:21 niha 2 Kushindulula 7:1.
Muloñadi antu amakwawu chatoñojokelañawu nawu kulomba kwawu akwakulaña wanyi? Hakwila nawu kulomba kwetu akutiyi, twatela kulomba hohu kudi Nzambi yomweni Bayibolu, Yehova, * bayi kulomba kudi nzambi wacheñi hela kudi ankakululaku. Nzambi wakeñaña cheñi nindi, ‘tulombeña kwesekeja namwaya nkeñelu yindi,’ kwesekeja nayuma yatiyañayi kuwaha. Nzambi watulejaña nindi neyi tulomba muniyi njila, “wukututiya.” (1 Yowanu 5:14) Hakwila nawu kulomba kwetu akutiyi, twatela kumwiluka Nzambi yomweni Bayibolu nikwiluka nkeñelu yindi.
Antu amavulu akuhwelela nawu kulomba bayi neyi hinyidimu yakudifukwilamu hohuku, ilaña Nzambi watiyaña nawa waakulaña kulomba kwawu. Isaac wakuKenya, wahosheli nindi: “Nalombeli nami ankwashi kwiluka chahosha Bayibolu. Chimwahitili kapinji kantesha, kwenjili muntu nakunkwasha.” Hilda wamuPhilippines, wakeñeleña kuleka kunwa makanya. Hanyima yakweseka kakavulu nindi yaleka makanya, nfumwindi wamulejeli nindi “Kwila wulomba wukwashu kudi Nzambi nehi?” Wetejeli mwamulejeliyi nfumwindi nawa wahosheli nindi: “Natiyili kuwaha chankwashiliyi Nzambi. Mpwila yamakanya yatachikili kumana. Nalekeli kunwa makanya.”
Nzambi Mukwakubadika wafwilaña kuyikwasha nakukala kumwamonaña kwesekeja nankeñelu yindi?
^ par. 5 Ijina daNzambi dashimunawu muBayibolu diyi Yehova.
