Chaaka nichaaka, twapulintaña nikwidisha maBayibolu ninyikanda yanyanya yayivulu yashindamena haBayibolu. Twatuñaña nikwakamena tusanji twamutayi nitusanji twakupulintila mukaayi kejima. Antu amavulu apompelaña mumaluña amawahi akudifukwila, itwatenaña netu Matala aWanta. Anyi ahanaña mali akuzatisha kuniyi yuma?

Mudimu wetu wakwashewaña nayawaana yitwahanaña mukudikeñela. (2 Akorinda 9:7) Mu 1879, chibaaba chamuchiyedi chamagazini yaZion Watch Tower “[neyi chochiyinashimunuwu muyinu magazini nawu], twakuhwelela mudi YEHOVA neyi diyi nkwashi yetu, chineli ichi dichuma chitwakuhwelela, hitwamba kalomba hela kulembelela antu netu atukwashuku.” Ilu dilushimbi lutwalondelaña.

Yawaana ayitemeshaña kutusanji twamutayi hela muyikasha yamawaana yekala muMatala aWanta ejima. Ilaña hitwahanaña yamwikumi hela kuhitishamu tuyeña hela kufwetesha antu hamudimu wetu hela nyikanda yitwahanañaku. Neyi tunakushimwina, tunakudizisha muchipompelu hela tunakukwasha mudimu wakutuña maluña akudifuukwila, hiyatufwetañaku. Yesu wahosheli nindi: ‘Munatambuli chamukunkulu, hanenu chamukunkulu.’ (Matewu 10:8) Antu ejima ekala hatusanji twamutayi hela ekala hakasanji keneni, kushilahu ninawa ekala Mwizanvu Dalombolaña dawaYinsahu jaYehova hiyafolañaku.

Yawaana yahanañawu amanakwetu twayizatishaña cheñi neyi kunamwekani wubanji wadimwekenaña. AkwaKristu akusambila atiyileña kuwaha kuhana yawaana yakukwasha nachu atuzweñi. (Aroma 15:26) Anetu nawa twakwashaña antu anamoni kukala kuhitila mukuyituñila matala nimaluña akudifukwila, kuyinka yakudya, yakuvwala nikuyinka yitumbu.