MUTU WUDI HEFU DATACHI
A Yinsahu jaYehova Hiyanyi?
“Namwiluki Mike hadi yaaka yayivulu. HiChinsahu chaYehova. Ilaña kwitiya kwindi kwanhayamishileña. Yehova hinyi? Muloñadi aYinsahu chiyabulilaña kwanakanawu mafuku akunooka? Komana Mike waluwankeni nantañishilu yamukwitiya?”—Becky, California, U.S.A.
“Antuñi nami chatachikiluwu kudiza Bayibolu nawaYinsahu jaYehova, Nadihwili nami: ‘Indi ijina dakwila nawu aYinsahu jaYehova dalumbulukadi? Kanda nitiyeñahu dehi idi ijina”—Zenon, Ontario, Canada.
“Ami niñodami twatoñojokeleña netu aYinsahu jaYehova enjileña muloña wakwila atumweni hitwayaña kuchechuku. Nawa twatoñojokeli netu neyi chakwila kwitiya kwaya mpuhu hikwadiña nayuma yitwakeñeleñaku, dikwila nawu ninidi izanvu dawaYinsahu jaYehova dabula kwilukewa nidena hidikwetuku.”—Kent, Washington, U.S.A.
“Kuhosha hohu chalala hinayilukili hela kwiluka yuma yakuhwelelawuku.”—Cecilie, Esbjerg, Denmark.
Kakavulu mwayimonaña anakushimwina kwitala nikwitala hela kushimwina kumaluña kwavula antu nawa ahanaña nyikanda yashindamena haBayibolu nikudizisha antu Bayibolu chawaana. Hekwawu mwatambulahu dehi magazini kudi aYinsahu. Hadaha mwajinokaña chekalawu aYinsahu jaYehova. Hekwawu ninenu mwatoñojokaña neyi awa antu itunahoshuhu dehi kwiwulu.
Neyi dichimwatoñojokaña, kudihi kumunateli kuwana ñakwilu? Munateli kwiluka ñahi yuma yakuhwelelawu aYinsahu jaYehova, mudimu wawu wakushimwina, kwafumaña mali akutuñisha nachu maluña akudifukwila nichaleñelaña ayendeleña kumatalenu hela kumaluña kwavula antu?
Cecilie wutwashimuna hakusambila wahosheli nindi, “Natañili nsañu yayivulu yahosha hadi aYinsahu jaYehova haInternet. Natiyili nsañu yambonji nikutiyilila kunsañu yakutwamba. Chafuminumu, natachikili kuyimona aYinsahu jaYehova neyi atama.” Chimwahitili mafuku, wahanjekeli naChinsahu chaYehova kanwa nakanwa nawa wamwakwili malwihu ejima enhwiliyi.
Komana munakukeña kuwana ñakwilu yalala hamalwihu imukweti kutalisha hadi aYinsahu jaYehova? Tunayikoleshi kuya nakuyihula aYinsahu jaYehova awenawu, asoneka yinu magazini. (Yishimu 14:15) Tunakuhweleli netu yibaaba yinalondeluhu yikuyikwasha kutwiluka chitwekala niyuma yitwakuhwelela kushilahu nimudimu wutwazataña.
