Henohu kanda mwili chuma chimunakufwila, mwatela kudihula nenu, ‘Iyi yuma yinateli kunkwasha ñahi?’ Neyi nilomba ichi chuma chikuntiyisha hohu ami kuwaha? Inehi. Wonsu wetu twakeñaña kwiluka neyi mukulomba mwafumaña yuma yayiwahi. Yoba washinshika niyena wehwili nindi: ‘Hela neyi nimutambika, komana wukwakula?’—Yoba 9:16.

Muyibaaba yinafumuhu, twadiza netu kulomba bayi neyi hinjila yakudifukwilamu mukwitiya hela hinjila yakuwundishilamu yitoñojokaku. Nzambi walala watiyaña kulomba. Neyi tulomba munjila yayiwahi nikulomba chuma chatelela, Nzambi watiyaña. Nzambi watulejaña kukundama kwakwihi nayena. (Yakoba 4:8) Neyi tukulombaña mpinji yejima, yumanyi yikufumamu? Tushinshikenu yuma yayiwahi yafumañamu.

Neyi mumona kukala muchihandilu chenu, komana mwadakamenaña nankashi? Bayibolu yatulejaña ‘kulomba mpinji yejima’ hampinji yamuchidiwu, nawa twatela ‘kumuleja Nzambi yuma yejima yitunakukeña mukulomba.’ (1 Atesalonika 5:17; Afwilipi 4:6) Bayibolu yatulejaña cheñi nawu, neyi tukulombaña kudi Nzambi, “kuwunda kwaNzambi kwabadika maana ejima kwakahemba nyichima [yetu] niyitoñojoka [yetu].” (Afwilipi 4:7) Tukwikala mukuwunda neyi tukumulejaña Tata yetu wamwiwulu kukala kutukweti. Watulejaña nindi tulombeña. Masamu 55:22 yahosha nawu, “Umbilaku chiteli cheyi hadi Yehova, yena wukukukwashaku.

Antu amavulu mukaayi ekalaña mukuwunda. Hee Ran wakuSouth Korea, wahosheli nindi: “Neyi nindi  nakukala kweneni, chinalomba, natiyaña neyi chitelu chinadiña nachu chinanfumi nawa natweshaña kuumika.” Cecilia, wakuPhilippines, wahosheli nindi: “Chineli nidi mama yawantu, natoñojokaña hadi anyanami awambanda nimama, chayinu mpinji hiyakutwesha kuñilukaku. Chineli nalombaña, nakoñaña nyidimu yami yejima chakadi kudakamena nankashi. Neluka nami Yehova wukunkwasha kuyakamena.”

Komana munazeyi nankashi muloña wakukatakata hela kukala kwamuchihandilu? Kulomba kudi “Nzambi wakukundeja kwejima” kunateli kuyikwasha chikupu. Bayibolu yahoshaña nawu “watukundejaña mulukadi lwetu lwejima.” (2 Akorinda 1:3, 4) Chakutalilahu, hampinji yaneñeliyi Yesu, ‘wafukamini nakulomba.’  Chumanyi chafuminumu? ‘Kwenjili kañelu kufuma mwiwulu nakumukolesha.’ (Luka 22:41, 43) Muntu mukwawu niyena washinshika, Nehemiya, amutiyishili woma kudi antu atama nawu yaleki kuzata mudimu waNzambi. Walombeli nindi: “Ichi dinu, eyi Nzambi, nkolesheli makasami.” Yuma yamwekeni hanyima yakulomba yamwekesheli nawu chalala Nzambi wamukwashili kubula woma nakutwalekahu kuzata mudimu windi. (Nehemiya 6:9-16) Reginald wamuGhana, washimwini chatiyañayi neyi nalombi nindi: “Neyi nalombi, sweje-e mumpinji yalukadi, natiyaña neyi naleji muntu watela kumanisha kukala kwami nawa wunanleji nindi bayi wutiya womaku.” Eñañi, neyi tukulombaña kudi Nzambi nateli kutukundeja.

Yuma yikwawu yitwafuukulaña yinateli kutuluwañesha chikupu hela kutukwasha niantaña jetu. Tunateli kufuukula ñahi chiwahi? Bayibolu yahoshaña nawu: “Mwinenu nabuli maana [sweje-e neyi wudi mukukala], alombi kudi Nzambi, wahanaña kudi antu ejima makasa ayedi, hahosholañaku; akumwinkawu.” (Yakoba 1:5) Neyi tulomba maana, Nzambi nateli kuzatisha spiritu yindi yajila kulonda tufuukuli chiwahi. Dichi, twatela kulomba chikupu spiritu yajila muloña Yesu watulejeli nindi, ‘Tata yenu wamwiwulu wukubadika kuyinka awa akumulomba spiritu yajila.’—Luka 11:13.

Yesu niyena walombeleña kudi Tata yindi hakwila yuma yamaneni. Bayibolu yatulejaña nawu hampinji yatondeleñayi amayala 12 ekalili apostolu indi, ‘wachiishili nakulomba kudi Nzambi wufuku wejima.’—Luka 6:12.

Kufwana Yesu, antu amavulu makonu niwena anamoni Nzambi chinayikwashiyi kuhitila mukwakula kulomba kwawu neyi anakukeña kufuukula chiwahi. Regina, wamuPhilippines, washimwini kukala kwamboka-mboka kwamweniyi, chidi neyi kudikwasha yomweni nichisaka chindi hanyima yakufwisha nfumwindi, kumana kwamudimu nikukulisha anyana. Chumanyi chamukwashili kufuukula chiwahi? Wahosheli nindi, “Nalombeleña mpinji yejima kudi Yehova kulonda yankwashi.” Kwabena wamuGhana, washimwini chaleñeleli yalombeña kudi Nzambi nindi yamukwashi nindi, “Mudimu wami wakutuña wunatambwileña nfwetu yeneni wamanini.” Chashinshikiliyi hayuma yamwekeni, wahosheli nindi, “Nalombeli kudi Yehova chakubula kuleka nami yankwashi niwani mwakwilila.” Wahosheli cheñi nindi, “Natiyaña kuwaha chankwashiliyi Yehova kuwana mudimu wanyinkaña mpinji yakuzata nyidimu yakuspiritu niyakumujimba.” Anenu nawa Nzambi nateli kuyikwasha neyi mukumulejaña yuma yinateli kuluwañesha wubwambu wenu nayena mukulomba.

Tunahoshi hohu hayuma yantesha yafumaña mukulomba. (Neyi munakukeña kwilukilahu yuma yikwawu, talenu chikasha chinakwila nawu, “Wuloku Wafumaña Mukulomba.”) Hakwila mutambwili iwu wuloku, mwatela kumwiluka Nzambi ninkeñelu yindi. Neyi diyuma yimunakukeña, mwani ihulenu aYinsahu jaYehova kulonda ayikwashi kudiza Bayibolu. * Ichi dichuma chinateli kuyikwasha kukundama kwakwihi ‘naMukwakutiya mwalombañawu antu.’—Masamu 65:2.