MUTU WUDI HAKAVA | MUNATELI KUTIYA CHAHOSHA BAYIBOLU
Muloñadi Chitwatela Kutiyila Chahosha Bayibolu?
“Bayibolu himukanda wawakwansakililu. Ilaña amaChinese hiyawiluka nikuwulemeshaku.”—LIN CHINA.
“Nyikanda yajila yamunsakililu yami yachiHindu hinayitiyaña chiyahoshaku. Hanu dinu nateli kutiya ñahi Bayibolu Yajila?”—AMIT, INDIA.
“Bayibolu nayilemesha nami himukanda wawukulu nawa natiyaña nawu ayilandaña chikupu. Ilaña kanda niyimoneñahu dehi.”—YUMIKO, JAPAN.
Antu amavulu mukaayi ayilemesha Bayibolu chikupu. Ilaña, nsañu yekela muBayibolu hiyayilukishaku. Dichekalawu antu amavulu amuAsia, niantu amakwawu ashakamaña mumatuña mwekala antu ekala namaBayibolu.
Hela chochu, mwatela kudihu nenu, ‘Muloñadi chinatela kutiyila chahosha Bayibolu?’ Neyi mwiluka chahosha iwu mukanda wajila chikuyikwasha kwila iyi yuma:
-
Mukwikala namuzañalu walala
-
Mukwiluka chakumanisha kukala kwamuchisaka
-
Mukwiluka Chakuumika yuma yimunakwakama
-
Kwikala nawubwambu wakola naNzambi
-
Mukuzatishaña mali chiwahi
Chakutalilahu, talenu chuma cheliliyi Yoshiko, wakuJapan. Welukili wanyi yuma yekala muBayibolu nawa wafuukwiluhu kutachika kuditañila yomweni. Yumanyi yafuminumu? “Bayibolu yinankwashi kwiluka nkeñelu yawumi nikukuhwelela yuma yakumbidi,” wabombeleluhu nindi: “Chayinu mpinji neluki yuma yekala muBayibolu.” Amit, itwashimuna dehi, wafuukwiluhu kutaña Bayibolu nkawindi. Wahosheli nindi, “Nahayamini chikupu.” “MuBayibolu mwekala nsañu yalema yinateli kukwasha antu ejima.”
Bayibolu himukanda wunakwashi antu amavulu chikupu. Kwila muditañila enu aweni kulonda mumoni chiyinateli kuyikwasha nehi?
