Kubombela hansañu yamuBayibolu yashimunawu haYililu 2:5-11, kaYudeya wejina daPhilo wadiñaku haniyi mpinji wasonekeli nsañu yalumbulula izaza dawantu enjili kuYerusalema haPentekosta 33 C.E.

Philo wasonekeli hadi antu enjili kuYerusalema, nindi: “Mazaza awantu enjili chawija afumini kunyisumba yayivulu, amakwawu enjili hamaseki, amakwawu mumatu, kufuma kumusela nikumujika, kukabeta kambwela nikaluwunda.” Wahosheli cheñi hamazu adiña mumukanda wasonekeliyi Agrippa I, mwizukulu aHerod Muneni weyala, kudi aRoman Emperor Caligula. Muniwu mukanda, Agrippa wahosheli kutalisha haYerusalema nindi: “Himusumba Wajila . . . hiwadiña hohu musumba wawaYudeyaku, ilaña wadiña cheñi musumba wamatuña amakwawu, hamuloña waluntu lwaluvulu lwafumineña muniwu musumba nakuya nakushakama kumatuña adikuminuwu nawu.”

Agrippa washimwini maluña kwayileñawu aYudeya nakushakama, kushilahu tuhu nimaluña akwakulehi adi neyi Mesopotamiya, North Africa, Asia Minor, Greece, nichitutu chaMediterranean. Muntu wumu wadiza wejina daJoachim Jeremias wahosheli nindi, “Hela chakwila awa maluña anashimunuwu hiyashimuna chiyendeleñawu nakuya kuYerusalemaku, ilaña iyi nsañu yapela kutiya, muloña kwadiña lushimbi lwakwila nawu aYudeya ejima ayeña kuchawija.”—Kuhituluka 16:16.

Chipandakenu, Pentekosta niChawija Chayisolu, iyi yawija yisatu ayilileña hachaaka hachaaka muYerusalema. Muyaaka nkulakaji yakusambila, antu amavulu enjileña kuYerusalema kuniyi yawija, afumineña muIsarela nikwejima kwashakamineñawu aYudeya. (Luka 2:41, 42; Yililu 2:1, 5-11) Awa antu ejima enjileña akeñeleña kwakushikena.

Amakwawu akamineña kudi amabwambu jawu; amakwawu ashikeneneña kumahotelu. Amavulu akamineña mumatenti mukachi kachilombu hela mukachi kampwembu. Halwendu lwindi lwakukumishakumuYerusalema, Yesu wakaaminimumusumba waBetani wadiñikwakwihi.—Matewu 21:17.

Matala amavulu mwatuñiluwu jimbashila jakuwelela ayiwana kwakwihi natembeli. Antu ayiwanaña awa matala atoñojokaña nawudimu mwashikeneneñawu enyi enjileña nikuwelelamu henohu kandaeñili mutembeli. Mukanda wawaniniwu munawa matala washimunaña nawu Theodotus , kapristu nawa nlomboli wamusinagogi yamwiluna, “atunili sinagogi mwakutañila Torah . . . kushilahu nimatala akukamama nitupeka ninyipayipi yamenji yazatishileñawu enyi.”