ENOKI washakamini yaaka yayivulu. Chinateli kutukalila kufwikija yaaka yashakaminiyi iwu muntu, yaaka yakushika ku 365, kubadika yaaka yashakamañawu antu makonu, yinateli kwiñilamu kapampa kawana! Kwesekeja nachashakamineñawu antu hayina mpinji haswejeli kukulaku. Kunyima kwakweni, antu ashakamineña yaaka yayivulu kubadika makonu. Adama, muntu watachi washakamini yaaka yakubadika ha 600, diyi mpinji yasemukiliyi Enoki nawa washakaminiku cheñi yaaka 300. Anyana kaAdama amakwawu ashakamini yaaka yayivulu kubadika Adama. Dikwila nawu Enoki wadiña wakola kumujimba chashikijiliyi 365, chakwila wachidiña nayaaka yikwawu yakutwalekahu kuhanda. Ilaña hatwalekelihu kuhandaku.

Chidi neyi Enoki wadiña muwina wakufwa. Fwikijenu nakutema nakuswama, chakwila nakañanyi kwiluka chuma chinaleñeli awa antu ashimwininiyi nsañu yaNzambi amubalumikili. Awa antu ahilili chikupu. Amuheleli. Adiwili nsañu yashimwinineñayi nawa amusekesheli Nzambi wamutemesheli. Hiyatwesheli kumulukuka Nzambi, yaEnoki Yehovaku, ilaña amulukukili Enoki. Hadaha Enoki wajinokeli neyi wukadimonahu cheñi nachisaka chindi. Komana watoñojokeleña hadi ñodindi nianyanindi awambanda hela mwanindi Metusela hela mwijikulwindi Lameki? (Kutachika 5:21, 23, 25) Komana iku dikwadiña kufwa kwindi?

Bayibolu hiyalumbulula nsañu yayivulu kutalisha hadi Enokiku. Mavasi antesha hohu anyikanda yisatu yamuBayibolu, diwu amulumbulula chikupu. (Kutachika 5:21-24; Aheberu 11:5; Yuda 14, 15) Hela chochu, awa mavasi ashimuna wunsahu watukwashaña kumwiluka chikupu iwu iyala wadiña nachikuhwelelu chakola. Komana mwakamenaña chisaka chenu? Komana mwamona dehi kukala hamuloña wakufwila kuhakwilaku yuma yimuneluki nenu yalala? Neyi chayimwekeneni, mukudiza nsañu yayivulu hachikuhwelelu chaEnoki.

Mumpinji yaEnoki, Antu adiña nayilwilu yatama. Dadiñi ikiñu damuchitanu nachiyedi kufuma hadi Adama. Chakadi nikujina, antu achidiñi nanyijimba yawanina chanti neyi chadiñawu Adama naEvu hatachi. Dichi chuma chayileñeleleña antu kushakama yaaka yayivulu. Ilaña, adiña mukukala kweneni muloña yilwilu yawu yatamini chikupu nikuspiritu. Kwadiña madombu nankashi. Iku kuhimpika kwatachikili mwikiñu damuchiyedi, hampinji yajahiliyi Kena manakwindi Abeli. Chidi neyi mwana kaKena wumu waswejeli nankashi kwikala nayilwilu yakudivwimba, madombu nikufuntisha katama nakatama kubadika Kena! Mwikiñu damuchisatu, atachikili cheñi yilwilu yikwawu yatama. Antu atachikili kutena ijina daYehova, bayi neyi munjila yakudifukula kudi yenaku. Azatishileña ijina daNzambi dajila munjila yatama nikudisawula—Kutachika 4:8, 23-26.

Iyi yilwilu yamuchidiwu yavulili chikupu mumafuku aEnoki. Enoki chakulileñayi watondelihu. Komana wadi kulondela yuma yakoñeleñawu antu amumafuku indi? Indi kwiji wadi kukeñakeña Nzambi walala, Yehova, waleñeli mawulu nimaseki? Watela watiyili kuwaha hakudiza hansañu yaAbeli, ajahiliwu hamuloña wakudifukula kudi Yehova munjila yamuzañalesheleña Nzambi. Enoki niyena wafukwilihu kwila chuma  chochimu. Kutachika 5:22 yatulejaña nawu: ‘Enoki watwalekelihu kwenda naNzambi walala.’ Awa mazu anakumwekesha nawu Enoki dimuntu wamwakamini Nzambi hayina mpinji. Diyi muntu watachi ashimunawu muBayibolu muniyi njila.

Vasi yoyimu yahosha cheñi nawu Enoki watwalekelihu kwenda naYehova nihanyima yakuvwala mwanindi Metusela. Dichi Enoki wekalili nachisaka hadiñayi nayaaka 65. Wadiña nañodindi abula kutenawu muNsona nianyanindi ‘awamayala niawambanda’ abula kushimunawu kuvula kwawu. Neyi tata yawantu nakwenda naNzambi iku nakukulisha nikwakamena chisaka, watela kukwasha chisaka chindi munjila yaNzambi. Enoki welukili nindi Yehova wakeñeleña nindi watela kukakela hohu kudi ñodindi. (Kutachika 2:24) Nawa wazatili nañovu hakuyidizisha anyanindi amwiluki Yehova Nzambi. Yumanyi yafuminimu?

Bayibolu hiyashimuna wunsahu wawuvulu kutalisha haniyi nsañuku. Kwosi wunsahu wuyashimunawu kutalisha hachikuhwelelu chamwana kaEnoki Metusela, washakamini yaaka yayivulu neyi chiyamushimunawu muBayibolu nawu wafwili muchaaka chaDibaji deneni. Hela chochu, Metusela wanvweli mwana wejina daLameki. Lameki washakamini yaaka yayivulu nawa wamubadikilimu nkaka yindi Enoki nayaaka 100. Lameki wamwekesheli chikuhwelelu chakola chikupu. Yehova wamwoneneni kuhosha hawuprofwetu kutalisha hadi Nowa mwanindi, nawa iwu wuprofwetu washikijeweli hanyima yaDibaji. Kufwana Enoki, Nowa niyena amushimuna nawu wendeli naNzambi. Nowa hamumweni Enokiku. Ilaña Enoki washili iheta deneni. Hadaha Nowa wadizili iyi yuma kudi tata yindi, Lameki, hela nkaka yindi Metusela indi kwiji Yaredi tata yaEnoki wadiñaku henohu Nowa wudi nayaaka 366.—Kutachika 5:25-29; 6:9; 9:1.

Talenu chaambu chindi hakachi kaEnoki naAdama. Hela chakwila Adama wadiña wawanina, wakoñeli nshidi kudi Yehova nawa wayileñeleli anyanindi kwikala akwakudikaña nikumona yihuñu. Enoki hela chakwila wadiña wawanina wanyi, ilaña wendeli naNzambi nawa wayishilili anyanindi chuma chalema. Adama wafwili henohu Enoki wudi nayaaka 308. Komana chisaka chaAdama chamudilili iwu nkakulula waswejeli kudikeña yomweni? Tuneluki wanyi. Muyuma yejima Enoki ‘watwalekelihu kwenda naNzambi walala.’—Kutachika 5:24.

Neyi munakwakamena chisaka, shinshikenu yuma yimwatela kudizila kuchikuhwelelu chaEnoki. Hela chakwila chalema kwakamena chisaka chenu kumujimba, ilaña kwakamena chisaka chenu kuspiritu dichuma chalema chikupu. (1 Timotewu 5:8) Munateli kwila mwenimu bayi neyi nayuma yimwahoshaña hohuku, ilaña nayuma yimwelaña. Neyi mufuukulahu kwenda naNzambi neyi cheliliyi Enoki, mwiteja nshimbi jaNzambi jonenawu kuyilombola muchihandilu chenu, anenu nawa mukashila anyanenu iheta dalema, dikwila nawu akayimbujolaña muchihandilu chawu.

Enoki watela waneñeleña chelili wadiña muntu wachikuhwelelu hampinji yashakamineñayi nawantu abula chikuhwelelu. Komana Nzambi yindi, Yehova, wamwakameneneña? Eña. Mpinji yashikili yakwila Yehova yahanjeki naniwu kambuñindi washinshika. Nzambi wamulejeli nsañu yakuya nakuleja ana antu adiñaku munana mafuku. Dichi Nzambi wamwilishili  Enoki kwikala kaprofwetu, diyi kaprofwetu watachi ashimunawu nsañu yindi muBayibolu. Tweluka iyi nsañu muloña Yuda manakwaYesu, amoneneni kusoneka hamazu awuprofwetu aEnoki ahosheliyi yaaka nkulakaji yayeni. *

Enoki waprofweteli nindidi? Waprofweteli nindi: “Tiyenu, Yehova wenjili namakumi amakombakaji awantu indi ajila, nakwila mudimu wakusompesha nakukonkolola ejima asekeshaña Nzambi, nanyidimu yawu yakusekesha Nzambi yakoñeluwu chakusekesha Nzambi, nayuma yakala yejima yamuhosheluwu akwanshidi asekeshaña Nzambi.” (Yuda 14, 15) Dichi, mwatela kwiluka nenu Enoki wahosheleña muchinyika chakunyima kumwekesha neyi Nzambi wadiña wakoña dehi yuma yashimwinuwu muwuprofwetu. Diyi njila yasonekelamu mawuprofwetu amakwawu alondelelihu. Chikuma chidi chakwila nawu: Kaprofwetu wahoshaña hayuma yikukeña kumwekana katataka, ilaña kuyilumbulula yinateli kutiyakana neyi yamwekana dehi.—Isaya 46:10.

Chadiña ñahi hakwila Enoki yahoshi awa mazu awuprofwetu, hadaha kuhitila mukuyishimwina antu ejima akutiya? Talenu awa mazu akusoñamisha chayihosheliyi neyena, chazatishiliyi kapampa kawana izu dakwila nawu “asekeshaña Nzambi” hakutena antu, yuma yakoñeleñawu nichiyakoñeleñawu iyi yuma. Dichi iwu wuprofwetu wayisoñamishili antu ejima nawu yilwilu yawantu mukaayi yataminineñaku kufuma tuhu hiyayihañiluwu muEdeni. Aka kaayi akakihimpa chikupu neyi Yehova nenzi dehi ‘nanyikanka yindi yajila’, yawañelu akweti ñovu akasa njita nakuleta kujilumuka. Enoki washimwinini iyi nsañu nkawindi chakadi kutiya woma. Hadaha Lameki hadiñayi kansi wamweneña kuhamuka kwamwekesheliyi nkaka yindi. Neyi dimu, tunateli kwiluka chuma chaletesheli kwikala nachikuhwelelu.

Chikuhwelelu chaEnoki chikutuleñela kudihula neyi tunakumona yuma yidi mukaayi mutunakushakama neyi chayimonañayi Nzambi. Wunsompeshi washimwininiyi Enoki mukuhamuka wuchidi kutwalekahu nimakonu neyi chochichadiña mumafuku indi. Kwesekeja nakusoñamisha kwashimwiniyi Enoki, Yehova waleteli Dibaji hadi antu atama adiñaku mumafuku aNowa. Iku kujilumuka kwajilumukiliwu antu kunakwimenaku kujilumuka kweneni kunakwinza. (Matewu 24:38, 39; 2 Petulu 2:4-6) Neyi chochichadiña, makonu Nzambi nadiloñeshi nawañelu jindi ajila kuleta wunsompeshi waloña hadi antu asekeshaña Nzambi. Wejima wetu twatela kwanukaña mazu awunsompeshi aEnoki nikulejaku antu amakwawu. Yisaka yetu niamabwambu anateli kutushiya. Mpinji yikwawu tunateli kuneña. Ilaña Yehova hamushili Enokiku; nawa hakashiya ambuñindi ashinshika makonuku!

Enoki wafwili ñahi? Wafwila munjila yachihayamisha nawa yakubula kwiluka. Mukanda waKutachika washimuna nawu: ‘Enoki watwalekelihu kwenda naNzambi walala, kumukasumuka hikwosi, Nzambi diyi wamutambwili.’ (Kutachika 5:24) Munjilanyi Nzambi mwamuhukwiliyi Enoki? Kapostolu Pawulu walumbulwili nindi: “Nakukuhwelela amutuntulwili Enoki kulonda abuli kumona kufwa; hiyamumwenuku muloña amutuntulwili kudi Nzambi. Helili kanda amutuntululi amushimwini wunsahu nawu wamutiyishilaña Nzambi kuwaha.” (Aheberu 11:5) Pawulu watalishili mudihi hakuhosha nindi “amutuntulwili Enoki kulonda abuli kumona kufwa”? Akwakubalumuna Bayibolu amakwawu ahosha nawu Nzambi wamusendeli Enoki mwiwulu. Ilaña hidimuku. Bayibolu yashimuna nawu Yesu hohu diyi muntu watachi asañwiluwu nakuya mwiwulu.—Yowanu 3:13.

 Munjilanyi ‘mwamutuntulwiluwu’ Enoki kulonda yabuli “kumona kufwa”? Yehova wamutuntulwili Enoki munjila yayiwahi kuhitila mukufumisha wumi nawa wafwili, kulonda yabuli kumona yihuñu yakufwa. Chatachi Enoki watambwilili “wunsahu nawu wamutiyishilaña Nzambi kuwaha.” Munjilanyi? Henohu kanda yafwi, hadaha Enoki amumwekesheleli chimwenu kudi Nzambi nakumuleja paradisa haseki. Hanyima yakumumwekeshela chimwenu chachiwahi kudi Yehova, Enoki wafwili. Hakusoneka hadi Enoki niamayala nawambanda amakwawu ashinshika, kapostolu Pawulu wahosheli nindi: “Wenawa ejima afwili mukukuhwelela.” (Aheberu 11:13) Kuhiñahu, ayilumbu jindi akeñakeñeli mujimba windi, ilaña “hiyamumwenuku,” hadaha Yehova wadiña wawukisañana dehi, kuchinisha kuwuzatisha mukudifukula kwakutwamba. *

Neyi chinashimuni muniyi nsona, ichi dinu tushinshikenu kulonda tumoni chafwiliyi Enoki. Fwikijenu nawa ilukenu nenu kwadiña hohu njila yimu yakupulukilamu. Enoki wadiña nakutemuka nawa wazeyeli chikupu. Ayilumbu jindi amuhañileña, iku anahili chikupu nansañu yawunsompeshi yayishimwininiyi. Enoki wawanini iluña mwakuswama nawa wanookeli chanti, ilaña welukili nindi hakutwesha kuswama hadi mpinji yayilehiku. Kufwa hikukukeña kumumwekena munjila yatama. Hampinji yanookeliyi, walombeli kudi Nzambi yindi. Yitoñojoka yakuwunda yenjili mudi yena. Enoki wamweni chimwenu chamwekesheleña yuma yayiwahi nawa wamweni neyi dimu mwadiyi.

Fwikijenu chamweniyi iyi yuma yamwekesheleña kaayi kejima kambukiliku nakaayi mwashakamineñayi. Wamweneña kaayi kakawahi neyi chochadiña itempa daEdeni, ilaña himwadiña akerubi ahembeleña kulonda kukañesha antuku. Mwadiña amayala nawambanda akola kumujimba nawa akweti nyijimba neyi yawatwansi. Adiña mukuwunda. Himwadiña kudihela hela kudikabisha muloña wakwitiya neyi chamweniyi Enokiku. Enoki yomweni wadimweneni kushiika kwaYehova, kukeña nichakanayi. Wamweni nindi imu dimu mwatela kushakamayi; nawa watela kwikala mukala windi. Chatiyiliyi nindi wudi mukuwunda chikupu, Enoki walezumukilili mutulu twakadi kulota.

Wuchidi mutulu twakufwa kushika niyinu mpinji, nawa Yehova Nzambi wamwanukaña muyitoñojoka yindi yabulaña kukuma! Neyi chakaniniyi Yesu nindi, mpinji yinakwinza hakela antu ejima anukañayi Nzambi akatiya izu daKristu nawa akedika mumajamu, akamona ituña dadiha dadiwahi nawa dawunda.—Yowanu 5:28, 29.

Komana munakukeña kushakama mwituña damuchidiwu? Fwikijenu chimwakatiya hakudimona naEnoki. Toñojokenu hayuma yayiwahi yakatulejayi! Wakatuleja neyi chakwila yuma yitwafwikijaña hampinji yeliliyi hakufwa yadiña yalala. Ilaña chayinu mpinji kudi yuma yayivulu yitwatela kudizilaku swayi-swayi. Hanyima yakuhanjeka hadi Enoki, Pawulu watwalekelihu kuhosha nindi: ‘Chakadi kukuhwelela hichinatweshi kumutiyisha Nzambi kuwahaku.’ (Aheberu 11:6) Yuma yitunadizi yikutuleñela kwimbujola chikuhwelelu chaEnoki mukuhamuka!