Nasemukilili kuPaddington, mwiluña mwekala antu amavulu kuLondon, muEngland. Nashakamineña nawamama niayaya jami asatu awambanda. Atata elileña hohu aha enza nakututala aha nehi muloña wakusweja kusheta.

Hinadiña kansi amama andizishili kulomba mpinji yejima nawufuku. Nadiña nakaBayibolu kanyanya mwadiña hohu mukanda waMasamu, neyi inakutaña nembileña neyi kamina. Inakwanuka natañileña mukuku wamazu mumukanda wakushikola chakwila hinavulameneni awa mazuku, adiña nawu: “Ifuku dimu hidakekalaku cheñi kumadikiku.” Awa mazu anleñeleli kubula kukama wufuku wejima nikutachika kutoñojoka hachihandilu chakumbidi. Natoñojokeli nami, ‘Kudi yuma yalema yinatela kwila muchihandilu. Muloñadi chinekalilaku?’ Hinakeñeleña kufwaku!

Natachikili kutiya kuwaha nsañu yakupanda. Natachikili kuhosha nawafu, twayileña kumajamu nawakwetu akwashikola nawa twatalileña mafilimu akutiyisha woma. Twatiyileña kuwaha nikutiya woma hampinji yoyimu.

Chinashikijili yaaka ikumi, natachikili kwikala nayilwilu yatama. Natachikili kunwa makanya nawa nateñukili namakanya. Nkumininaku, natachikili cheñi kunwa madamba. Chinashikijili yaaka 11, natachikili cheñi kunwa walwa. Hela chakwila natiyileña kutama chiwatiyakeneña, ilaña natiyileña kuwaha kusheta. Nakeñeli cheñi tumina nikuhañana. Nayileña kumapati nikumaluña akunwina walwa nawufuku. Nawombolokeleña nawufuku nikufunta cheñi henohu kanda kuchi. Chineli nazeyeleña chikupu, nawombolokeleña kushikola neyi nayi. Neyi nayi kushikola, nanwineña walwa hampinji yakutaña.

Nafwelukili chinamanishili shikola. Amama aneñeli nawa ahilili muloña yilwilu yami yaswejeli kutaminaku. Twatobokeli chikupu nawa nafumini hetala. Haniyi mpinji nayili nakushakama nakajila kami, Tony, wahembeleña Masuki Amalehi. Wadiña wayikonkojola, walandishileña yitumbu yashetana nawa wadiña mukwamadombu chikupu. Hashimbwili wanyi nekalili nevumu, iku nidi nayaaka 16, nawa navweli mwana weyala.

Awanini kudi aYinsahu jaYehova hampinji yinashakamineña muchilombu muyahembelañawu amama jawantu abula kusumbuka akweti anyana. Akwanshimbi amwiluña anyikelihu kapeka kamu. A Yinsahu ayedi awambanda enjileña mpinji yejima nakushimwina akwetu atwansi adiña nanyana. Ifuku dimu, ninami nenjili nakushakama hiyayidizishileñawu akwetu. Nafwilileña kuyitadikisha aYinsahu. Ilaña akwili malwihu ami ejima chachiwahi kuzatisha Bayibolu. Chuma chantiyishili kuwaha, adiña naluwi nawa awunda. Dichi netejeli kutachika kudiza nawu Bayibolu.

Yuma yinatachikili kudiza muBayibolu yahimpili chikupu chihandilu chami. Kufuma tuhu kuwansi natiyileña woma wakufwa. Dichi chayinu mpinji neluki dehi ntañishilu yaYesu kutalisha hakusañuka! (Yowanu 5:28, 29) Cheñi, neluki nami Nzambi wañakamenaña. (1 Petulu 5:7) Sweje-e mazu ekala haYeremiya 29:11 anshikili hamuchima chikupu, akwila nawu: ‘Muloña Yehova nahoshi nindi ami neluki yitoñojoka yinayitoñojokaña, hiyitoñojoka yakumwena, hiyitoñojoka yakutamaku, kulonda hanyaka yenu yakukuminina nakayinki yakukuhwelela.’ Natachikili kukuhwelela nami nateli kwikala nakuchiñeja kwakushakama haya nyaaka muParadisa hamaseki.—Masamu 37:29.

A Yinsahu jaYehova amwenkesheleli kukeña kwakweni chikupu. Chinayili nakupompa nawu katachi, antambwilili chachiwahi chikupu nawa antu ejima adiña namuzañalu. (Yowanu 13:34, 35) Chuma chinamweni chadiña chambukaku chikupu namuchechi munayileña. A Yinsahu antambwilili namuzañalu hela chakwila chihandilu chami chadiña chiwahi wanyi. Nadiña wakasunuka kuhanjeka nawu, añakameneneña ninkutiyilila, kushilahu nikunkwasha muyuma yamboka mboka. Naditiyileña neyi nidi hakachi kachisaka cheneni nawa chikweti kukeña.

Kuhitila muyuma yinadizileña, nelukili nami natela kuhimpa chihandilu chami kulonda nileña yuma kwesekeja nanshimbi yaNzambi. Chadiña chapela wanyi hakwila nawu nileki kunwa makanya. Hampinji yoyimu, nelukili nami tumina tunatiyilileña twaleñeleleña kusweja kunwa madamba, dichi nahimpili tumina. Chineli nakeñeleña kuleka kusheta, nalekeli kuya kumapati nikumaluña akunwina walwa kwanleñeleleña kusheta. Nawa nakeñeli amabwambu amaha adiña nayilwilu yayiwahi anateli kunkwasha kwikala nayilwilu yayiwahi.—Yishimu 13:20.

Haniyi mpinji, Tony niyena wadiña nakudiza Bayibolu nawaYinsahu jaYehova. Chelili aYinsahu akuli malwihu indi ejima kuzatisha Bayibolu, welukili chikupu nindi wadizileña chalala. Wahimpili chikupu yilwilu yindi: walekeli kudikunda nawa kwamadombu, walekeli yilwilu yatama yawubanji nawa walekeli kunwa madamba. Hakwila nawu tumuzañaleshi Yehova chikupu, wejima wetu twamweni netu twatela kuhimpa yilwilu yetu yatama kulonda tuhembi mwanetu chiwahi. Twadisumbwili mu 1982.

Inakwanuka chinatañili yibaaba yamuKaposhi Kakutalila niAwake! *, mwadiña nsañu yawantu ahimpili chihandilu chawu neyi chochinakeñeleña ninami kuhimpa. Natiyili kuwaha nayakutalilahu yawu! Yumiyi yankolesheli nawa nafukwiluhu kuzata nañovu chakadi kuleka. Natwalekelihu kulomba kudi Yehova nami yabuli kunshiya. Tony ninami twapapatisheweli mu July 1982 nakwikala aYinsahu jaYehova.

Kwikala nawubwambu naYehova kunapulwishi wumi wami. Yehova natukwashi chikupu mumpinji yakala. Tunadizi kushindamena hadi Yehova mumpinji yakala, nawa tuneluki netu watwakamenaña mpinji yejima nikukwasha chisaka chetu.—Masamu 55:22.

Natiyileña kuwaha kukwasha anyanetu kulonda niwena amwiluki Yehova. Chayinu mpinji natiyaña muzañalu hakumona anyanawu niwena anamwiluki Nzambi.

Chayinu mpinji hinachishaña nakwakama chihandilu chakumbidi hela kufwaku. Ami niTony twatiyaña kuwaha kwendela yipompelu yawaYinsahu jaYehova mulungu nimulungu nakuyikolesha. Twazataña nawu mumudimu wakudizisha antu netu neyi akuhwelela mudi Yesu, niwena akatambula wumi wahaya nyaaka.