Kansi wanyanya wamweni wishi watuñileña mavu amaneni wafumineña mumuyeñu wedishaña wishi mufakitoli. Iwu kansi welukili nindi mudimu wafakitoli wekala wakutuña mavu. Hamuloña wakubula kutiyishisha kwaniwu kansi kunateli kuleñela muntu kuseha. Hela chochu, kubula kutiyishisha chikupu kunateli kukisañana chihandilu chetu. Chakutalilahu, kubula kutiyishisha chinjikijilu chinashiwu hapulasitiki yayitumbu kukuleñela muntu kumona kukala.

Kubula kutiyishisha nsañu yakuspiritu kukuleñela muntu kwikala mukukala kweneni. Chakutalilahu, antu amakwawu akañenyi kutiyisha ntañishilu yaYesu. (Yowanu 6:48-68) Chatela adiziluku yuma yayivulu, wena akaanini yuma yejima yatañishileñayi Yesu. Okuhalwa!

Komana mwatañaña Bayibolu kulonda yiyilomboleña? Neyi dichimwelaña, munakwila chiwahi. Kudihu kukala kudi kwejima kwafumañamu neyi chakwila himunatiyishi nsañu yejima yimunakutañaku? Antu amavulu chayimwekenahu dehi. Shinshikenu yuma yisatu yalema yabulaña kutiyishawu antu.

• Antu amakwawu atiyishishaña wanyi nshimbi yamuBayibolu yahosha ‘hakumutiya Nzambi walala woma.’ Atoñojokaña nawu hikumuchiina hohu Nzambi. (Mukwakutaŋisha 12:13) Ilaña Nzambi hakeñaña nindi antu adifukulaña kudi yena amutiyeña woma muniyi njilaku. Nzambi wahosha nindi: “Bayi wutiyaña womaku, ami nidi neyi. Bayi wuyeñashanaku, ami yami Nzambi yeyi, nakakwinkaña ñovu; chalala nakakukwashañaku.” (Isaya 41:10) Kumutiya Nzambi woma kwatalisha mukwila nawu kumwakama nikumulemesha chikupu.

• Antu amakwawu atiyishisha wanyi awa mazu onenawu akwila nawu: “Yuma yejima yikweti yilaaka yayu, . . . mpinji yakuvwalika, nimpinji yakufwa.” Ahoshaña nawu Nzambi waloñesha dehi ifuku dakafwayi muntu wudi wejima. (Mukwakutaŋisha 3:1, 2) Ilaña awa mazu anakuhosha hachekala chihandilu chetu, chinakumwekesha nawu kufwa hichuma chatumwekenaña. Izu daNzambi datulejaña cheñi nawu yuma yitwafukulaña yinateli kukeheshaku mafuku itwatela kushakama. Chakutalilahu, twatañaña nawu: “Kumwakama Yehova chavulishaña mafuku amuntu.” (Yishimu 10:27; Masamu 90:10; Isaya 55:3) Munjilanyi? Chakutalilahu, kulemesha Izu daNzambi kukutuleñela kutondolwela kwila yuma yatamishaña mujimba yidi neyi kusheta nikwila wuvumbi.—1 Akorinda 6:9, 10.

• ▸ Antu amakwawu atiyishishaña wanyi chashimuna Bayibolu nawu mawulu nimaseki “anayiswekeli kesi,” nawa atoñojokaña nawa Nzambi wakajilumuna adinu iseki. (2 Petulu 3:7) Ilaña Nzambi wakana nindi hakajilumuna adinu iseki ditwamonaña namesuku. Nzambi “wahatishili iseki hamashina adu, kulonda dibuli kuswila chahaya nyaka.” (Masamu 104:5; Isaya 45:18) Wakajilumuna yuma yatama yamukanu kaayi, bayi adinu isekiku, iku dikukuma kwakanu kaayi chidi neyi nakijilumuni nakesi. Ilaña mawulu, mpinji yikwawu anateli kwikala iwulu dodenindi ditwamonaña hela mwiwulu mwashakamañayi Nzambi. Awa mawulu hiyakayikisañanaku.

Neyi chimunamoni muniyi yakutalilahu, antu atiyishaña wanyi nsañu yatañañawu muBayibolu. Muloñadi Nzambi chikwitejelayi chuma chamuchidiwu kumwekana? Antu amakwawu anateli kutoñojoka nawu: ‘Chineli Nzambi wukweti maana abadika nawa weluka chikupu, kachi waloñesha mukanda wunateli kutañayi muntu wudi wejima nikuwutiya. Muloñadi chabuliliyi kwila mwenimu?’ Shinshikenu yuma yisatu yaleñelaña antu kakavulu kubula kutiyishisha Bayibolu.

1.   1. Bayibolu ayisoneka munjila yatela kutiyawu antu adizoza nawa anakukeña kudiza. Yesu wamulejeli Tata yindi nindi: “Eyi Tata, Mwanta wewulu niiseki, nakusakilili chiwajindili akwamaana niakwakashinshi yumiyi, hiwukuyimwekesha kudi anyikeki.” (Luka 10:21) Nsañu yekalamu muBayibolu ayisoneka munjila yinateli kutiyawu hohu antu akweti yilwilu yayiwahi. Antu akweti yilwilu yakudivwimba, adimonaña nawu “akwamaana niakwakashinshi”, akañanyaña kutiyishisha chahosha Bayibolu. Ilaña antu atañaña Bayibolu nayilwilu neyi “anyikeki”, yakudizoza nikufwila kudiza, ayikwashaña kutiyishisha mazu aNzambi. Nzambi wayisoneka Bayibolu munjila yayiwahi.

2. Bayibolu ayidizaña hohu kudi antu alombaña wukwashu kudi Nzambi kulonda ayitiyi. Yesu wahosheli nindi antu atela kulomba wukwashu hakwila atiyishi yuma yatañishileñayi. Anateli kutabula ñahi iwu wukwashu? Yesu walumbulwili nindi: “Nkwashi, spiritu yajila yakatemeshayi Tata mwijina dami, yakayitañisha yuma yejima nikuyanukisha yuma yejima.” (Yowanu 14:26) Dichi, Nzambi wahanaña spiritu yindi yajila, ñovu jindi jazataña, kulonda yakwasha antu kutiyishisha yuma yinakutañawu muBayibolu. Ilaña Nzambi hahanaña spiritu yindi kudi antu abulaña kushindamena hadi yenaku, dichi yabulilañawu kutiyishisha nsañu yamuBayibolu. Spiritu yajila yayinkaña akwakristu maana chikupu kulonda akwashi antu afwilaña kutiyishisha Bayibolu.—Yilwilu 8:26-35.

3. Nsañu yikwawu yamuBayibolu atela kuyitiya hohu kudi antu hampinji yatelela. Chakutalilahu, kaprofwetu Danyeli amulejeli kusoneka nsañu yahosheleña hayuma yakumbidi. Kañelu wamulejeli nindi: “Danyeli, jikaku mazu awa, lamikaku mukandiwu, ndo nikumpinji yakukuminina.” Hadi yaaka yayivulu yinahitihu, antu amavulu anatañi mukanda waDanyeli wamuBayibolu, ilaña atiyisha wanyi nsañu yekalamu. Kafwampi, niDanyeli yomweni hatiyishili nsañu yejima yasonekeliyiku. Wetejeli nindi: “Kutiya natiyili, ilaña kwiluka muchaya nehi.” Mukuhita kwampinji, antu anateli kutiya wuprofwetu waNzambi wasonekeliyi Danyeli, ilaña chiña hampinji yatoñolayi yomweni Nzambi. Kañelu walumbulwili nindi: “Eyi Danyeli, yaña kweyi: muloña mazu awa anayijiki, anayilamiki ndo nikumpinji yakukuminina.” Anyi anateli kutiyishisha mazu aNzambi? “Kwosi muntu watama wakeluka mwokuku; chiña akwamaana diwu akelukamu.” (Danyeli 12:4, 8-10) Hamwekeshaña mwalumbulukila nsañu yikwawu yamuBayiboluku, sampu mpinji yatoñolayi yinashiki.

Komana mpinji yinakojeji aYinsahu jaYehova kubula kutiyishisha nsañu yikwawu yamuBayibolu? Eña. Ilaña neyi mpinji yinashiki yakutiyishisha oyu nsañu chiwahi, aYinsahu ahimpaña kutiyishisha kwawu kwelukiluwu. Akuhwelela nawu embujolaña apostolu aKristu adizozeleña nakuhimpa yitoñojoka yawu neyi Yesu nakuyifumba.—Yilwilu 1:6, 7.

Chuma chamukojejeli iwu kansi wanyanya kutoñojoka mwaluwa kutalisha kwafumaña mavu, hikubula kutiyishisha. Hela chochu, yuma yatañishaña Bayibolu yalema. Nsañu yekala muBayibolu yalema chikupu, dichi muntu wejima watela kuyitiyishisha halwindi kuhitila mukutaña Bayibolu. Lombenu wukwashu kulonda ayikwashi kutiyishisha yuma yimunakutaña. Keñenu antu adizaña Bayibolu nayitoñojoka yakudizoza, antu ashindamenaña haspiritu yaNzambi yajila kulonda atiyishi Bayibolu, antu aneluki nawu tunakushakama mumpinji yashimunawu munsañu yanyaaka nawu Nzambi nakukeña nindi tutiyishishi chikupu Bayibolu. Bayi mushintajala kuyihula aYinsahu jaYehova hela kutaña nsañu yasandujolawu chiwahi yidi ha jw.org hawebusayiti yawuku. Bayibolu yakana nawu: “Neyi wakabilela neyi niiluki . . . , dihu hiwakamwena kwiluka Nzambi.”—Yishimu 2:3-5.