Yawaana yikwawu yalema muloña wakwila atwinkeliyu kudi muntu wukweti wuswa hela kudi muntu itwalemesha chikupu. Yawaana yikwawu hela chakwila yamwekanaña kuseka, twayilemeshaña muloña yafumini kudi muntu itwakeña wamuchisaka hela ibwambu itwakuhwelela. Ichi dichuma cheliliyi Jordan nachawaana chamwinkeliwu kudi Russell, itwashimuna muchibaaba chinafumihu. Chumichi chinesakani ñahi nachawaana chefutu danyiloña?

Chatachi, Bayibolu yahoshaña nawu, “Nzambi wamwekesheli kukeña kwindi hadi etu hakutemesha mukaayi Mwanindi wumu hohu kulonda tukatweshi kwikala nawumi kuhitila mudi yena.” (1 Yowanu 4:9) Chumichi dichaletesha ichi chawaana kwikala chalema. Kwosi muntu wamubadika Nzambi kulema. Kutalisha hadi yena, kaHeberu ñimbi yamasamu, wasonekeli nindi: “Yeyi wukweti ijina deyi daYehova, yeyi Mukwakubadika Kwiwulu deseki dejima.” (Masamu 83:18) Hitwateleleli kutambwila chawaana kudi mukwakubadikaku.

Chamuchiyedi, Nzambi diyi ‘Tata yetu.’ (Isaya 63:16) Munjilanyi? Watwinka wumi. Kubombelahu, watwakamenaña chikupu neyi chakamenañayi tata yawantu anyanindi. Chahosheleñayi nawantu jindi akushankulu adi neyi Efweremi, Nzambi wayihwili nindi: “Komana Efweremi himwanami inalemesha nawa inakeñaku? . . . Kumutoñojoka yena muchima wami mwivumu hiwukwenda. Chalala nakamutiyila wushona.” (Yeremiya 31:20) Nzambi watiyaña chochimu nawambuñindi makonu. Hekala hohu Nleñi yetu mukwakubadikaku, ilaña wekala cheñi Tata yetu nawa Ibwambu detu washinshika. Komana chumichi hichatuleñelaña  kulemesha chawaana chejima chafumaña kudi yenaku?

Yawaana yikwawu yekalaña yalema, bayi neyi ayihanini chakukanjikijaku, ilaña ayihanini chakufuma hamuchima. Muntu wahanaña chikupu hakeñaña nindi amufweti muloña waluwi lwindiku.

Nzambi watwinkeli Mwanindi muloña watwikeña. Bayibolu yahoshaña nawu, “Muloña wachumichi, Nzambi wamwekesheli kukeña kwindi hadi etu hakutemesha mukaayi Mwanindi wumu hohu.” Muloñadi chelililiyi mwenimu? “Kulonda tukatweshi kwikala nawumi kuhitila mudi yena.” (1 Yowanu 4:9) Komana Nzambi amukanjikijili hakwila yeli mwenimu? Inehi. “Ifutu danyiloña dahaniniyi Kristu Yesu” hinjila yamwekeshelelimu Nzambi “luwi lwindi lwasweja.”—Aroma 3:24.

Muloñadi chawaana chaNzambi chichekalila “luwi lwindi lwasweja”? Bayibolu yalumbulula nawu: “Nzambi wamwekesheli luwi lwindi hadi etu, muloña hampinji yitwadiña akwanshidi, Kristu watufwilili.” (Aroma 5:8) Kukeña kwalala kwamuleñeleli Nzambi kukwasha antu azeya, akadi wakuyikwasha nawa akwanshidi. Hitwachisulwililiku nawa hitwatela kumufweta Nzambiku. Chawaana chindi hichuma chamwekeshaña kukeña kwabadika muchihandilu chawantu.

Yawaana yikwawu yekalaña yalema muloña yamwekeshaña kudihana kwanowu muntu wunahani. Neyi muntu yatwinka chuma chalemeshayi nankashi, twachilemeshaña muloña nadihani.

Nzambi ‘wahanini Mwanindi wumu hohu.’ (Yowanu 3:16) Hateleleli kutwinka muntu wudi wejima akeñayiku. Hampinji yaleñeleñayi Nzambi yuma yejima, Yesu wazatileña nidi nawa “wamutiyishilaña kuwaha.” (Yishimu 8:30) Yesu ‘hiMwana kaNzambi akeñayi’ nawa “diyi chifwanisha chaNzambi abulaña kumonawu.” (Akolosi 1:13-15) Kanda kwikaleñahu dehi yileñaleña yiyedi yikweti maana yadikeña neyi wena.

Hela chochu, Nzambi ‘hamukañesheli Mwanindiku.’ (Aroma 8:32) Yehova watwinkeli chuma chasweja kukeñayi. Kwosi chawaana chabadika ichi.

Yawaana yikwawu yekalaña yalema muloña yatukwashaña muyuma yitunakankili chikupu niyuma yinakukeñeka swayi-swayi. Chakutalilahu, munateli kumusakilila nankashi muntu wadihanini kuyilandila yitumbu yakuyuuka nachu, yimwadi kubula kutwesha kulanda. Ichi chawaana chikwikala chalema wuseya, netuku?

“Neyi chochinakufwawu antu ejima kuhitila mudi Adama, chochimu nawa antu ejima akekala nawumi kuhitila mudi Kristu.” (1 Akorinda 15:22) Chineli tudi anyana kaAdama, wejima wetu “twafwaña,” nawa twakañanyaña kutemuka lumuna lwayikatu nikufwa hela kudikundamisha etu aweni kudi Nzambi kulonda twikali abula nyiloña kumesu indi. Chineli twakankila, hitunateli ‘kudihandisha’ etu aweni hela akwetuku. Bayibolu yahosha nawu: ‘Kwosi wukutwesha kumukuula mana kwindi hela hantesha, hela kumwinka Nzambi wuseya wakumukuula nachu kutwesha nehi . . . Kuwukuula wakala chikupu.’ (Masamu 49:7, 8) Twakeñaña wukwashu chikupu muloña tukutwesha wanyi kuhana wuseya wefutu danyiloña. Chakani yena kachi kwosi wakutukwasha.

Hamuloña wakukeña kwindi kwasweja, Yehova mukudikeñela waheni “yitumbu” yakutuuka nachu yitwakeñaña, kulonda ‘antu ejima akekali nawumi’ kuhitila mudi Yesu. Ifutu danyiloña delili ñahi chumichi? “Mashi aMwanindi Yesu atutookeshaña kunshidi jejima.” Eña, kukuhwelela mumashi aYesu apwekeli kwenzununa njila yakutwanakena nshidi yetu nikutambwila wumi  wahaya nyaaka. (1 Yowanu 1:7; 5:13) Nawa ifutu danyiloña dakeladi nawantaña jetu afwa dehi? “Chineli kufwa kwenjili kuhitila mudi muntu wumu, dikwila nawu kusañuka kwawafu nikwena kwenza kuhitila mudi muntu wumu [Yesu].”—1 Akorinda 15:21. *

Kwosi chawaana chahanawu kudi muntu wabadika hela chahanawu kushindamena hakukeña kwakweni kubadika mulambu waYesu. Kwosi watwinkahu dehi chuma chabadika neyi chatwinkeli Yehova Nzambi. Nawa kwosi chawaana chatwikwasha kubadika mulambu watusubula kunshidi nikukufwa. Eñañi, kwosi chawaana chinateli kwesakana kulema nefutu danyiloña.