MAKWITIYA amavulu ekala mukaayi, chidi neyi Chechi yawaKotolika, machechi amavulu awaOrthodox, Buddhism nimachechi amakwawu, akeñaña alomboli jawu niakulumpi jawu kubula kusumbula hela kusumbuka. Munjila yikwawu, antu amavulu amonaña nawu ilu lushimbi lunakojeji yaaku yatama yawuvumbi yelañawu akulumpi jakwitiya kwashiyashana.

Dichi, chachiwahi kwihula netu, komana kubula kusumbula hela kusumbuka hilushimbi lwamuNsona lwawakwaKristu? Hakwila twakuli ilu lwihu, tushinshikenu kwafuma ichi chilwilu, chichinatandi nichachimonañayi Nzambi.

Encyclopedia Britannica yalumbulula izu dakubula kusumbula hela kusubuka nawu, “hikushakama wujiki nikubula kwilahu wuvumbi, sweje-e nlomboli wamukwitiya.” Mu 2006 nsañu yahosheliyi Pope Benedict XVI kudi aCuria amuRoma, wesekejeli kubula kusumbula hela kusumbuka “nayaaku yachisemwa yadiñaku kunyima hadi yaaka yayivulu kwakwihi namafuku awaPostolu.”

Dichi, kubula kusumbula hela kusumbuka hichadiña chaaku chamukwitiya chelileñawu akwaKristu amuyaaka nkulakaji yakusambilaku. Kafwampi, kapostolu Pawulu, wadiñaku muyaaka nkulakaji yakusambila, wayisoñamishili akwakwitiya kutalisha hadi amayala akuhosha ‘mazu onenawu akuluwañesha nikukaanisha antu kudisumbula.’—1 Timotewu 4:1-3.

Mwadiña muyaaka nkulakaji yamuchiyedi mwatachikili ichi chilwilu chakubula kusumbula hela kusumbuka mumachechi ‘awakwaKristu’ akukabeta kambwela. Kwesekeja namukanda waCelibacy and Religious Traditions, ichi chilwilu “chadiña chesakana nansañu  yayiha yatandili yahosheleña hakubula kwila wuvumbi yadiñaku muWanta wawaRoma.”

Muyaaka nkulakaji yalondelelihu, akulumpi jachechi nimaFather amuChechi atandishili chaaku chakwila nawu abuleña kusumbuka hela kusumbuka. Atoñojokeleña nawu yilwilu yawuvumbi yatamishileña nawa yadiña yambukaku chikupu nanyidimu yawunlomboli. Hela chochu, Encyclopedia Britannica yashimwini nawu “kukumana kwayaaka nkulakaji yamuma 10 atupristu amavulu nimabishopu adiña nawambanda.”

Lushimbi lwakwila nawu akulumpi jakwitiya abuleña kusumbula hela kusumbuka alukolesheli hampinji yikwadiña kubulakana kwaLateran Councils mu 1123 nimu 1139 kwadiñaku muRoma nawa lunatwalekihu kwikala lushimbi lwalema lunakulondelawu anlomboli amuChechi yaKatolika makonu. Ilu lushimbi alushiliku kulonda chechi yibuli kujimbesha ñovu yachu nimaheta akisileñawu atupristu kuhitila mukuyisonekesha anyanawu kulonda akashali nayuma yachechi.

Chamonañayi Nzambi kubula kusumbula hela kusumbuka achishimuna hatooka Mwizu dindi, Bayibolu. MuBayibolu twatañañamu mazu aYesu ahosha hadi antu ashakamini wujiki neyi chadiñayi, “hamuloña waWanta wamwiwulu.” (Matewu 19:12) Hansañu yoyimu, kapostolu Pawulu niyena wahosheli hadi akwaKristu atondelihu kwikala ajiki neyi yena “muloña wansañu yayiwahi.”—1 Akorinda 7:37, 38; 9:23.

Hela chochu, Yesu niPawulu hiyahanineña lushimbi kudi akwaKristu lwakubula kusumbula hela kusumbukaku. Yesu washimwini nindi wujiki bayi neyi ‘hichawaana’ chinateli kwikala nawatumbanji twindi ejimaku. Pawulu chasonekeliyi kutalisha hadi “antu abula kwiñilahu dehi muwulu,” wahosheli hatooka to-o nindi: “Hinikweti mazu akuyileja anafumi kudi Mwantaku, ilaña inakuyileja mwinnatoñojoki.”—Matewu 19:11; 1 Akorinda 7:25, tumazu twaheshina.

Kubombelahu, Bayibolu yashimunaña nawu akwaKristu amavulu amuyaaka nkulakaji yakusambila, kushilahu nikapostolu Petulu, adiña amayala asumbula. (Matewu 8:14; Maku 1:29-31; 1 Akorinda 9:5) Kafwampi, hamuloña wayilwilu yawuvumbi yadiña muRoma hayina mpinji, Pawulu wasonekeli nindi neyi kalama mukwaKristu wasumbula, watela kwikala “iyala wasumbula mumbanda wumu hohu” nawa “wukweti anyana ovwahilaña.”—1 Timotewu 3:2, 4.

Awa bayi neyi adiña maluwi akubula kudikamaku, Bayibolu yashimuna nawu “iyala yamwinkeña ñodindi yuma yatela kumwinkayi,” nawa nawu antu adisumbula ‘bayi aduminaña yuma yatela kudinkawu’ mukadidiku. (1 Akorinda 7:3-5) Kuhosha hohu chalala, kubula kusumbula hela kusumbuka hilushimbi lwaNzambiku hela hichuma chatela kulondelawu akwaKristu ejimaku.

Neyi wujiki hilushimbi lwawakwaKristu ejima wanyi, muloñadi Yesu niPawulu chahamekeleliwu wujiki? Muloña wujiki wunateli kumukwasha muntu kwikala nampinji yeneni yakushimwina nsañu yayiwahi kudi antu amakwawu. Ajiki anateli kudihana chikupu, chineli hiyaswejaña kudakamena neyi chadakamenañawu antu adi muwuluku.—1 Akorinda 7:32-35.

Talenu chakutalilahu chaDavid, wafuukwilihu kuleka mudimu windi wanfwetu yayiwahi muMusumba waMexico nakuya kukadiluña kanyanya kumuCosta Rica nakudizisha antu chalala chamuBayibolu. Komana David watoñojokeli nindi wujiki diwu wamukwashili kwila mwenimu? Wahosheli nindi, “Eña.” “Chankalili hakwila ninjilili chihandilu chachiha, ilaña chineli nadiña nkawami, champeleleli kwinjilila.”

Claudia, mukwaKristu mujiki wunakuzatila kudi kukankila kwawakwakushimwina, wahosheli nindi: “Nadiluñishaña kumuzatila Nzambi. Chikuhwelelu niwubwambu wami naNzambi wunakoleliku chinamoni chinakuñakamenayi Nzambi.”

Wujiki hichiteli wanyi. Claudia wabombelelihu nindi: “Hichikweti muloñaku. Hela chakwila mudi muwulu hela mudi ajiki, munateli kwikala namuzañalu neyi mudihana kumuzatila Yehova Nzambi namuchima wenu wejima.”—Masamu 119:1, 2.