Blessing * Wayili kuEurope nakukeña mudimu wakuyinda nsuki. Ilaña hanyima yakumweta nankashi hadi mafuku 10, kushilahu nimpuhu yamadombu yatiyakeneña kumukala wawu, chamuleñeleli kutachika kuzata mudimu wawuvumbi.

Blessing wakuhweleleña kutambula 200 hela 300 euros hawufuku wumu kulonda yatweshi kufweta mukudi wamali akubadika ha 40,000 euros amupimininiwu kudi muntu wamwiñijili mudimu wawuvumbi. * Blessing walumbulwili nindi, “Kakavulu natoñojokeleña jakutemuka, ilaña natiyileña woma nami chisaka chami akuchimwesha kalula. Nakañenyi kutemuka.” Nsañu yindi yakala muloña antu akushika ku 4 miliyoni ayitadikili muwunduñu mukampani yamukaayi yakwila wuvumbi.

Kwakwihi nayaaka 4,000 yinahitihu, mukwenzi weyala wejina daYosefu amulandishili kudi amanakwindi. Wekalili nduñu muEjipitu kwitala damuntu walema. Kwambukaku naBlessing, Yosefu hatachi hiyamukabishileña kudi muntu wamutadikili muwuduñuku. Ilaña cheliliyi yakaana kukama nañoda nkaaka yindi, amutwikili muloña wakwila nawu wakeñaña kwila wuvumbi nañoda nkaaka yindi. Amumbilili mukaleya nawa amukasili mashimbi.—Kutachika 39:1-20; Masamu 105:17, 18.

Yosefu wadiña nduñu kunyima, ilaña Blessing wadiña nduñu muyaaka yamakonu. Wejima wawu adiña muwunduñu muloña wanichi chaaku chatachikili dehi kuyaaka chakukwata antu, bizinisi yeleñawu antu yakukabisha akwawu kulonda wena aheteleñamu.

Njita diyi yadiña njila yakukwatilamu anduñu hakachi kanyuza. Ashimuna nawu Mwanta Thutmose III wamuEjipitu wakwatili antu 90,000 akasiliyi, hanyima yanjita yadiñaku muKenani. A Ejipitu ayizatishileña nyidimu  yawuduñu yindi neyi kuzata munyigoti, kutuña matembeli nikupunda tumpila.

Muchiyuulu chaWanta wawaRoma, njita yaleñeleli anduñu kuvula nawa hamuloña wakukeña anduñu kwekalileña jinjita mpinji yikwawu. Esekeja nawu muyaaka nkulakaji yakusambila, anduñu avulili kwakwihi nakwesekana nachibalu chawantu adiña muRoma. Anduñu amavulu adiña muEjipitu nimuRoma adiña nakuyikabisha chikupu. Anduñu adiña nakuzata munyigoti yamuRoma ashakamineña hohu yaaka 30.

Mukuhita kwampinji, anduñu hiyayitiyilileña luwiku. Kufuma muyaaka nkulakaji yamuma 16 nakushika muma 19, bizinisi yakulanda anduñu kufuma muAfrica nakuyitwala kuAmerica diyi yadiña bizinisi yañovu chikupu hanu hamaseki. Chileji chaUNESCO chashimwini nawu ‘esekejeli nawu antu akushika 25 miliyoni hela 30 miliyoni amayala, ambanda nianyana ayisendeleña nakuyilandisha muwunduñu.’ Ahosha cheñi nawu antu amavulu afwili hakuzambuka kaluñalwiji kaAtlantic. Olaudah Equiano, nduñu wapulukili washimwini nindi: “Nyabu nikubilela kwabileleleñawu ambanda hamuloña wakufwa, kwamwekeshili nawu yuma yatamini chikupu.”

Chawushona, wunduñu bayi neyi hinsañu yatama yamwekeneña kuyaaka hohuku. Kwesekeja naInternational Labour Organization, antu akushika ku 21 miliyoni amayala, ambanda nianyana achidi kuzata neyi anduñu nawa anakuyizatisha chakadi kuyifweta hela kuyifweta kadali kanti. Anduñu amakonu azatilaña munyigoti, kumakampani kwatuñañawu mahina, kumakampani kwafwatulañawu matafwali, kumatala akwilila wuvumbi nikumatala awantu. Hela chakwila nshimbi yakanisha wunduñu, ilaña iwu wunduñu wunakuvulilaku.

Muloña wakuyiyandisha, anduñu amavulu afwilaña kusubuka. Muyaaka nkulakaji yakusambila B.C.E., muntu Mukwakuyizuñilaku akwawu hamu nawanduñu amakwawu akushika ku 100,000 afwilileña kudikaña nawaRoma, ilaña akañenyi. Muyaaka nkulakaji yamuma 18, anduñu ahachitutu chaCaribbea muHispaniola afumbukilili ankaaka jawu. Yihuñu yayimwesheliwu anduñu hampinji yayizatishileñawu mumatempa anyisachi, yaleñeleli kwikali njita hadi yaaka 13 muHaiti, chafuminimu adambwili mu 1804 nakudimena.

Hela chochu, kufuma kwawaIsarela muEjipitu, dikwadiña kukulika kwakweni kwakukufuma muwunduñu kwashimunawu munsañu yanyaaka yejima. Antu akushika ku 3 miliyoni hela netu muza wejima, awukulili kufuma muwunduñu muEjipitu. Mwamweni ateleleli kusubuka. Bayibolu yalumbulula chadiña chihandilu  chawu muEjipitu nawu “nyidimu yawu yejima yayikalakesheluwu ayikalakesheli nañovu hohu.” (Kwidika 1:11-14) Fwaro wumu washilimu kampeni yakujaha anyana kawaIsarela kulonda abuleña kuvula.—Kwidika 1:8-22.

Kufuma kwawaIsarela kuyihuñu yamuEjipitu kwadiña kwambukaku chikupu muloña Nzambi yomweni diyi wayifumishili. Nzambi wamulejeli Mosi nindi, “Ami neluki chakabañawu.” “Nasuluki dehi munu niyipulwishi.” (Kwidika 3:7, 8) Kufuma tuhu hayina mpinji nakushika nimakonu, aYudeya kwejima kwekalawu anakanaña Chipandakenu chaaka nichaaka kulonda anukeña idi ifuku.—Kwidika 12:14.

Bayibolu yahoshaña nawu, ‘Muloña kudi Yehova Nzambi yetu hikwekala kuheñaku’ nawa yatulejaña nawu hahimpaku. (2 Kushindulula 19:7; Malaki 3:6) Nzambi wamutemesheli Yesu, “nakuleja ankoli nsañu yakuyisubula . . . , kuumbaku antu akabishañawu.” (Luka 4:18) Komana iku kwadiña kusubula antu muwuduñu woweniwu wutweluka? Inehi. Yesu amutemesheli kulonda yasubuli antu kuwunduñu wanshidi nikufwa. Nkumininaku, wahosheli nindi: ‘Chalala chikuyifumisha muwuduñu.’ (Yowanu 8:32) Nimakonu, chalala chashimwininiyi Yesu chinakusubula antu amavulu munjila yashiyashana.—Talenu chikasha chinakwila nawu “Fumenu Munyichidi Yashiyashana Yawuduñu.”

Mwamweni, Nzambi wamukwashili Yosefu niBlessing kufuma muwunduñu munjila yashiyashana. Munateli kuwana nsañu yakuhayamisha yahosha hadi Yosefu mukapetulu 39 nakushika mu 41 mumukanda wamuBayibolu waKutachika. Wunsahu waBlessing wakukeña kusubuka niwena walema.

Hanyima yakumuhaña mwituña dimu damuEurope, Blessing wayili kuSpain. MuSpain wadiwanini nawaYinsahu jaYehova nawa watachikili kudiza nawu Bayibolu. Hakufwila kuwahishaku chihandilu chindi, wawanini mudimu wazatileñayi mpinji yejima nawa wamulejeli ona mumbanda kwazatileñayi hatachi kumukeheshelaku mali atela kumufwetañayi hakakweji kumukudi. Ifuku dimu, Blessing amutemesheleli foni kudi ona mumbanda. Wakeñeleña kumwanakena Blessing namukudi wadiñayi nawu nikumulomba nindi yamwanakeni. Chumanyi chaleñeleli? Iwu mumbanda niyena watachikili kudiza Bayibolu nawaYinsahu jaYehova. Blessing wahosheli nindi, “Chalala chakulaña muntu munjila jakuhayamisha.”

Yehova Nzambi waneñeli chayiyandishileñawu aIsarela muwunduñu muEjipitu; nimakonu dichatiyañayi hayuma yatama yinakumwekana. Eñañi, hakwila nyichidi yejima yawuduñu yimani, chihandilu chawantu chatela kuhimpika chikupu. Ilaña Nzambi washika kuleta iku kuhimpika. “Kudi mawulu amaha niiseki dadiha jitwatalilaña kwesekeja nachikaninu chindi, nawa mwenimu dimu mwakekalaña kuloña.”—2 Petulu 3:13