ICHI chawaana chabadika chatela kutuleñela kusakilila chikupu. Yesu wahosheli hanichi chikuma hanyima yakuuka amayala 10 adiña nachikatu chayizeyesheleña nawa chabulili yitumbu. Iyala wumu hakachi kanawa amayala 10 “wafuntili nakumulemesha Nzambi nezu datiyakana.” Yesu wahosheli nindi: “Komana antu ejima 10 hidiwu okewaku? Hanu dinu amakwawu 9 adi kudihi?” (Luka 17:12-17) Yumanyi yitunakudizilaku? Twanyakalaña kuvulamena luwi lwatumwekeshelañawu akwetu.

Ifutu danyiloña dambukaku chikupu nayawaana yikwawu. Hichawaana chabadika yawaana yatwinkawu. Hanu dinu, munateli kumwekeshaña ñahi kusakilila hachuma chayililayi Nzambi?

• Ilukenu muntu wahanini. Ifutu danyiloña hidashikenaña kuleta wumi wahaya nyaaka kudi antuku ejimaku. Hakulomba kudi Nzambi, Yesu wahosheli nindi: “Iwu diwumi wahaya nyaaka, wakukwiluka eyi Nzambi walala wumu hohu, ninowu iwatemesheli Yesu Kristu.” (Yowanu 17:3) Neyi muntu yayileja nindi wayipulwishili hampinji yimwadiñi kansi, kwila mukeña kumwiluka iwu muntu  nichuma chaletesheli yayipulwishi nehi? Yehova Nzambi, wahanini chawaana chakutupulwisha nachu chefutu danyiloña, wakeñaña nindi mumwiluki nawa mwikali amabwambu jindi. Bayibolu yatwikoleshaña nawu, “Swinenu kwakwihi naNzambi, niyena wukuswina kwakwihi nanenu.”—Yakoba 4:8.

• Kuhwelelenu mwifutu danyiloña. “Muntu wamukuhwelelaña Mwana wakekala nawumi wahaya nyaaka.” (Yowanu 3:36) Kukuhwelela chalumbulukadi? Chalumbuluka kwilahu chuma chimu; hakwila mukuhweleli mwifutu danyiloña mwatela kwilahu chuma chimu. (Yakoba 2:17) Chumanyi chimwatela kwila? Munateli kutambwila chawaana neyi mwila yuma yinakukeñeka nawa muchiteja. Dichi mwatela kuzata nañovu nikwiteja ifutu danyiloña. Munjilanyi? Ilukenu yuma yinakukeñayi Nzambi nindi mwileña muchihandilu chenu nawa ilenuña kwesekeja nachinakukeñayi. * Mulombenu Nzambi yayanakeni nawa mwikali nachinleji chitooka. Lombenu kudi Nzambi nakukuhwelela nenu ifutu danyiloña dakaleta kuwunda kwahaya nyaaka, kukiñewa nichihandilu chachiwahi kudi antu ejima akuhwelela mwifutu danyiloña.—Aheberu 11:1.

• Yenu kuChanukishu chakufwa kwaYesu. Yesu watachikili chidika chekalañaku hachaaka-hachaaka chatwanukishaña ifutu danyiloña. Kutalisha hakwanakana ichi chidika, wahosheli nindi: ‘Ilenuña mwenimu hakuñanakana.’ (Luka 22:19) A Yinsahu jaYehova akanakanaña kufwa kwaYesu haChiyedi, April 11, 2017, hanyima yakuhuma kwetañwa. Iyi progilamu yekala yaora yimu, nawa mwakekala mpanji yikalumbulula kulema kwakufwa kwaYesu, chikwaletaña nkisu makonu nikumbidi. Chaaka chinamani, antu akushika ku 20 miliyoni enjili kuChanukishu mwahita kaayi kejima. Tudi namuzañalu hakuyitambika netu mwakenzi nakwanakana nanetu kulonda twakamwekeshi kusakilila hachawaana chabadika chatwinkayi Nzambi.