KASOÑESHU kadi mumakasa aJordan kadi neyi watu, kanakumwekana neyi kamukukulwayi. Ilaña hichuma chimu chalemeshayi chikupu. Jordan walumbulwili nindi, “Russell, muntu wachikulumpi wadikundili nachisaka chetu, diyi wanyikeli hampinji yinadiña kansi”. Chafwiliyi Russell, Jordan welukili nindi Russell wadiña nakuyikwasha chikupu ankaaka yindi nianvwali jindi, wayikwashileña neyi anaholokeli muyihuñu. Jordan wahosheli nindi, “Chineli neluki yuma yayivulu hadi Russell, aka kachuma kanyikeliyi kalema chikupu kudami.”

Kufwana chuma chamwinkeliwu Jordan, chawaana chinateli kumwekana neyi chalema nankashi wanyi hela chalema wanyi kudi antu amakwawu. Hela chochu, kudi muntu anenkiwu wasakililaña, chekalaña chalema nawa chawuseya nankashi. Bayibolu yalumbulula chawaana chasweja kulema munawa mazu itweluka chikupu nawu: “Nzambi wakeñeli nankashi kaayi chakwila watemesheli Mwanindi wumu hohu, kulonda muntu wejima wukumukuhwelela yakabuli kujilumuka, ilaña yakekali nawumi wahaya nyaaka.”—Yowanu 3:16.

Chawaana chinateli kumwinka muntu wunachitambwili wumi wahaya nyaaka! Kwekalahu chawaana chidi chejima chasweja kulema? Antu amakwawu hiyanateli kwiluka kulema kwanichi chawaanaku, ilaña akwaKristu alala eluka nawu ‘chalema chikupu.’ (Masamu 49:8; 1 Petulu 1:18, 19) Hanu dinu, muloñadi Nzambi chahaniniyi wumi waMwanindi kwikala chawaana chamukaayi?

Kapostolu Pawulu walumbulwili chuma chaletesheli, hakuhosha nindi: “Chocheñilili nshidi mukaayi kuhitila mudi muntu wumu, nikufwa nikwena kwenjili kuhitila munshidi, dichi kufwa kwataandili kudi antu ejima.” (Aroma 5:12) Iyala watachi, Adama, wavulumwini kuhitila mukudikaña naNzambi mumushikila  nawa wafwili. Kuhitila mudi Adama, kufwa kwashikeneni anyanindi ejima, dikwila nawu antu ejima.

“Wufwetu wanshidi, hikufwa, ilaña chawaana chahanañayi Nzambi, hiwumi wahaya nyaaka mudi Kristu Yesu Mwanta wetu.” (Aroma 6:23) Hakwila antu ayamwini kukufwa, Nzambi watemesheli Mwanindi, Yesu Kristu hamaseki, kulonda yahani wumi windi wawanina mukaayi. Kuhitila muniwu mulambu ‘wefutu danyiloña’ ejima akumukuhwelela Yesu akekala nawumi wahaya nyaaka.—Aroma 3:24.

Kutalisha hankisu jejima jakenkayi Nzambi akwakudifuukula indi kuhitila mudi Yesu Kristu, Pawulu wahosheli nindi: “Tumusakililenu Nzambi hachawaana chindi chabadika chikupu chakukañanya nimwakuchilumbulwila.” (2 Akorinda 9:15) Eña, ifutu danyiloña hichawaana chabadika chikupu chakukañanya nimwakuchilumbulwila. Hanu dinu, hakachi kayawaana yayiwahi yejima yenkayi Nzambi antu, muloñadi ifutu danyiloña chidaswejela kulema? Munjilanyi mudambukila chikupu nayawaana yikwawu yahanayi Nzambi? * Nawa tunateli kwila ñahi nanichi chawaana? Tunayikoleshi kutaña ñakwilu yamuBayibolu yanawa malwihu muyibaaba yiyedi yinalondelihu.