“BASI yiyeña, ilaña iwu mukwenzi muChinese yashali!” Alexandra watiyili antu anakuhosha awa mazu hampinji yadiñayi mubasi nakutalila kulonda yahiti haboda yamatuña ayedi amuSouth America. Wasulukili nakutala jamwekeneña, waweni mukwenzi wakuChina nakudisuma-suma muchiSpanishi hakuyilumbulwila atupokola ahaboda kukala kwamumwekeneni. Chineli Alexandra wadizili chiChinese muchipompelu chawaYinsahu jaYehova, wadiheni kulonda yamukwashiku kubalumuna.

Iwu iyala wahosheli nindi wadiña nayipapilu yakunfulumendi yakumwiteja kushakama mwituña, ilaña amakombi amwiyili yipapilu yeniyi nimali. Hakusambila kapokola wakaanini nawa wamwilili Alexandra nindi nakwiñija antu mwituña chakadi lusesa lwanfulumendi. Nkumininaku, wetejeli mwahosheliyi iwu iyala, ilaña oku kuhalwa, amufwetesheli mali muloña wakubula yipapilu yalala. Chineli hadiña namaliku, Alexandra wamukongwesheli $20. Iwu iyala wamusakililili nankashi nawa nindi wakamufuntishila mali amavulu akubadika ha $20. Alexandra wahosheli nindi hakeñeleña kumwinka wulokuku, ilaña nindi wakeñeleña hohu kumukwasha muloña dichuma chachiwahi. Wamwinkeli iwu iyala nyikanda yashindamena haBayibolu nakumuleja nindi yakatachiki kudiza nawaYinsahu.

Nsañu yakukwasha antu itwabula kwiluka yatuzañaleshaña, nawa tunakuhweleli netu ejima ekala mukwitiya kwashiyashana niabula kwitiya elaña chochimu. Neyi mwadiña enu, komana mwadi kumwekesha muchima wamuchidiwu? Twatela kutoñojoka hanilu lwihu muloña Yesu wahosheli nindi: “Mukuhana mwekala muzañalu chikupu kubadika wekala mukutambwila.” (Yilwilu 20:35) Asayantisiti niwena dichahoshañawu muloña akwakusandujola anachiwani nawu kuhana kwakwashanaña. Tutalenu kuhana chikwawahila.

Antu amavulu ahoshaña nawu kuhana nimuzañalu hiyuma yendelaña hamu. Kapostolu Pawulu wasonekeli nindi, “Nzambi wakeña muntu wahanaña namuzañalu.” Wahosheleña hadi akwaKristu ahanini chikupu yawaana yakukwasha nachu akwawu akwaKristu adiña mulukadi. (2 Akorinda 8:4; 9:7) Pawulu hadiña nakuhosha nindi ahanini muloña adiña namuzañaluku. Ilaña adiña namuzañalu, muloña ahanineña.

Mwamweni, kwesekeja nakusandujola kumu kuhana “kwaleñelaña woñu kuzata chachiwahi, kuhanjeka chiwahi nikukuhwelela, kwikala namuzañalu ‘wafumaña mukuhana.’ Kusandujola kukwawu nikwenu kwahosheli nawu “kumwinka muntu mali kwamuleñelaña wunahani kuzañalala kubadika chinateli kutiyayi neyi yayizatisha yomweni.”

Mwatoñojokahu dehi jakuhana ilaña himwekala nayuma yimwatela kuhanaku? Walala wudi wakwila nawu muntu wejima nateli kwikala namuzañalu wafumaña mukwikala “muntu wahanaña namuzañalu.” Neyi wunakuhana chawaana namuchima wumu, chawaana hichakehañaku. Chinsahu chaYehova wumu watemesheli iyi nsañu kudi akwakusoneka ayinu magazini hamu nachawana chahaniniyi nindi: “Hadi yaaka yejimiyi nadiña nakuhana hohu tumali  twantesha Mwitala daWanta.” Kubombelahu, watwalekelihu nindi: “Yehova Nzambi nanyiki mali amavulu kubadika mali inahanineña. . . . Kusakililaku hakunkwasha kulonda nihani ichi chawaana, Chazañaleshaña.”

Bayi neyi twatela kuhana hohu maliku. Kudi yuma yikwawu yayivulu yitwatela kuhana.

Bayibolu yahosha nawu: “Muntu wekala naluwi wadiwahishaña yomweni; ilaña nkatu wakabishaña mujimba windi yomweni.” (Yishimu 11:17) Antu akwetu luwi ahanaña, afwilaña kudihana aweni, kuzatisha mpinji yawu, ñovu niyuma yikwawu. Kuhana kwamuchidiwu kwayikwashaña munjila yashiyashana nawa kwayikwashaña nikumujimba.

Kusandujola kwakuvulu kwamwekeshaña nawu antu adihanaña nakukwasha akwawu akataña hohu yivuku yantesha, ilaña hiyaswejaña kudakamenaku. Kakavulu, adiluñishaña chihandilu chachiwahi. Kuhana namuchima wumu kwakwashaña antu akweti yikatu yakala kuuka, yidi neyi yikatu yazeyeshaña hela HIV. Ashimuna cheñi nawu antu ateñukili nawalwa akwashaña akwawu, akeheshaku chineñi nikuwahishaku chihandilu chawu.

Chinekali mwenimu muloña, ahosha nawu “kumutiyila muntu wushona niluwi kwakwashaña muntu kubula kwikala nayitoñojoka yatama.” Kuhana kwakeheshañaku chineñi niBP. Antu ajimbesha enu kwawu akeheshañaku chineñi neyi akwashaña akwawu.

Hitwatela kukaanaku. Muloña kuhana kwakwashanaña.

Yesu wakolesheli atumbanji twindi nindi: “Hanenuña, ninenu antu akuyinkaña. Akahuñunwina muyisweku yenu chesekelu chachiwahi, chakushikija, chakunyikumuna nawa chinakusumpoka. Muloña chesekelu chimunakwesekelaku nachu akwenu, dichi chakayesekelawu nachu ninenu nawa.” (Luka 6:38) Neyi muhana, antu asakililaña chikupu hamuchima wenu wakuhana nawa niwena akwikala akwakuhana. Dichi kuhana kwaleñelaña antu kudikunda nikuzatila hamu.

Akwakusandujola adiza hansañu yawubwambu wawantu eluka nawu, “antu atwalekañahu kumwekesha kukeña aleñelaña akwawu niwena kumwekesha kukeña.” Kafwampi, “kutaña nsañu yahosha hakwikala nayilwilu yaluwi kwayisañumunaña antu kuhana.” Dichi, kwesekeja nakusandujola kumu kwahosha nawu, “muntu wudi wejima muchituñilu nateli kuleñela antu amavulu, kushilahu niantu abula kwilukayi hela abula kumonayi kwikala nachilwilu chakuhana.” Munjila yikwawu, kachuma kantesha kimukuhana kanateli kuleñela antu ejima amuchituñilu kutachika kuhana. Komana himunakukeña kushakama mwiluña mudi chilwilu chamuchidiwuku? Eñañi, mwafumaña yuma yayivulu yayiwahi neyi antu amavulu atachika kuhana.

Wunsahu wumu wamwekeshaña ichi chikumu chachiwahi wafumini muFlorida, U.S.A. Izanvu dawaYinsahu jaYehova dadihanini kuzata mudimu wakukwasha hampinji yikwahitili mpepela yeneni.  Hampinji yahembeleleñawu yikuñu yakuwahisha nachu itala diyayileña nakuzatilahu, amweni mpwembu yantuñi yaniwu muntu awahishilileñawu itala yinahumuki nawa adihanini kuyiwahisha. Chimwahitili mpinji, iwu ntuñi wasonekeli mukanda kukasanji keneni kawaYinsahu jaYehova nakuhosha nindi, “Nukusakililaña hohu haya nyaaka. Awa antu hiyantu amawahi chikupu adi hakachi kawantu inamonahu dehi.” Hakwila yamwekeshi kusakilila kwindi, watemesheli chawaana chakuzatisha kumudimu wateneneñayi nindi mudimu wawaYinsahu wabadika.

Wunsahu wawanawu asayantisiti akwakusandujola wamwekeshaña nawu “kudi chuma chalema chayileñelaña antu akwasheña akwawu.” Kusandujola kwahosha nawu anyana, “atachikaña kumwekesha yilwilu yaluwi henohu kanda atachiki kuhosha.” Muloñadi? Bayibolu yakula ilu lwihu chiyahosha nawu antu ayileñeli “neyi chekalayi yomweni,” dikwila nawu, ekala nayilwilu neyi yekala naNzambi.—Kutachika 1:27.

Kuhana hichilwilu chimu chekala hayilwilu yayiwahi yekala naNleñi yetu, Yehova Nzambi. Watwinka wumi niyuma yejima yitwakeñaña hakwila twikali namuzañalu. (Yilwilu 14:17; 17:26-28) Tunateli kumwiluka Tata yetu wekala mwiwulu ninkeñelu yindi yayiwahi yikwetiyi hadi etu, kuhitila mukudiza Izu dindi, Bayibolu. Iwu mukanda washimuna cheñi nawu Nzambi watuloñeshela yuma yayiwahi kumbidi. * (1 Yowanu 4:9, 10) Chineli Yehova Nzambi diyi Nsulu yakuhana nawa watuleñeli neyi chekalayi yomweni, hitwatela kuhayamaku hakwiluka netu kumwimbujola Nzambi kuhitila mukuhana hichuma chachiwahi nawa kukuyileñela kwikali nankisu yindi.—Aheberu 13:16.

Munakumwanuka Alexandra, ashimunawu kumatachikilu achinu chibaaba? Yumanyi yafumini muchuma cheliliyi? Hela chakwila mukwawu adiñayi nindi mubasi wamuseheleña nindi mali indi anayi mumenji, ona iyala akwashiliyi wahanjekeli nawamabwambu jindi ekala mumusumba mwemanaña mabasi nawa wafweteli ayina nkongoli yamali akushika ku $20 chakadi kulaba. Kuhiñahu, iwu iyala wazatili kwesekeja nachamulejeliwu kudi Alexandra nawa watachikili kudiza Bayibolu. Chimwahitili tukweji tusatu watiyili kuwaha hakudimona nindi hakupompa kwawaYinsahu jaYehova kwadiñaku mwidimi daChinese muPeru. Hakwila yamwekeshi kusakilila hayuma yejima yamwililiyi Alexandra, iwu iyala wamutambikili Alexandra niejima ayiliyi nawu kukupompa kuya nakuda kulesitilanti yindi.

Kuhana nikukwasha amakwawu kwaletaña muzañalu chikupu. Nawa cheñi, neyi munakuhana munateli kukwasha antu amakwawu kumwiluka Yehova Nzambi, Nsulu yakuhana kwayuma yayiwahi. (Yakoba 1:17) Komana munakudiluñisha nkisu yafumaña mukuhana kwamuchidiwu?