Nsañu yawakwakwendela hatuwalu awana yinateli kutiyakana neyi yawenyi nawa yakutiyisha woma, ilaña bayi yiyitiyisha womaku. Muloñadi? Muloña Bayibolu niyuma yinakumwekana makonu yinakutukwasha kwiluka chikupu yuma yinakwimenaku awa akwakwendela hatuwalu. Hela chakwila ñendelu yawu yinakwimenaku yihuñu hanu hamaseki, yinateli cheñi kwikala nsañu yayiwahi kudi enu nichisaka chenu. Munjilanyi? Chatachi, tushinshikenu yuma yemenañaku awa akwakwendela hatuwalu ejima.

Ichi chimwenu chatachika ñana: “Chinelili nami nitali, namweni kawalu katooka, nawa owu washakamini hanaka kawalu wadiña nawuta wamukunji; amwinkeli nichibaaba nawa wayileña iku nakwimika mushindu kulonda yamanishi kwimika mushindu kwindi.”—Chimwekeshu 6:2.

Mukwakwendela hakawalu katooka hinyi? Chuma chinateli kutukwasha kumwiluka chekala muBayibolu, mumukanda waChimwekeshu, amulumbulula iwu mukwakwendelahu wamwiwulu nawu “Izu daNzambi.” (Chimwekeshu 19:11-13) Iyi nkumbu yakwila nawu, Izu, yakundama kudi Yesu Kristu, muloña diyi mukwakumuhoshelaku Nzambi. (Yowanu 1:1, 14) Kubombelahu, amutenaña cheñi nawu “Mwanta wawanyanta nawa Nkaaka yawankaaka,” amulumbulula cheñi nawu “Washinshika nawa Walala.” (Chimwekeshu 19:16) Mwamweni, wukweti wuswa wakuzata neyi mwanta wañovu nawa hazatishaña ñovu jindi chatama hela munjila yaheñaku. Ilaña, antu anateli kwihula nawu.

Hinyi wamwinkeli Yesu wuswa wakwimika mushindu? (Chimwekeshu 6:2) Kaprofwetu Danyeli wamweni chimwenu chamwekesheleña Mesiya anamwesekeji “namwana kamuntu,” nawa amwinkeli “kuyuula, mpuhu niwanta” kudi “Wanyaaka nanyaaka,” Yehova Nzambi. * (Danyeli 7:13, 14) Dichi, Nzambi Mukwakubadika diyi wamwinkeli Yesu ñovu niwuswa wakuyuula nikusompesha. Kawalu katooka hichinjikijilu chemenañaku njita yakasayi Mwana kaNzambi, kakavulu Nsona yazatishaña wulombu wutooka kwimenaku kuloña.—Chimwekeshu 3:4; 7:9, 13, 14.

Mpinjinyi yatachikiliwu akwakwendela hatuwalu kwenda? Ilukenu nenu, mukwakwenda watachi, Yesu, watachikili kwenda mpinji yatambwiliyi chibañula. (Chimwekeshu 6:2) Mpinjinyi yamuvwikiliwu Yesu chibañula neyi mwanta mwiwulu? Hiyadiña mpinji yafuntiliyi mwiwulu hanyima yakufwa kwindiku. Bayibolu yashimunaña nawu chafuntiliyi mwiwulu wachiñililili. (Aheberu 10:12, 13) Yesu wayikwashili atumbanji twindi kwiluka hakumini kuchiñilila kwindi nimpinji yatachikili kuyuulayi mwiwulu. Wahosheli iyi nsañu hakutachika kuyuula, yuma mukaayi yakataminaku chikupu. Kwakekala njita, nzala yakapwelendendi niyipupu yasweja. (Matewu 24:3, 7; Luka 21:10, 11) Chelili Njita yaKaayi yatachi yitachiki mu 1914, chamwekeni hatooka to-o nawu antu aneñili dehi muniyi mpinji yayihuñu hamaseki yatenawu muBayibolu nawu “mafuku akukuminina.”—2 Timotewu 3:1-5.

Kutachika tuhu hampinji yatambwiliyi Yesu chibañula chindi mu 1914, muloñadi yuma chiyinakutaminaku nankashi, chatela yiwahiliku? Muloña haniyi mpinji Yesu watachikili kuyuula mwiwulu bayi hamasekiku. Mwiwulu mwatachikili njita, Yesu mwanta wamuha aswanyikiliwu atenañawu nawu Mikeli, wamunatilis Satana niandemoni jindi hamaseki. (Chimwekeshu 12:7-9, 12) Kufuma tuhu hayina mpinji yamunatiliwu, Satana nahili chikupu, chinelukiyi nindi nashali hohu namafuku antesha. Mwamweni, katataka Nzambi yeli nkeñelu yindi yakumujilumuna Satana hanu hamaseki. (Matewu 6:10) Ichi dinu, tushinshikenu hadi akwakwendela hatuwalu amakwawu asatu chinakumwekeshawu nawu tunakushakama munawa mafuku ayihuñu, “mafuku akukuminina.” Kwambukaku namukwakwendela hakawalu watachi wunakwimenaku muntu wumu,  awa akwakwendela hatuwalu asatu analondelihu anakwimwenaku yihuñu yinatandi mukaayi yinakumwesha antu kalula.

“Kawalu kakwawu kachinana kedikili, nawa owu washakamini hanaka kawalu amwinkeli wuswa wakufumishahu kuwunda hamaseki kulonda antu adijaheña wumu namukwawu, nawa amwinkeli mpoku yakabali yeneni.”—Chimwekeshu 6:4.

Iwu mukwakwendelahu nakwimenaku njita. Ilukenu nenu wafumishaña kuwunda bayi neyi hamatuña antesha hohuku, ilaña heseki dejima. Mu 1914, kwavulumukili njita yatachi yakaayi kejima. Halondeleli njita yakaayi yamuchiyedi, yajilumwini antu chikupu. Esekeja nawu mumaluña amakwawu antu akubadika ha 100 miliyoni anafwi nanjita kufuma tuhu mu 1914. Cheñi, antu amavulu anayikatishi chikupu.

Njita yinakumwekesha ñahi nawu tunakushakama mumafuku akukuminina? Chinamwekani hatooka to-o nawu, antu adi nawuswa wakujilumuna mawumi awakwawu. Ninyitayi yatenañawu nawu yaletaña kuwunda, chidi neyi United Nations, yinakañanyi kumukañesha iwu mukwakwendela hakawalu kachinana.

“Chinelili nami nitali, namweni kawalu keyila, nawa owu washakamini hanaka kawalu wadiña napezu muchikasa chindi. Mukachi kayileñaleña yayumi yiwana, natiyilimu chuma chatiyakeneña neyi izu dahosheleña nadu: ‘Kwati yimu yatidiku, wuseya wayu hidenari yimu, nawa makwati asatu abali, wuseya wawu hidenari yimu; nawa bayi wukisañana manji amuolivi nivinyuku.’”—Chimwekeshu 6:5, 6.

Iwu mukwakwendela hakawalu nakwimenaku nzala yakapwelendendi. Haniyi nsona anatuleji nawu wuseya wayakuda wunakutohelaku chakwila kwati yimu (1.08 L) yatidiku wuseya wayu hidenari yimu, nfwetu yamwinkeleñawu muntu kunyima neyi nazati ifuku dejima! (Matewu 20:2) Denari yimu wunateli kulandamu makwati asatu (3.24 L) abali, mbutu yamweneñawu nawu yaholoka wuseya kubadika tidiku. Munateli kwikala namadenari añahi hakwila mudiishi chisaka? Antu ayisoñamishili nawu anzeña yakuda, elileña mwenimu nayuma yejima yadiñawu nayu chidi neyi manji amuolivi nivinyu.

Kufuma tuhu mu 1914, komana hitunakumona yuma yinakumwekesha nawu iwu mukwakwendela hakawalu keyila natwalekihu kwendaku? Tunakuyimona! Antu akushika ku 70 miliyoni afwili nazala yakapwelendendi muyaaka nkulakaji yamuma 20. Nsoneki wumu wesekejeli nindi, “Kufuma mu 2012 kushika mu 2014, antu 805 miliyoni, dikwila nawu muntu wumu hadi antu 9 mukaayi akatili, muloña wakukeha kwayakuda.” Chileji chikwawu chesekejeli nawu, “Nnzala yinakujaha antu amavulu hachaaka-hachaaka kubadika anakufwa naAIDS, maleriya niTB.” Hela chakwila anakuzata nañovu kulonda adiishi antu adi nanzala, mukwakwendala hakawalu keyila natwalekihu kwenda.

“Chinelili nami nitali, namweni kawalu katookoloka, owu washakamini hanaka kawalu wadiña nejina dakwila nawu Kufwa. Nawa Ijamu damulondeleleña mukamwihi. Dichi ayinkeli wuswa hachibalu chimu chamuchiwana cheseki kulonda ajaheña antu nampoku yakabali yayilehi, nanzala yakapwelendendi, nachipupu chajahanaña ninawanyama amwisaña ayisumi.”—Chimwekeshu 6:8

Mukwakwendelahu wamuchiwana nakwimenaku kufwa muloña wayipupu niyuma yikwawu. Chamanini tuhu chaaka cha 1914, chikatu chaSpanish flu chajahili antu amavulu. Hadaha antu akushika ku 500 miliyoni akatili, dikwila nawu muntu wumu hadi antu asatu wakatili.

Ilaña ichi chikatu chaSpanish flu chadiña hohu neyi ntachikilu. Ankuluñaña esekejeli nawu antu amavulu afwili nachikatu chakusaluka mabobela muyaaka nkulakaji yamuma 20. Nimakonu, antu amavulu anakufwa nachikatu chaAIDS, TB nimaleriya, hela chakwila akwakusandujola anakuzata nañovu nawu amanishi iyi yikatu.

 Wejima wawu anakufwa, hela anakufwa nanjita, nzala yakapwelendendi hela yipupu. Ijamu dinatwalekihu kuloñejeka antu anakufwa, chakwila hiyakweti kuchiñejaku.

Mpinji yayihuñu yidiku makonu katataka yimani. Anukenu nenu: Mu 1914 Yesu ‘wayili nakwimika mushindu,’ nikumunatila Satana hamaseki, ilaña hamanishili kushinda kwindiku. (Chimwekeshu 6:2; 12:9, 12) Katataka, haAmagedoni, Yesu yafumishihu yuma yatama yinakuleta Satana nikujilumuna antu ejima anakumukwasha Diyabolu. (Chimwekeshu 20:1-3) Yesu hakafumishahu hohu awa akwakwendela hatuwalu asataku, ilaña wakafuntishahu cheñi yuma yejima yinakisañaniwu. Munjilanyi? Talenu yuma yashiika Bayibolu.

Chatela kwakeli njita, kwakekala kuwunda. Yehova “wakumishaña majita mwakumina iseki dejima. Wakotolaña wuta wamukunji; wakotolaña iyoña hakachi kotu.” (Masamu 46:9) Antu awunda, “akatiya kuwaha nankashi nakushakama chachiwahi chamwena.”—Masamu 37:11.

Chatela kwakekali nzala yakapwelendendi, kwakekala yakuda yayivulu. “Hanu hamaseki hansa jampidi jamaneni hakavula kabaka.”—Masamu 72:16.

Chatela kwakekali yipupu nikufwa, antu ejima akadiluñisha chihandilu chachiwahi niwumi wahaya nyaaka. Nzambi “wakakombola madilu ejima kumesu awu, kufwa hikwakekalaku cheñiku, nawa hikwakekala cheñi kudishona, kudila hela kukataku.”—Chimwekeshu 21:4.

Hampinji yadiñayi Yesu hanu hamaseki, wamwekesheli yuma yayiwahi yikakoñayi kumbidi muchiyuulu chindi. Wamwekesheli kuwunda, wadiishili makombakaji awantu muchihayamisha, wokili akata nikusañula afu.—Matewu 12:15; 14:19-21; 26:52; Yowanu 11:43, 44.

A Yinsahu jaYehova akutiya kuwaha kuyilejaku muBayibolu yenu chimunateli kudiloñesha kuyuma yikamwekana neyi awa akwakwendela hatuwalu analeki dehi kwenda. Mukwiteja wanyi kudizilaku nsañu yayivulu?