Nakulilili muPuerto Limón, mumusumba wakuchikumu chakumusela waCosta Rica. Anvwali jami adiña nawanyana 8, ami yami nadiña wamu naamba 7. Atata afwili hampinji yinadiña nayaaka 8. Kuhiñahu amama atwihembeli wejima wetu nkawawu.

Nahemeneña nankashi ngunja muchihandilu chami. Chinadiña kansi natiyileña kuwaha yisela yangunja. Chinashikijili yaaka yakubadika ha 13 nayili nakwiñila mwizanvu dangunja dawantu abula kwilukisha. Iku nichidi kuhema munidi izanvu, hinadiña muyaaka yamuma 20 mukwakukeñakeña anhemi wañilili nindi niyi nakuhema mwinzavu dawantu eluka ngunja muNicaragua. Hela chochu, hamuloña wakwila amama akatileña nawa iyami nayihembelaña, nakeñeli wanyi kuyishiya nakuya kuNicaragua. Dichi nakaanini kuya. Mukuhita kwampinji mukwakuñeñakeña anhemi mukwawu wañilili nindi nikahemi mwitimu damuCosta Rica, hamu nawakwakuhema ngunja amakwawu atondeliwu. Haniyi mpinji netejeli. Nahemeni kufuma mu 1949 kushika nimu 1952 nawa nahemeni ngunja jajivulu muCuba, Mexico nimuNicaragua. Nahemeneña chikupu, nawa nasili jingunja 17 chakubula kuluwañesha. Natiyileña kuwaha neyi antu anakunhameka chinahemeneña.

Chawushona, natachikili kwila wuvumbi. Hela chakwila nadiña nakajila kami wumu hohu, ilaña nakamineña nawambanda amakwawu. Nawa nanwineña walwa chikupu. Ifuku dimu nasheteli chikupu chakwila chinahindukili bwididi nelukili wanyi chinafuntili kwitala. Nahemeneña cheñi yisela yalwisu.

Hampinji yinelileña yuma yejimiyi, amama ekalili aChinsahu chaYehova. Esekeli nañovu yawu yejima nawu nitachiki kudiza chalala ilaña akañenyi hatachi muloña nateñukili nayisela yinadiña nakuhema. Neyi inakuhema natiyileña wanyi nzala. Yitoñojoka yami yadiña hohu hakuhema. Nakeñeli kuhema yisela yangunja kubadika yuma yidi yejima.

Hela chochu, chinashikijili yaaka 29, nadikatishili chikupu  hakufwila kukwata ngunja hampinji yitwahemeneña. Chinakoleli nalekeli kwasa ngunja. Ilaña, natachikili kudizisha kadizanvu kadiña kwakwihi nakumukala wetu.

Mu 1957, netejeli mutambi wakuya nakupompa kukupompa kweneni kwawaYinsahu jaYehova kwadiña mwibulu mutwahemeneneña ngunja. Chinashakamini mwizaza, namweni chaambu chadiña hayilwilu yayiwahi yamwekesheleñawu aYinsahu jaYehova nayinamweni hadi antu enjileña nakutala ngunja. Yuma yinamweni hakupompa yanletesheli kutachika kudiza Bayibolu nawaYinsahu nikuya kukupompa.

Natiyili kuwaha nayuma yayivulu yinadizili muBayibolu. Chakutalilahu, Yesu washimwineñahu dehi nindi mumafuku akukuminina, atumbanji twindi akashimwinaña nsañu yayiwahi yaWanta waNzambi mwahita iseki dejima. (Matewu 24:14) Nadizili cheñi nami akwaKristu alala hiyashimwinaña kulonda ahetiku. Yesu wahosheli nindi: “Mwatambwilili chawaana, hanenuña chawaana.”—Matewu 10:8.

Chinadizileña Bayibolu, nesekejeleña chahosha Bayibolu nayuma yelileñawu aYinsahu jaYehova. Natiyileña kuwaha chazatileñawu nañovu hakutiyakesha nsañu yayiwahi yaWanta waNzambi mukaayi kejima. Namweni nami adiña nachilwilu chakuhana chahosheliyi Yesu nindi akwaKristu achimwekesheña. Dichi chinatañili Maku 10:21 nawaninihu mazu ahosheliyi Yesu nindi, ‘Inzaku wikali mukwakunlonda,’ nafuukwilihu nami nikali Chinsahu.

Hela chochu, hahitili mpinji yeneni hakwila nikali Chinsahu. Chakutalilahu, hadi yaaka yayivulu nahemeneña yisela yalwisu mulungu nimulungu kuzatisha naamba ‘yakukooleka.’ Ilaña, nadizili muBayibolu nawu Nzambi wahela antu adifukulaña kudi ‘nzambi waMpemba,’ niakwalwisu. (Isaya 65:11; Akolosi 3:5) Dichi nalekeli yisela yalwisu. Mulungu watachi hanyima yakuleka kuhema yisela yalwisu, naamba yami diyahitili. Antu anseheli muloña nahemeni wanyi muniwu mulungu nawa ankajikijili nawu nikahemi cheñi ilaña nahemeni wanyi. Kufuma tuhu aha nalekeli kuhema yisela yalwisu.

Naholokeleli mukweseka kukwawu kwesekeli ‘wuntu wami wawuha’ hefuku dinapapatisheweli hakupompa kweneni kwawaYinsahu jaYehova. (Aefwesesa 4:24) Hadina ifuku namelela, nafuntili kuhotela kunashikamineña nawa nawanini wadiña kajila kami nakunhembelela hachiisu mukapeka munakaamineña. “Wañilili nindi, Sammy. Twaya tudiluñishi.” Nashikeneni dakwakula nami, “Nakaani!” Namulejeli nami ichi nahimpi dehi yilwilu kwesekeja nanshimbi jamuBayibolu. (1 Akorinda 6:18) Wazuwili nakuhosha nindi “Neyidi?” Wadiwili chahosha Bayibolu kutalisha hawuvumbi nakunkanjikija nindi tutachiki cheñi wubwambu wetu. Ilaña nakuminini dakwiñila mwitala nakudenzelaku. Chayinu mpinji nindi namuzañalu hakuhosha nami kufuma tuhu hinekalili Chinsahu mu 1958, natwalekihu kwikala washinshika nakukakela kuyuma yinahimpili muchihandilu chami.

Nahetelimu nankashi hakulondela nshimbi jamuBayibolu. Nkisu yimu yinnawani yidi yakwila nawu nikweti amabwambu amawahi, chihandilu chachiwahi nawa nikweti muzañalu chikupu.

Nichidi kuhema ngunja ilaña neñijamu mutu wanyi. Mungunja nayili mpuhu nawa nadiña namali ilaña yumiyi yashimbwili wanyi. Hela chochu, wubwambu wami naNzambi nikwikala hakachi kawamanakwami kukatwalekahu haya nyaaka. Bayibolu yahosha nawu: “Kaayi kanakuhita nikufwila kwaku, ilaña muntu welaña nkeñelu yaNzambi watwalekañahu kushakama haya nyaaka nanyaaka.” (1 Yowanu 2:17) Chayinu mpinji namukeña Yehova Nzambi niantu jindi kubadika chuma chidi chejima.