SARA wemeni mukapeka kahewulu iku nakutalatala. Fwikijenu mumbanda wukweti lubanji nawa wukweti mesu atooka wakukabeta kambwela. Komana waneñeli? Neyi waneñeli, tuneluki chuma chaletesheli yaneñi. Watoñojokeleña hansañu jayivulu jachihandilu chawu. Yena ninfumwindi, Abarahama, ashakamini namuzañalu hadi yaaka yayivulu munidi itala. * Diwadiña mukala wawu.

Ashakamineña muUri, musumba wamaheta, mwadiña akwawukalawenu amavulu niakwakuselujola. Chakubula nikujina adiña namaheta. Bayi neyi Sara wamweneña nindi iwu mukala wadiña wakuhembela hohu yuma yindiku, ilaña wawukeñeli chikupu. Yena ninfumwindi ashakamini muniwu mukala hadi yaaka yayivulu nawa azañaleleña nikumona kukala. Cheñi muniwu mukala alombeleña kakavulu kudi Yehova Nzambi yawu. Sara wadiña nawunsahu wawuvulu chikupu wamuleñeleli kukeña idi iluña.

Hela chochu, Sara wetejeli kushiya yuma yejima yelukiliyi. Hela chakwila hadaha wadiña nayaaka 60, wayili kwiluña dawenyi nakushakama chihandilu chayihuñu nichawubanji, chakwila hakuhweleleli kufunta cheñiku. Chumanyi chaletesheli yahimpi chihandilu chindi? Nawa tunateli kudizila kwodi kuchikuhwelelu chindi makonu?

Hadaha Sara wakulilili muUri. Chayinu mpinji, yuma yejima yashalili muniwu musumba yakisika. Ilaña mumpinji yadiñaku Sara, maatu amaneni awakwakuselujola ahitileña Mukaloña Yufurati nakuleta yuma yayiwahi yalema muniwu musumba waya mpuhu kufumisha kwakulehi. Mumajila aniwu musumba mwadiña nakwinzala antu chikupu nawa maatu niwena adisomenaña chikupu kuchikumu nikumaluña akulandishila kwenzeleña yuma chikupu. Fwikijenu Sara chatiyileñayi chelili wakulilili muniwu musumba waya mpuhu nawa mwelukiliyi antu amavulu. Antu amuniwu musumba niwena amwanukileña muloña wadiña chañadima walubanji. Cheñi wadiña nachisaka cheneni chikupu muniwu musumba.

Sara amushimuna muBayibolu nawu wadiña nachikuhwelelu chikupu, ilaña bayi neyi wakuhweleleli mudi nzambi wakakweji kuyadifukwileñawu antu amavulu muUri, mwadiña kaposhi kaniwu nzambi kayili mpuhu chikupu muniwu musumbaku. Ilaña, Sara wadifukwileña kudi Nzambi walala, Yehova. Bayibolu hiyashimuna chekaliliyi nanichi chikuhweleluku. Hampinji yimu tata yindi wadifukwileña kudi ankishi. Chimwahitili mpinji, amusumbwili kudi Abarahama, iyala wamushilimu nayaaka ikumi. * (Kutachika 17:17) Nkumininaku amwilukili nawu ‘tata yawantu ejima akweti chikuhwelelu.’ (Aroma 4:11) Wejima wawu adiña muwulu wawuwahi, wakola, wakavumbi, atiyañeneña chachiwahi nawa azatilileña hamu hakumanisha kukala kwamweneñawu. Kubombela hayuma yejimiyi, wulu wawu wadiña wawuwahi muloña amukeñeli Nzambi yawu.

 Sara wamukeñeli nfumwindi chikupu nawa wejima wawu ashakamineña nawantaña jawu muUri. Hela chochu, mukuhita kwampinji wejima wawu aneñeli. Bayibolu yatulejaña nawu Sara “wadiñi nshinta, hadiñi namwanaku.” (Kutachika 11:30) Kwesekeja nachisemwa nimumafuku iyashakamineñamu, chihandilu chaSara chadiña mukukala. Ilaña Sara wadiña washinshika kudi Nzambi yindi nikudi nfumwindi. Loti mwana kamana kwaAbarahama wekalili neyi mwanawu. Atwalekelihu kuhanda chochenichi, sampu nichahimpikili yuma.

Ifuku dimu Abarahama wenjili kudi Sara iku nazañalali chikupu. Hakuhweleleli yuma yamwekeniku. Nzambi yawu kwadifukwileñawu wahosheli nayena nawa wamwekeni kudi yena kuhitila mudi kañelu. Fwikijenu Sara chahayaminiyi iku nakumushinshika nfumwindi chikupu, hakumwihula nindi “Wayileja nindidi? Anleji mwani!” Hadaha Abarahama wasambilili kuwundisha muchima kulonda yamuleji chiwahi; dichi wamulejeli nsañu yamulejeliwu kudi Yehova nindi: “Fumaku mwituña deyi nikudi antaña jeyi wuyi mwituña dinukukuleja.” (Yilwilu 7:2, 3) Hanyima yakuwundisha nyichima, atachikili kutoñojoka hamudimu wayinkeliwu kudi Yehova. Ayilejeli kushiya iluña dawu dadiwahi nichihandilu chachiwahi nakwiteja chihandilu chakala chakwendujola. Indi Sara wukwila ñahi? Chakadi nikujina Abarahama wadiña nakumutalila Sara chikufuukulayi. Komana wukwiteja iku kuhimpika kweneni kukumwekana muchihandilu chawu?

Chuma chikufuukulayi Sara chinateli kutukalila etu amavulu. Tunateli kutoñojoka netu, ‘Ami niñodami, Nzambi kanda yatwilejeñawu dehi kukoña chuma chamuchidiwu!’ Hela chochu, komana hitwamona kukala kwokumu? Tunakushakama mukaayi munenzali maheta, mutunateli kutachika kufwila kwikala nachihandilu chachiwahi, kwikala namaheta hela kukeña kudilumbikila maheta. Ilaña Bayibolu yatukonkomwenaña kusambila kutwamijaku yuma yakuspiritu nikumuzañalesha Nzambi chatela tudizañalesheña etu aweni. (Matewu 6:33) Hampinji yitukutoñojokaña hayuma yeliliyi Sara, twatela kudihula netu, ‘Yumanyi yinatela kwila muchihandilu chami?’

Hampinji yaloñeleñayi Sara yuma yindi, wamweni kukala hakwila yasakulihu yuma yakusenda niyakushiya. Haloñeli yuma yinateli kukañanya kwiñila mumatemba akokañawu ayimbulu niangameliku, kushilahu niyuma yikubula kuzatika muchihandilu chawenyi. Atela alandishili yuma yawu yayivulu hela kuyihana. Yuma yejima yadiña muniwu musumba ayishili chidi neyi yisankanu hela kumaluña akulandila yuma yidi neyi mbutu, mbinji, nyikabu, yakuvwala niyuma yikwawu yakeñekaña muchihandilu.

Hadaha chamukalilili Sara kushiya itala dawu. Neyi idi itala dadiña hakachi kamatala awaniniwu akwakuvumbujola muUri, dikwila nawu Sara washili yuma yayivulu kushilahu nichihandilu chachiwahi.  Awa matala adiña natupeka twatuvulu kushilahu ninyipayipi yamenji atuta niyayimbusu. Hela tuhu tumatala twanyanya twadiña twakutuña chiwahi tukweti yuma yejima yakeñekaña kwitala. Komana itenti dinateli kuyikiña kudi amakombi? Hela kuyikiña kudi anyitupa, ayisumpa, abera niatuñwidi, adiñaku hayina mpinji?

Indochu chisaka? Anyi cheñi ashiliyi Sara? Lushimbi lwayinkeliyi Nzambi lwakwila nawu ‘fumaku mwituña deyi nikudi antaña jeyi’ hadaha lwamukalilili. Chelili wadiña mumbanda wachisambu, hadaha wadiña nawamanakwindi, ahela indi, atata jindi awambanda, amandumi jindi, ejima awa hadaha wakayimonahu cheñi wanyi. Hela chochu, Sara watwalekelihu kudiloñesha chakadi kwakama kulonda anyamuki.

Hela chakwila kwadiña iku kukala, Sara waloñejekeli yuma nawa wadiloñesheli kunyamuka hefuku dafuukwiliwu. Tera wadiña kashinakaji, wayili naAbarahama niSara, hela chakwila wadiña wakula dehi chikupu. (Kutachika 11:31) Chakadi nikujina Sara wadiña namudimu weneni wakwakamena iwu nvwali wadiña wakula dehi. Loti niyena wayili nawu chiyamwovwahililiwu Yehova ‘kufuma mwituña dawaKaladeya.’—Yilwilu 7:4.

Asambilili kuya kuHarana, hadiña makilomita 960 kukabeta kaluwunda kakuchikumu, muchikulishu chaYufurati. Chashikiliwu muHarana ashakaminimu. Haniyi mpinji Tera hadaha watachikili kukata, chakwila hatwesheli kwendaku. Dichi ashakamini muHarana kushika nimpinji yafwiliyi iku wudi nayaaka 205. Hampinji yimu cheñi henohu kanda anyamuki nakuya lwendu lwawu lwamuchiyedi, Yehova wahosheli cheñi naAbarahama nindi anyamuki nakuya kwiluña kukumulejayi. Hela chochu haniyi mpinji, Nzambi wabombelelihu cheñi chikaninu chikwawu nindi: ‘Nakakwilisha muza weneni.’ (Kutachika 12:2-4) Ilaña chiyafumineña muHarana, Abarahama wadiña nayaaka 75, Sara 65 nawa hiyadina namwanaku. Hanu mudi Abarahama mukufuma ñahi muza? Wukusumbula mumbanda mukwawu? Muyina mpinji antu asumbwileña wuhadi, hadaha Sara watoñojokeleña nindi Abarahama wukusumbula mumbanda mukwawu.

Chimwahitili mpinji afumini muHarana nakutwalekahu wenyi wawu. Haniyi mpinji ayili nawanyi? Bayibolu yatulejaña nawu Abarahama nichisaka chindi asendeli maheta apompesheliwu kushilahu “niantu aheteluwu muHarana.” (Kutachika 12:5) Awa antu adiña anyi? Adiña Añamba. Hela chochu, Abarahama niSara alejeleñaku antu adiñawu nawu yuma yakuhweleleliwu. A Yudeya amakwawu akushankulu ahosheleña nawu awa antu anateniwu haniyi vasi adiña antu abalumukili nakudibomba naAbarahama niSara mukudifukula kudi Yehova. Neyi dimu, chikuhweleli chaSara chakola dichamuleñeleli kulejaku akwawu kutalisha hadi Nzambi yindi niyuma yachiñejeleñayi. Dichi twatela kutoñojoka hayumiyi muloña tunakushakama mukaayi mudi antu abula chikuhweleli nawa abulaña kuchiñeja. Neyi mudiza nsañu yimu muBayibolu, komana mukulejaku mukwenu?

Chawukiliwu Yufurati, haNisani 14, 1943 B.C.E., atwalekelihu kuya kukabeta kambwela kwituña dayikaniniyi Yehova. (Kwidika 12:40, 41) Fwikijenu Sara nakushinshika iluña chidinakumwekana kuwaha nankashi. Chiyashikiliwu kwakwihi nanyitondu yamaneni yaMore, kwakwihi naShekemi, Yehova wamwekeni cheñi kudi Abarahama, haniyi mpinji wahosheli nindi: “Anyaneyi nakayinka ituñidi.” Awa mazu akwila nawu, ‘anyana,’ atela amukalili Abarahama! Amuleñeleli kutachika kutoñojoka hamazu ahosheliyi Yehova mwitempa daEdeni akwila nawu ifuku dimu mwana wakamuchika Satana. Yehova wadiña wamuleja dehi Abarahama nindi muza wakafuma mudi eyi wakezununa njila yikaleta nkisu kudi antu hanu hamaseki.—Kutachika 3:15; 12:2, 3, 6, 7.

Hela chochu, ichi chisaka bayi neyi hichadi kubulaña kumona yihuñu yinakumonawu antu mukaayiku. Mwituña daKenani mwaholokeli nzala yakapwelendendi nawa Abarahama wabukili hamu nichisaka chindi nakuya kuEjipitu. Hela chochu, welukili kukala kukamwekana kwiluña kwayileñayi. Dichi wahosheli naSara nindi: “Ami neluka dehi eyi wumumbanda muwahi walubanji; chakakumonawu aEjipitu, akela nawu, Yeniwu diyi iñodindi; akanjaha, hakwila eyi kweyi akakuleka mumi. Wuhoshaña mwani, neyi, nimuhelindi; kulonda nishakami chachiwahi nibuli kumona kukala hadeyi, nakahanda nikuhanda, kulonda akabuli kunjahila hamujimba weyi.” (Kutachika 12:10-13) Muloñadi Abarahama chahosheleliyi awa mazu abulahu dehi kuhoshayi?

Abarahama hadiña mukwakutwamba hela mukwawomaku  neyi chahoshañawu akwakudimbululaku. Chalala Sara wadiña muhelindi mudi amamayidi amakwawu. Mazu ahosheli Abarahama adiña alala. Abarahama naSara elukili nawu kwosi chuma chalemeni kubadika nkeñelu yaNzambi yakwikala namwana nimuza kuhitila mudi Abarahama, dichi Abarahama wateleleli kudikiña chikupu. Wunsahu washimunawu akwakuvumbujola wamwekeshaña nawu kwadiña lushimbi lwabulili kwilukawu antu lwahosheleña nawu muntu neyi wudi hachifulu muEjipitu wadiña nañovu yakutambula ñoda mukwawu nikujaha nfumwindi. Dichi Abarahama watoñojokeli mwamaana, Sara niyena wovwahilili mwahosheliyi nfumwindi.

Hashimbwili wanyi, mazu ahosheliyi Abarahama ashikijewili; chakwila atulamba twaFwaro amakwawu amweni nawu Sara wadiña walubanji chikupu. Ayili nakumuleja Fwaro nawa Fwaro wahosheli nindi amutwali kudi yena. Chinateli kutukalili kufwikija chineñi chatiyiliyi Abarahama hela woma watiyiliyi Sara. Hela chochu, kuna kwamutwaliliwu hiyamukabishiliku, ilaña amuhembeleña chachiwahi neyi mwenyi walema. Hadaha Fwaro watoñojokeleña jakuhanjeka nikumuzañalesha namaheta indi nikuhosha ‘namanakwindi’ kulonda yamusendi yekali ñodindi.—Kutachika 12:14-16.

Fwikijenu Sara, nakushinshika iluña damuEjipitu hanjanina yamwitala daFwaro. Watiyili ñahi kushakama cheñi mwitala dikweti mpwembu nawa datuñawu chiwahi chakwila anakumwinka niyakuda yayiwahi? Komana wabakukili muchima nanichi chihandilu chachiwahi hadaha chambukiliku nachahandileñayi muUri? Fwikijenu Satana chadi kutiyayi kuwaha neyi chakwila Sara wafuukwilihu kumushiya Abarahama kulonda yasumbuki naFwaro! Ilaña Sara hamushili Abarahamaku. Wadiña washinshika kudi nfumwindi, walemesheli mawulu indi niNzambi yindi. Chiña dichadiña antu ejima asumbuka adi mukanu kaayi katama. Komana kwila mwikala ashinshika neyi chadiñayi Sara hampinji yimunakuhanda nawenikwenu hela amabwambu jenu, nehi?

Yehova wamukiñili iwu mumbanda, kuhitila mukumutemeshela Fwaro niakwetala dindi yipupu. Fwaro chelukiliyi nindi Sara wadiña ñonda Abarahama, wamufuntishili kudi nfumwindi nawa wayilejeli nindi anyamuki nichisaka chindi chejima afumi muEjimpitu. (Kutachika 12:17-20) Wenowu muzañalu watiyiliyi Abarahama hakumufuntishila cheñi ñodindi akeñeliyi! Anukenu nenu wahosheli munjila yakukeña nindi: “Ami neluka dehi eyi wumumbanda muwahi walubanji.” Ilaña wamwenimu cheñi chilwilu chikwawu chachiwahi kubadika lubanji lwindi lwakumesu. Sara wadiña nachilwilu chachiwahi chamukachi kamuchima, chilwilu chalemeshayi Nzambi. (1 Petulu 3:1-5) Dichilwilu chitwatela kwikala nachu wejima wetu. Tukwimbujola chikuhwelelu chaSara, neyi tutwamijaku yuma yakuspiritu kubadika yuma yakumujimba, tulejaku antu amakwawu yuma yitwadizaña muBayibolu nikukakela kunshimbi jaNzambi neyi tunaholokeli mukweseka.