Kapetulu 20

Anukenuña Ifuku daYehova

1. Hampinji yiwadizili katachi neyi kupuluka kuyuma yatama yakanu kaayi kudi kwakwihi, watiyili ñahi?

CHUMA chatachi chiwadizili muBayibolu chadiña chakwila nawu nkeñelu yaYehova yakwilisha iseki dejima kwikala paradisa. Mudina ituña dadiha himwakekala njita, wubanji, wuzweñi, yikatu, makabi, nikufwaku. Niafu akafunta cheñi kuwumi. Oyu yuma yidi kumbidi okuwaha! Kushikijewa kwayuma yejimiyi anakwikonkwomweni kuhitila muwunsahu wakwila nawu kumwekana kwaKristu hamu neyi Mwanta wunakuyula kwatachikili mu 1914, dichi kufuma hayina mpinji, tudi mumafuku akukuminina adinu ituña datama. Hakumana kwanawa mafuku akukuminina, Yehova wakajilumuna mpata yamakonu nakuhiñishahu ituña dadiha dachikaninu!

2. Indi “ifuku daYehova” hichumanyi?

² Bayibolu yatenaña iyi mpinji yinakwinza yakujilumuka nawu “ifuku daYehova.” (2 Petulu 3:10) ‘Hifuku dakuzuwa kwaYehova’ dakazuwilayi ituña dejima daSatana. (Zefwaniya 2:3) Dikashika kunsa yachu ‘kunjita yefuku deneni daNzambi Watwesha yejima . . . datenañawu muchiHeberu nawu Amagedoni,’ kwakayijilumwinawu “anyanta ankanu ampata yamunu mwishina yejima.” (Chimwekeshu 16:14, 16) Komana nshakaminu yeyi yamwekeshaña chikuhwelelu chakwila nawu idi “ifuku daYehova” didi kwakwihi?—Zefwaniya 1:14-18; Yeremiya 25:33.

3. (a) Mpinjinyi yikenza ifuku daYehova? (b) Chinawahi ñahi chineli Yehova hashimwini ‘adina ifuku hela mpinjiku’?

 ³ Bayibolu hiyatuleja ifuku dadeni dakenzayi Yesu Kristu hamu neyi Mukwakujilumuna waYehova nakujilumuna adinu ituña daSatanaku. Yesu nindi: “Itañwodu hela mpinji oyu kwosi wayilukaku, chalala hela añelu amwiwulu hela Mwana, chiña Tata.” (Maku 13:32) Neyi antu amakwawu hiyamukeña Yehova chachenuku, akufwilaña kuswija hambidi ifuku dindi muyitoñojoka yawu nakwila nyidimu yakumujimba. Ilaña ana amukeña Yehova chikupu akamukalakela nawumi wejima hichikweti muloña nampinji yikenjilahu kukuma kwanshakaminu yinu yatamaku.—Masamu 37:4; 1 Yowanu 5:3.

4. Indi Yesu wahosheli mazwinyi akusoñamisha?

⁴ Namazu akuyisoñamisha ana amukeña Yehova, Yesu nindi: “Babalenu, tonenu, lombenu, muloña himuneluki mpinji oyuku.” (Maku 13:33-37) Watukonkomwenaña kubula kukeñesha kudya nikunwa hela “kwakama yuma yawumi” kukañesha kashinshi ketu chakwila tubula nimesu akwiluka chikupu mpinji.—Luka 21:34-36; Matewu 24:37-42.

5. Neyi chashimwiniyi Petulu, chumanyi chikela ifuku daYehova?

⁵ Petulu niyena natuleji kwanukaña “chakenza ifuku [daYehova] dakasuñunuka mawulu hakabutukawu kesi, dakasuñunuka yuma yejima neyena dakesi.” Jinfulumendi jejima jawantu—“mawulu”—akayijilumuna, neyi chakayijilumunawu antu amavulu atama ejima—“maseki”—‘niyuma yejima,’ maana ninyidimu yakanu kaayi katama, chidi neyi yililu yakudiyula chakadi Nzambi niwuvumbi ninshakaminu yakufwila maheta. Yumiyi akayisinsa kudi “mawulu amaha [Wanta waNzambi wakwiwulu] niiseki dadiha [nshakaminu yayiha yawantu  hamaseki] mwakekala kuloña.” (2 Petulu 3:10-13) Iyi yuma yakutiyisha woma yikatachika mukubazumwisha nawa hampinji niifuku dakadi kwiluka.—Matewu 24:44.

Ikalenu Asoñama kuChinjikijilu

6. (a) Ñakwilu yaYesu yashikili kuchipimwinyi kutalisha kulwihu lwawatumbanji twindi chilwakundamini kukukuma kwanshakaminu yawaYudeya? (b) Mazwinyi añakwilu yaYesu ahosha chikupu hayuma yamwekanaña niyililu kutachika tuhu mu 1914 nakutwalekahu?

⁶ Hamuloña wampinji yitunakushakamamu, twatela kwiluka wunsahu wayuma yayivulu yachinjikijilu chinakumwekesha mafuku akukuminina—‘kukuma kwanyaka yamakonu.’ Anukenu nenu hampinji yakwiliyi Yesu lwihu lwawatumbanji twindi, lwasonekawu haMatewu 24:3, yuma yikwawu yalumbulwiliyi muvasi 4 kushika niku 22 yadiña nakushikijewa kwanyanya hanshakaminu yawaYudeya hakachi ka 33 na 70 C.E. Ilaña iwu wuprofwetu wunakushikijewa cheneni kufuma tuhu mu 1914, mpinji ‘yakwinza kwaKristu nikukuma kwanyaka yamakonu.’ Matewu 24:23-28 yinatuleji jamwekeneña kufuma mu 70 C.E. kushika nikumpinji yakwinza kwaKristu. Yuma yamwekeneña yinashimuniwu haMatewu 24:29–25:46 yinakumwekana nimumafuku akukuminina.

7. (a) Muloñadi chitwatela kwikalila asoñama halwetu kuyuma yinakumwekana yinakushikija chinjikijilu? (b) Akulaku malwihu adi kunsa yayinu parakarafu nakumwekesha chinakushikijewa chinjikijilu kufuma mu 1914.

⁷ Twatela kutaku maana chikupu kuyuma yinakumwekana niyililu yinakushikija chinjikijilu. Kusumbwañesha yumiyi nawuprofwetu waBayibolu chikutukwashaku kwanukaña ifuku daYehova. Chikutukwashaku kwikala namukoyi hakusoñamisha antu hansañu yanidi ifuku  dinakuswila kwakwihi. (Isaya 61:1, 2) Naniyi yikuma muyitoñojoka, twayenu tuhituluki mumalwihu analondelihu anashimuni mbadi yachinjikijilu, neyi chasonekawu haMatewu 24:7 niLuka 21:10, 11.

Kushikijewa kwabadikanyi kwashimwineñawu dehi ‘kwamuza kunyamuka nakulwa namuza wukwawu, wanta nawanta wukwawu’ kwashikijeweli kutachika mu 1914? Hansañu yanjita, chumanyi chinakumwekana kufuma hayina mpinji?

Mu 1918, chipupwinyi chahondesheli antu amavulu kubadika afwili haNjita yaKaayi ya I? Hela chakwila muntu neluki mwakuukila, nyisoñwinyi yichidi kuhondesha antu amavulu?

Indi nzala yinaholokeli mwituña kushika kuchipimwinyi hela chakwila kwadiñi kukula mujasayansi munkulakaji yamwaka wunamani?

Chumanyi chinakwilishi witeji neyi 2 Timotewu 3:1-5, 13 yinakulumbulula bayi neyi mwekalilaña chihandilu dikaluku, ilaña yinakulumbulula hakutaminaku kwanshakaminu hampinji yitunakuswila kukukuma kwamafuku akukuminina?

Kwambula Antu

8. (a) Yumanyi yikwawu yinashimuniwu haMatewu 13:24-30, 36-43, yesekejeliyi Yesu nakukuma kwanyaka yamakonu? (b) Indi chishimu chaYesu chatalisha mudihi?

⁸ Kudi yuma yikwawu yalema yinakumwekana yesekejeliyi Yesu nakukuma kwanyaka yamakonu. Hakachi kaniyi yuma hadi kwambula “anyana kawanta” kufuma kudi “anyana kawatama.” Yesu wahosheli hayumiyi muchishimu chindi chetempa datidiku mwakuwiliyi chilumbu matahu. “Tidiku” yamuchishimu chindi yemenañaku  eniKristu awayishewa. “Matahu” hiyantu ana atwambaña kwikala eniKristu ilaña adimwekeshaña aweni kwikala “anyana kawatama” muloña akakela mbe-e kwituña dinakuyulewa naDiyabolu. Awa ayambulaku kudi “anyana kawanta [waNzambi]” nawa ayifunda mufunda wakujilumuka. (Matewu 13:24-30, 36-43) Komana chumichi chamwekana dehi tahindi?

9. (a) Hanyima yaNjita yaKaayi ya I, kwambulanyi kweneni kwamwekeni kudi ana ejima atwambileña kwikala eniKristu? (b) Wunsahu wamuchidinyi wahenuwu eniKristu awayishewa nawu adiña ambuña aWanta?

⁹ Chelili Njita yaKaayi ya I yinakumi dehi, kwadiña kwambula antu ejima aditeneneña nawu eniKristu muyibalu yiyedi: (1) Akulumpi jansakililu yaKristendomu niantu jawu, ahosheli nañovu yakukwasha League of Nations (chakatataka hiUnited Nations) hampinji yoyimu saña akolela mbe-e kukashinshi kawu kamuza, ni (2) eniKristu alala amuyina mpinji yahanyima yanjita, akwashili chikupu Wanta waNzambi wawuMesiya, hiyakwashili nyuza yakanu kaayiku. (Yowanu 17:16) Adimwekesheli kwikala ambuña aWanta waNzambi kuhitila mukukalakala mudimu wakushimwina “nsañu yayiwahi yawanta” kaayi kejima. (Matewu 24:14) Chumanyi chafuminimu?

10. Chumanyi chatachi chafumini mumudimu wakushimwina Wanta?

¹⁰ Chatachi, kwadiña kupompesha ashalahu awayishiluwu naspiritu yaNzambi, akweti chikuhwelelu chakwikala naKristu kuchibalu chaWanta wakwiwulu. Hela chakwila antu awa apalañeneneni mukachi kanyuza, ayileteli mukunuñañana kwakuloñesha. Kulamika kwakukumishaku kwawantu awayishewa kudi kwakwihi nakumana.—Chimwekeshu 7:3, 4.

11. Mudimwinyi wakupompesha wunakutwalekahu, nawa wunesekani nawuprofwetwinyi?

 ¹¹ Kulondelahu, kuhitila muwunlomboli waKristu, atachikili cheñi kupompesha “izaza deneni . . . dawantu akunyuza yejima, akunyichidi yejima, akumadimi ejima.” Awa anekali “anyikoku acheñi” amba kapuluka “kuyihuñu oyu yeneni” nakwiñila mwituña daNzambi dadiha. (Chimwekeshu 7:9, 14; Yowanu 10:16) Iwu mudimu wakushimwina Wanta waNzambi wunakutwaleka kushika nikulelu henohu kukuma kanda kwinzi. Nakwovwahila,  izaza deneni dawanyikoku yacheñi, chayinu mpinji anashiki dehi muyihita, ayikwashañaku ashalahu awahishewa kutiyakesha nsañu yalema yaWanta. Iyi nsañu anakuyitiya munyuza yejima.

Chumanyi Chikamwekana Kumbidi?

12. Mudimu wakushimwina anakuwuzata kushika kuchipimwinyi henohu ifuku daYehova kanda dishiki?

¹² Wunsahu wejima wunashimunuwu hewulu wunakumwekesha nawu tudi kwakwihi nakukuma kwamafuku akukuminina nawa nawu ifuku daYehova didi kwakwihi nankashi. Hanu dinu kudihu wuprofwetu wukwawu watela kushikijewa henohu ifuku dakutiyisha woma kanda  ditachikiku? Eña. Twatela kwanuka netu mudimu wakwambula antu hamuloña waWanta kanda wumani. Mumatuña amakwawu mwamweniwu ihuñu deneni nankashi hadi yaaka yayivulu, makonu munakuvulilaku atumbanji amaha. Nimumaluña mwakaanineñawu antu nsañu yayiwahi, luwi lwaYehova analumwekeshi kuhitila mukushimwina. Twalekenu nakukalakala mudimu! Yesu natushiiki nindi neyi mudimu wunamani, nikukuma dihu kwakenza.

13. Neyi chasonekawu ha 1 Atesalonika 5:2, 3, chumanyi chalema nankashi chikukeña kumwekana, nawa chinakulumbululadi kudetu?

¹³ Wuprofwetu wukwawu waBayibolu wasweja kulema washimwinañahu dehi nawu: ‘Chakwilawu nawu, Kuwunda nikukiñewa! hohenohu kujilumuka hikwakayikasumwisha, neyi chakasumwishañawu mumbanda wudi nevumu kudi nyisoñu yakuvwala; hiyakapuluka nihantiku.’ (1 Atesalonika 5:2, 3) Tunakutalila kulonda tukadimweni mbila ‘yakuwunda nikukiñewa’ chikwakazatika. Ilaña hichakalumbuluka nawu anlomboli etuña anamanishi chikupu kukala kwawantuku. Ana anakwanuka ifuku daYehova muyitoñojoka hiyakayihuñumuna naniyi mbilaku. Aneluki nawu chakela mbila yinakumi dehi, hohenohu nikujilumuka dihu kwakenza.

14. Yumanyi yakamwekana hampinji yehuñu deneni, nawa yakalondashana ñahi?

¹⁴ Hakutachika kwehuñu deneni, anyuli akamubalumukilamu Babiloni Muneni, wanta wakaayi wansakililu yakutwamba, nawa akamukisañana. (Matewu 24:21; Chimwekeshu 17:15, 16) Kufumahu, nyuza yakabalumukila ana akwashaña wanta waYehova, nakusañumuna kuzuwa kwaYehova kwakulendumukila nfulumendi jamatuña niankwashi jawu, chikafumamu hikuyijilumuna chikupu. Aha hakekala haAmagedoni hamakumishilu ehuñu  deneni. Kufumahu, Satana niandemoni jindi akayipatila mwikela, hiyakatwesha kuluwañesha muchidi wamuntu cheñuku. Chumichi dichikakumisha ifuku daYehova hamba kalemeshawu ijina dindi.—Ezekeli 38:18, 22, 23; Chimwekeshu 19:11–20:3.

15. Muloñadi chichikwikalila chakadi maana kutoñojoka nawu ifuku daYehova dichidi kwakulehi?

¹⁵ Kukuma kwampata yamakonu kwakenza hampinji yatelela, kwesekeja nantanjikilu yaNzambi. Hikwakashimbulaku. (Habakuki 2:3) Anukenu nenu kujilumuka kwaYerusalema mu 70 C.E. kwenjili swayi hampinji yabuliliwu aYudeya kukuhwelela, hatoñojokeleñawu nawu kukala kunamani. Chumanyi chamwekeni kudi Babiloni wakushankulu? Wadiña musumba wakola chikupu, washindamenewa, nawa awikolesheli nampwembu jamaneni nankashi. Ilaña awushindili muwufuku wumu. Chochimu, kujilumuka kwakukasumwisha kwakenza nakuholokela hampata yamakonu. Neyi kunenzi, kwakatuwani anuñañana mukudifukula kwalala, nakwanukaña ifuku daYehova.

Kuhitulukamu kwaKuhanjeka

• Muloñadi chichinekalili chalema kwanukaña ifuku daYehova? Munjilanyi mutunateli kwilila chenichi?

• Indi etu halwetu chinatwikumi ñahi mumudimu wakwambula antu wunakuzatika?

• Chumanyi chidi kumbidi chikamwekana henohu ifuku daYehova kanda ditachikiku? Hanu dinu, chumanyi chitwatela kwilaña halwetu?

[Malwihu aKuzatisha haKudiza]

[Nyevulu yidi hefu 180, 181]

Katataka mafuku akukuminina amba kakuma nakujilumuka kwetuña daSatana