Kapetulu 12

Chalumbuluka Chipapatishu Cheyi

1. Muloñadi chipapatishu chamumenji chichatela kwikala chakutwizañalesha hamuntu hamuntu?

MUCHAAKA cha 29 C.E., Yesu wapapatisheweli, amujimikili kudi Yowanu Mpapatishu muKaloña Yodana. Yehova yomweni wamweneña nawa wahosheli mazu akwiteja. (Matewu 3:16, 17) Yesu wemikili chakutalilahu kudi atumbanji twindi ejima akumulondela. Chimwahitili yaaka yisatu nachikunku, Yesu waheni nshimbi jeniji kudi atumbanji twindi nindi: “Ñovu jamwiwulu nijahamaseki jejima anajinyinki. Dichi yenu mwakelishi atumbanji munyuza yejima, mwakayipapatishi mwijina daTata, nidaMwana, nidaspiritu [y]ajila.” (Matewu 28:18, 19) Komana akupapatisha kwesekeja nachashimwiniyi Yesu? Neyi kanda, komana wunakudiloñesha kwila mwenimu?

2. Kutalisha kuchipapatishu, malwihwinyi anakukeñeka kwakula?

² Hela chakwila akupapatisha dehi indi kwiji wunakudiloñesha neyi akupapatishi, chikwikala chalema kudi ejima anakukeña kumukalakela Yehova nawa akashakama mwituña dindi dadiwahi dadiha kutiyishisha chikupu chekala chipapatishu. Malwihu anakukeñeka kwakula diwu awa: Komana chipapatishu chaweniKristu makonu chinesekani nachipapatishu chaYesu? Indi kupapatishewa ‘mwijina daTata, nidaMwana, nidaspiritu yajila’ chalumbulukadi? Chumanyi chinabombelewimu mukushakama kwesekeja nachalumbuluka chipapatishu chamumenji chawiniKristu?

 Chipapatishu Chapapatishileñayi Yowanu

3. Indi chipapatishu chaYowanu chadiña chawanyi?

³ Kwakwihi natukweji tutanu nakamu henohu Yesu kanda amupapatishi, Yowanu Mpapatishu wayili nakushimwina mwisaña damuYudeya, nindi: “Balumukenu munyichima yenu, muloña wanta wamwiwulu wunashiki dehi kwakwihi.” (Matewu 3:1, 2) Antu atiyili mazu ahosheliyi Yowanu nawa ayihembeli munyichima yawu. Etejeli nshidi yawu hatooka, nikudanakena, kufumahu enjili kudi Yowanu kulonda yoyipapatishi muKaloña Yodana. Ichi chipapatishu chadiña chawaYudeya hohu.—Luka 1:13-16; Yililu 13:23, 24.

4. Muloñadi aYudeya amunkulakaji yamwaka wakusambila chakeñekeleleñawu kubalumuka mukunyakashana?

⁴ Ana aYudeya akeñekeleña kubalumuka munyichima swayi-swayi. Hampidi yaSinayi, mumwaka wa 1513 B.C.E., ankakulula jawu akwatili chitiyañenu chamuza—chitiyañenu chakola—naYehova Nzambi. Ilaña hamuloña wakusweja nshidi, hiyatwelekelihu nakukalakala nyidimu yawu yachina chitiyañenuku, dichi ayihishili nanichi chitiyañenu. Mumafuku aYesu nshakaminu yawu yadiña yakala. “Ifuku daYehova deneni dikweti woma” dashimwineñawu dehi kudi Malaki dadiña kwakwihi. Mu 70 C.E., “ifuku” denidi denjili helili amashidika aweniRoma ajilumuni Yerusalema, nitembeli, niaYudeya kubadika hachihita chimu. Yowanu Mpapatishu, hamuloña wakukeña kudifukula kwalala, amutemesheleñahu dehi kumbidi henohu kujilumuka kanda, kulonda ‘akamuloñesheli Yehova kulonda yakawani antu adiloñesha.’ Ateleli kudanakena nshidi jawu hakukaana chitiyañenu chaNshimbi yaMosi nakudiloñesha kulonda kumwiteja Mwana kaNzambi, Yesu, wadi kuyitemeshelayi Yehova.—Malaki 4:4-6; Luka 1:17; Yililu 19:4.

5. (a) Hampinji yenjiliyi Yesu nindi amupapatishi, muloñadi Yowanu chehwililiyi ñana? (b) Chipapatishu chaYesu chadiña nakwimenaku chumanyi?

⁵ Yesu yomweni wadiña hakachi kanowu enjili kudi Yowanu  nawu ayipapatishi. Muloñadi? Hakwiluka nawu Yesu hadiña nanshidi yakudanakenaku, Yowanu wahosheli nindi: “Ami yami nateli kumpapatisha kudeyi, indi eyi winzi kudami?” Ilaña chipapatishu chaYesu chemeneneñaku chuma chacheñi. Yesu hakumwakula nindi: “Kumina dakwiteja katataka, muloña dichi chinatuteleli, kulonda kuwanisha kuloña kwejima.” (Matewu 3:13-15) Hamuloña wakwila Yesu hadiña nanshiduku, chipapatishu chindi hichadiña nakwimenaku kudanakena nshiduku; hela hakeñekeleña kudihana kudi Nzambuku muloña wadiña muntu wakumuza wadihana dehi kudi Yehova. Ilaña, kupapatishewa kwindi nayaaka 30 kwadiña kwadimena kudi yena, nawa kwemeneneñaku kudihana kudi Tata yindi wamwiwulu kulonda kwila nkeñelu Yindi yikwawu.

6. Indi Yesu washili ñahi kashinshi kutalisha hakwila nkeñelu yaNzambi?

⁶ Nkeñelu yaNzambi kutalisha hadi Yesu Kristu yabombelelimu mudimu wunakwendela hamu naWanta. (Luka 8:1) Cheñi yabombelelimu kulambula wumi waloña wawuntu neyi ifutu danyiloña nawa dihashindamena chitiyañenu chachiha. (Matewu 20:28; 26:26-28; Aheberu 10:5-10) Yesu walemesheli chikupu chuma chemeneneñaku chipapatishu chindi chamumenji. Hetejeli yitoñojoka yindi kuyihuñumuna nayuma yikwawuku. Kukuma kwawumi windi waheseki, Yesu wakoleli mbe nakwila nkeñelu yaNzambi, nakwilisha kushimwina Wanta waNzambi kwikala mudimu windi waweni.—Yowanu 4:34.

Chipapatishu chamuMenji chawaTumbanji awiniKristu

7. Kufuma haPentekosta 33 C.E., indi eniKristu ayilejeli kwiladi kutalisha kuchipapatishu?

⁷ Atumbanji twaYesu akusambila ayipapatishili mumenji kudi Yowanu, kufumahu ayilejeli kutala kudi Yesu hamu neyi ayilolu akekala muWanta wamwiwulu. (Yowanu 3:25-30) Hamuloña  wakwikala mulushimbi lwaYesu, awa atumbanji niwena adiña nakupapatisha, chipapatishu chadiña neyi chaYowanu. (Yowanu 4:1, 2) Hela chochu, kutachika haPentekosta 33 C.E., atachikili kukalakala mudimu wakupapatisha ‘mwijina daTata, nidaMwana, nidaspiritu yajila.’ (Matewu 28:19) Mukuhetelamu hakuhitulukamu kulonda kwiluka muchinatalishi.

8. Chalumbulukadi kupapatishewa “mwijina daTata”?

⁸ Kupapatishewa “mwijina daTata” chalumbulukadi? Chalumbuluka kwiluka ijina dindi, nichifulu, niñovu, ninkeñelu, ninshimbi jindi. Toñojokaku hayuma yinabombelewimu. (1) Kutalisha kwijina dindi, Masamu 83:18 yahoshaña nawu: ‘Ijina deyi yeyi Yehova yeyi hohu, Mukwakubadika heseki dejima.’ (2) Kutalisha kuchifulu chindi, 2 Anyanta 19:15 yahoshaña nawu: “Eyi Yehova . . . , eyi yeyi Nzambi [walala] kanka weyi hohu.” (3) Kutalisha kuñovu jindi, Chimwekeshu 4:11 hatulejeña nawu: “Eyi Yehova, eyi Nzambi yetu, wunateli kutambula kulema nimpuhu niñovu, muloña yeyi waleñeli yuma yejima, nawa muloña wankeñelu yeyi dichi chiyekalilaku, dichayileñeleluwu [NW].” (4) Twatela kwanuka cheñi netu Yehova diyi Mukwakuhana Wumi, wukweti nkeñelu yakutwipulwisha kufuma kunshidi nikukufwa: “Wamwinu wambala waYehova.” (Masamu 3:8; 36:9) (5) Twatela kwiteja netu Yehova diyi Mukwakuhana Nshimbi Wabadika: ‘Yehova diyi Nsompeshi yetu, Yehova diyi mukwakutwinka Nshimbi, Yehova diyi Mwanta wetu.’ (Isaya 33:22) Hamuloña wakwikala nayifulu yejimiyi, anatukonkomweni nawu: “Keñaku Yehova Nzambi yeyi namuchima weyi wejima, nawumi weyi wejima, namaaneyi ejima.”—Matewu 22:37.

9. Indi kupapatishewa “mwijina . . . daMwana” chalumbulukadi?

⁹ Indi kupapatishewa “mwijina . . . daMwana” chalumbulukadi? Chalumbuluka kwiluka ijina daYesu Kristu, nichifulu, niñovu yindi? Ijina dindi, Yesu, dalumbuluka nawu “Yehova Diyi Chamwinu.” Chifulu chindi wachitambula  hamuloña wakwila yena diyi Mwana kanka windi hohu, wedi wayileñaleña yaNzambi. (Matewu 16:16; Akolose 1:15, 16) Kutalisha hadiiwu Mwana, Yowanu 3:16 yatulejaña nawu: “Chaswejeliyi Nzambi kukeña mpata yamunu mwishina [yawantu atela kukulewa] waheni Mwanindi wumu hohu, kulonda muntu wukumukuhwelela aheti wumi wahaya nyaka, akabuli kunoña.” Hamuloña wakwila Yesu wafwili washinshika, Nzambi wamusañwili mudi afu nakumwinka ñovu yikwawu. Kwesekeja nakapostolu Pawulu, Nzambi ‘wamutumbakesheli [Yesu] chakubadika’ mwiwulu nihamaseki, nakwikala wamuchiyedi kudi Yehova hohu. Dimuloña waweni “mwijina daYesu manuñu ejima akafukami, . . . nimadimi ejima aketeji nawu Yesu Kristu diyi Mwanta, kulonda kulemesha Nzambi Tata.” (Afwilipi 2:9-11) Ichi chinalumbuluki nawu kwovwahila nshimbi yaYesu, yafumaña kudi Yehova yomweni.—Yowanu 15:10.

10. Indi kupapatishewa ‘mwijina . . . daspiritu yajila’ chalumbulukadi?

¹⁰ Indi kupapatishewa ‘mwijina . . . daspiritu yajila’ chalumbulukadi? Chalumbuluka kwiluka nzatilu nimudimu waspiritu yajila. Indi spiritu yajila hichumanyi? Hiñovu yazatikaña yaYehova, yazatishañayi hakushikija nkeñelu yindi. Yesu wayilejeli atumbanji twindi nindi: ‘Ami nakamulomba Tata, wakayinka nkwashi mukwawu akekali nanenu nyaka yejima. Yowu spiritu yansañu yalala.’ (Yowanu 14:16, 17) Chumichi chadi kuyilisha wena kwiladi? Yesu watwalekelihu nakuyileja nindi: “Mwakatambula ñovu, mwakekala ayinsahu jami nimuYerusalema, nimwahita Yudeya mwejima, nimuSamariya, nikwakumina maseki.” (Yililu 1:8) Kuhitila mukuzatisha spiritu yajila, Yehova woneneni cheñi nsona yamuBayibolu: ‘Kwosi wuprofwetu wenzahu dehi chakufuma kumuchima wamuntuku; ilaña antu ahosheli chakufuma kudi Nzambi, chakuyihoshesha kudi spiritu yajila.’ (2 Petulu 1:21) Komana twelukaña mudimu waspiritu yajila neyi hitukudiza Bayibolu. Njila yikwawu yitwelukilañamu spiritu yajila yidi  yakuhitila mukumulomba Yehova kulonda yatukwashiku kumwekesha “nyikabu yaspiritu,” yidi neyi “kukeña, muzañalu, kuwunda, kukaba kabe-e, luwi, kuwaha, kushinshika, kwovwaha, kudihemba.”—Aŋalija 5:22, 23.

11. (a) Indi chipapatishu chalala chalumbulukadi mumafuku etu? (b) Indi chipapatishu chinekali ñahi neyi kufwa hela kusañula?

¹¹ Antu atachi apapatishiluwu kwesekeja nanshimbi jaYesu adiña aYudeya niantu abalumukili kwikala aYudeya, kutachika mu 33 C.E. Kufumahu, kukoleka kwakwikala atumbanji awiniKristu akwiheni kudi eniSamariya. Kulondelahu, mu 36 C.E., mutambikewa watoheleliku, wabombelelimu niaJentili abula kwalama. Henohu kanda ayipapatishi, eniSamariya niaJentili adiña nakudihana halwawu kudi Yehova kulonda kumukalakela neyi atumbanji twaMwanindi. Chumichi chatwalekelihu kwikala chinjikijilu chaweniKristu chachipapatishu chamumenji ndo-o nikulelu. Kujimika chikupu mumenji hichinjikijilu chashikila chaniku kudihana kwahalwetu, muloña chipapatishu hikujiika kwachifwikija. Kukujimika kwishina damenji achipapatishu kwemenañaku nawu wunafwi kuyuma yiwakoñeleña kunyima. Kukusefula mumenji kwemenañaku nawu anakwilishi kwikala wamumi kulonda wileña nkeñelu yaNzambi. Ichi ‘chipapatishu chimu’ chazatikaña kudi ejima akwikala eniKristu. Hachipapatishu, dihu hiyenzaña nakwikala aYinsahu jaYehova, ankoñi jaNzambi anatondiwu.—Aefwesesa 4:5; 2 Akorinda 6:3, 4.

12. Indi chipapatishu chamumenji chawiniKristu chemenañaku chumanyi, nawa munjilanyi?

¹² Chipapatishu chamuchidiwu chikweti ñovu yeneni yakuhandisha kumesu aNzambi. Chakutalilahu, hanyima yakuhosha hansañu yaNowa yakutuña watu mwahandilili Nowa nichisaka chindi haDibaji, kapostolu Petulu wasonekeli nindi: ‘Wena Menji owu hichifwikija chachipapatishu chayihandishaña; hichakufumisha nachu majilu amujimbaku, ilaña  chakumwekesha nachu kudi Nzambi chinleji chamuchima chachiwahi, kuhitila mukusañuka kwaYesu Kristu mudi afu.’ (1 Petulu 3:21) Watu wadiña hiwunsahu weneni wakwila nawu Nowa wakalakeli mudimu wamwinkeliwu kudi Nzambi nakashinshi. Chelili mudimu wakutuña watu wunamani dehi, ‘mpata yamunu mwishina yadiñuku yajiminini mumenji, yanoñeli.’ (2 Petulu 3:6) Ilaña Nowa nichisaka chindi, ‘antu atanu nasatu ahandili kumenji.’—1 Petulu 3:20.

13. MwiniKristu anamupulwishi kuchumanyi kuhitila muchipapatishu chamumenji?

¹³ Makonu, ana adihanaña kudi Yehova hamuloña wakwikala nachikuhwelelu mudi Kristu wasañwiliwu apapatishewaña hakumwekesha iku kudihana. Atwalekañahu nakwila nkeñelu yaNzambi yamumafuku etu, nawa anayihandishi kumpata yamakonu yatama. (Aŋalija 1:3, 4) Hiyanakuya kukujilumuka hamu nañililu yayuma yatama yamakonuku. Anayipulwishi kuniku kujilumuka nawa anayinki chinleji chachiwahi kudi Nzambi. Kapostolu Yowanu nayikani ambuña aNzambi nindi: “Mpata yamunu mwishina yikuhita, nikufwila kwayu kwatama, hakwinza muntu welaña muchima waNzambi washakamaña haya nyaka.”—1 Yowanu 2:17.

 Kuzata Kwesekeja naNyidimu Yetu

14. Muloñadi chipapatishu nkawachu chichikubulila kwikala chuma chakuleta wamwinu?

¹⁴ Chikwikala chaluwa neyi tuhosha netu chipapatishu nkawachu hohu dichuma chaletaña wamwinu. Chekalaña chalema hohu neyi muntu nadihani chikupu kudi Yehova kuhitila mudi Yesu Kristu nawa nakwila nkeñelu yaNzambi, nakwikala washinshika kushika nikunsa. ‘Muntu wukukakela kushika nikunsa diyi wakahanda.’—Matewu 24:13.

15. (a) Makonu, nkeñelwinyi yikwetiyi Nzambi kutalisha kudi eniKristu apapatishewa? (b) Indi kwikala kambanji wawiniKristu kwalema ñahi muwumi wetu?

¹⁵ Nkeñelu yaNzambi kutalisha hadi Yesu yabombelelimu chazatishiliyi wumi windi neyi muntu. Wumi windi awukamikili mukufwa hamu neyi mulambu. Ninetu, twatela kuhana nyijimba yetu kudi Nzambi, nakutwalekahu kudihana kuhitila mukwila nkeñelu yaNzambi. (Aroma 12:1, 2) Hitukutwesha kwila nkeñelu yaNzambi chiwahi neyi chakwila mpinji yikwawu tudimwekeshaña neyi akamatuña mumushikila hela wumi wetu tuwushindameshela hakufwila yuma yalwisu, nikuhana hohu nyidimu yahakanwa kudi Nzambuku. (1 Petulu 4:1-3; 1 Yowanu 2:15, 16) Hampinji yelili kaYudeya wumu yamwihuli Yesu hachuma chatela kwilayi kulonda yakaheti wumi wahaya nyaka, Yesu wahosheli hakulema kwakwikala nanshakaminu yayililu yayiwahi. Ilaña watenenihu chuma chimu chasweja kulema: kufwila kwikala kambanji wawiniKristu, mukwakumulonda Yesu. Ichi dichatela kwikala chuma cheneni muwumi. Kufwila yuma yakumujimba bayi kwikala kwatachuku.—Matewu 19:16-21.

16. (a) Mudimwinyi wukwetiwu eniKristu ejima wunakundami kuWanta? (b) Neyi chinamwekeshiwu hamafu 116 ni 117, jinjilanyi jajiwahi jinashimuniwu mwakukalakela mudimu waWanta? (c) Mudimu wakushimwina namuchima wetu wejima wahanaña wunsahwinyi?

 ¹⁶ Nawa chatela kuchikonkomwena nawu nkeñelu yaNzambi kutalisha hadi Yesu yabombelelimu mudimu walema nankashi wunakundami kuWanta waNzambi. Yesu amuwayishili kwikala Mwanta. Ilaña henohu wuchidi hamaseki, washimwini hansañu yaWanta chikupu. Anetu tukweti mudimu wowumu wakushimwina, nawa tukweti wunsahu washikila wakukalakala mudimwiwu namuchima wejima. Kwila mwenimu, dikwila nawu tunakumwekesha kusakilila kuwanta waYehova cheñi nawa nikukeña kutwakeña akwetu antu. (Matewu 22:36-40) Cheñi nawa twamwekeshaña nawu twadinuña hamu nawakwetu akwakudifukula mukaayi kejima, wonsu wawu hiyakwakushimwina Wanta. Ejima, mukudinuña kwamukaayi kejima, twatwalekañahu nachikonkwanyi chawumi wahaya nyaka muwanta wahamaseki wawuna Wanta.

Kuhitulukamu kwaKuhanjeka

• Kudifwananyi niyaambu yidi hakachi kachipapatishu chaYesu nachipapatishu chamumenji makonu?

• Indi kupapatishewa ‘mwijina daTata, nidaMwana, nidaspiritu yajila’ kwalumbulukadi?

• Chumanyi chinabombelewi mukutwalekahu nanyidimu yetu yachipapatishu chamumenji yawiniKristu?

[Malwihu aKuzatisha haKudiza]

[Nyevulu yidi hefu 116, 117]

 JINJILA JIKWAWU MWAKUSHIMWINA WANTA

Kuhitila mukufuntila nakutala ana amwekesheli mpwila

Kudi antaña

Kudi antu yiwazataña nawu

Kudi akwenu akashikola

Munyikwakwa

Kwitala nikwitala

Hakudiza kwaBayibolu kwahetala