Kapetulu 7

Chuma Chitwadizaña Hakutama Kwetejayi Nzambi

1, 2. (a) Neyi Yehova wanyakashanini kuyikisañana akwakudikaña muEdeni, chumichi chadi kutukuma ñahi? (b) Chumanyi chachiwahi chinatuloñesheliyi Yehova?

NKAKULULA Yakoba wahosheli nindi, “nyaka yinahandami yantesha hohu yatama.” (Kutachika 47:9) Chochimu, Yoba wahosheli nindi muntu “wamafuku antesha kwindi, wamona kwayihuñu.” (Yoba 14:1) Kufwana wena, etu amavulu twamonaña kukala, niwuñaji waheña, nimakabi. Ilaña kuvwalika kwetu hikwaya mukwila nawu Nzambi waheñeshili wuñajiku. Eña, hitukweti yitoñojoka yaloña ninyijimba yakolaku, nimukala waParadisa mwadiña Adama niEvu hatachiku. Indi neyi Yehova wayikisañeni hayina mpinji yadikañiliwu? Chiña hikwekala kukata, nikuneña, hela kufwaku, nawa nyunza yawantu niyena kachi kwosi. Chiña hitwasemukaku. Muluwi lwindi, Nzambi wayitejeli Adama niEvu kuvwala nyana hela chakwila niwena aswanini nshidi. Nawa kuhitila mudi Kristu, Yehova watuloñesheleleli kutambula chuma chajimbesheliyi Adama—wumi wahaya nyaka muparadisa heseki.—Yowanu 10:10; Aroma 5:12.

² Chinekali chakutwikolesha hakutalila mbidi kulonda twakashakami haya nyaka mwituña dadiha mukachi kaParadisa, mutwakalubuka kuyikatu, nikuneña, nikuyihuñu, nikukufwa, cheñi nikudi antu atama! (Yishimu 2:21, 22; Chimwekeshu 21:4, 5) Kwesekeja nachahosha Bayibolu, twadizaña netu, chineli wamwinu wetu wekala walema  nankashi kudetu nikudi Yehova, ilaña kudi chuma chimu chasweja kulema chinakundami kuniyi nsañu.

Hamuloña Wejina Dindi Dabadika

3. Chumanyi chinabombelimu kutalisha kunsañu yakushikijewa kwankeñelu yaYehova kwiseki nikumuchidi wamuntu?

³ Ijina daNzambi anadibombelimu mukushikija nkeñelu yindi kutalisha kwiseki nikumuchidi wamuntu. Ijina denidi, Yehova, dalumbuluka nawu “Wakojejaña Yuma Yejima Kwikalaku.” Komana ijina dindi demenañaku wuntu windi hamu neyi Mwanta Wakuleña kwejima, Washikijaña nkeñelu yindi, nawa hiNzambi yansañu yalala. Hamuloña wachifulu chikwetiyi Yehova, kuwunda ninshakaminu yayuma yejima yidi mwiwulu niyahamaseki yashindamena hejina dindi niyuma yabombelamu yatela kuyinka kalemesha kakeñewaña chikupu nawa ejima atela kumwovwahila.

4. Indi nkeñelu yaYehova kutalisha kwiseki yabombelelimu chumanyi?

⁴ Chelili nayileñi dehi Adama niEvu, Yehova wayinkeli mudimu. Walumbulwili chikupu nindi nkeñelu yindi bayi neyi yadiña yakwovwahisha iseki hohu—nikuswija ñinza yaParadisaku—ilaña yadina yakushakamamu nawanyanawu. (Kutachika 1:28) Komana iyi nkeñelu yadi kujiya hamuloña wanshidi yawu? Kenoku kasawuntu kakenza kwijina daYehova mukwañovu yejima neyi yokañanya kushikija nkeñelu yindi kutalisha kwiseki nikudi antu!

5. (a) Neyi antu atachi adyili kumutondu wakwiluka nachu niyayiwahi niyatama, kachi afwili mpinjinyi? (b) Munjilanyi mwashikijililiyi Yehova izu dindi didi haKutachika 2:17 hampinji yoyimu nakulemesha nkeñelu yindi kutalisha kwiseki?

⁵ Yehova wayisoñamishili Adama niEvu nindi neyi adikaña nakudya kumutondu wakwiluka nachu  niyayiwahi niyatama, akafwa ‘dodenodu ifuku’ diyakadyaku. (Kutachika 2:17) Neyi mwomwahosheliyi, Yehova wayinkeli muloña dodenadina ifuku davulumwiniwu nakuyinka muloña wakufwa. Kwesekeja nammwenu yaNzambi, Adama niEvu afwili dodina ifuku. Hakwila nawu yashikiji nkeñelu yindi kutalisha kwiseki, Yehova wayitejeli kuvwala nyana henohu kanda afwi lwakumujimba. Hela chochu, chineli Nzambi wamonaña yaaka 1,000 neyi ifuku dimu, chelili Adama yafwi nayaaka 930, yadiña ‘mwifuku’ dimu. (2 Petulu 3:8; Kutachika 5:3-5) Dichi walala waYehova awuhembeli kushika nikumpinji yakuhana kubabesha, nawa ninkeñelu yindi kutalisha kwiseki hiyayikañesheli nañufwa yawuku. Antu abula kuloña, kushilahu niantu atama ayileka nawu ahandi hakapinji kanti.

6, 7. (a) Kwesekeja naKwidika 9:15, 16, muloñadi Yehova chetejelayi kutama kutwaleka hakuleha kwamuchidiwu? (b) Kutalisha kudi Fwaro, indi ñovu yaYehova ayimwekesheli ñahi, nawa ijina Dindi aditumbakesheli ñahi? (c) Chumanyi chikafumamu neyi mpata yamakonu yatama yinakumi?

⁶ Mazu ahosheliyi Yehova kudi nyuli wakuEjipitu mumafuku aMosi anamwekeshi chikupu muloña wunetejeliyi Nzambi kutama kutwalekahu. Chelili Fwaro yayilekeshi anyana kaIsarela kwidika muEjipitu, Yehova hashikeneni kumukisañana hohenohuku. Yipupu ikumi ayileteli mwituña, kulonda kumwekesha ñovu yaYehova mujinjila jachihayamisha. Hakuyisoñamisha hachipupu chamuchitanu nachiyedi, Yehova wamulejeli Fwaro nindi Yena natweshi kujilumuna Fwaro niantu jindi heseki dejima chakadi nikukala. Yehova nindi, ‘chalala dichinabulili kukukisañana kulonda nikumwekesheli ñovu yami, kulonda ijina dami dakatiyakani mwejima mwahita maseki.’—Kwidika 9:15, 16.

⁷ Chelili Yehova nayilubuli dehi aIsarela, chalala ijina dindi  adilukili chikupu kwejima. (Yoshuwa 2:1, 9-11) Munahiti dehi yaaka kubadika ha 3,500, yuma yeliliyi kunyima hiyayijimbala makonuku. Bayi neyi ijina dindi dahalwindi daYehova didatiyakeni hohuku, ilaña niwalala wanowu Muntu wukweti ijina. Chumichi chatumbakesheli ijina daYehova hamu neyi Nzambi wahembaña yikaninu yindi, nawa wazuñilañaku ambuñindi. (Yoshuwa 23:14) Chamwekesheli nawu hamuloña wañovu jindi jabadika, kwosi chuma nichimu chinatweshi kukañesha nkeñelu yindiku. (Isaya 14:24, 27) Komana tunatweshi kukuhwelela netu keña yolwiliku ambuñindi ashinshika kuhitila mukujilumuna mpata yejima yatama yaSatana. Iku kulema kwamwekeshaña ñovu jasweja kubadika, kwenzaña hejina daYehova hiyakakwivulamenaku. Nkisu hiyakakumaku.—Ezekeli 38:23; Chimwekeshu 19:1, 2.

‘Maana aNzambi, Ochiyakunama!’

8. Yumanyi yinatulejiyi Pawulu nindi tutoñojokihu?

⁸ Mumukanda windi wasonekeleliyi eniRoma, kapostolu Pawulu wehwili lwihu nindi: “Nzambi wukweti habulilayi kuloña, tahindi?” Wakwili chakola nindi: “Chinjila!” Kulondelahu wakonkomweneni haluwi lwaNzambi nakutalisha kumazu ahosheliyi Yehova hakumwiteja Fwaro kutwalekahu nakuhanda hadi mpinji yayilehi. Pawulu wachimwekesheli cheñi nindi etu antu twekala neyi ndambu yidi mumakasa akañemi. Watwalekelihu nindi: “Nzambi chakeñeliyi kumwekesha kuzuwa kwindi, nakutiyakesha ñovu jindi, wetejeli kudiwunjika nansañu yayuma yatela kuzuwila, yaloñeshelawu dehi kujilumuka; kulonda akatiyakeshi maheta akulema kwindi nayuma yatoñeliyi dehi, yaloñeshelañayi dehi yiikali yalema, yetu atambikiliwu mukachi kawa[Kamatuña], himukachi kawaYudeya hohuku.”—Aroma 9:14-24.

9. (a) Indi ‘yuma yatela kuzuwilawu, yaloñeshelawu dehi kujilumuka’ hiyanyi? (b) Muloñadi Yehova chinamwekesheliyi kudiwunjika chikupu hansañu yawakwakudikaña nindi, nawa chuma chikafumamu kunsa yachi chikahetesha ñahi ana ejima amukeña?

 ⁹ Kufuma tuhu hatachikilili kudikaña muEdeni, wudi wejima wunadikañi naYehova ninshimbi jindi nekali ‘yuma yatela kuzuwila, yaloñeshelawu dehi kujilumuka.’ Mpinji yejimiyi kufuma tuhu hayina mpinji, Yehova nakudiwujika hohu. Antu atama anadiwuli njila jindi, nikuyandisha ambuñindi, cheñi nikujaha Mwanindi. Hakumwekesha chishishi chacheni, Yehova neteji mpinji yashikila kulonda yileñaleña yejima yikamoni chikupu yuma yatama yakafuma mukudikaña naNzambi nikudiyula chakadi yena. Hampinji yoyimu, Kufwa kwaYesu kwaloñesheli njila yakulubwilamu muchidi wamuntu wovwahila nawa ‘nikukisañana nyidimu yaDiyabolu.’—1 Yowanu 3:8; Aheberu 2:14, 15.

10. Muloñadi Yehova chanetejeliyi kutama hadi yaaka 1,900 yinahitihu?

¹⁰ Hadi yaaka yakubadika ha 1,900 kufuma hakusañuka kwaYesu, Yehova neteji “yuma yatela kuzuwilawu” yikwawu kubula kuyikisañana. Muloñadi? Muloña wakwila nawu, wadiña nakusakula ana ejima akayulaña chimu naYesu Kristu muWanta windi wamwiwulu. Kuvula kwawu kunashiki ku 144,000, nawa ‘hiyuma yatoñeliwu dehi’ yateneniwu kudi kapostolu Pawulu. Chatachi, mukachi kawaYudeya atambikilimu amakwawu kulonda atuñi idi izaza dakwiwulu. Nkumininaku, Nzambi watambikili antu akunyuza yawaJentili. Yehova hayikanjikijaña awa antu kumukalakelaku. Ilaña hakachi kanowu etejeli nakusakilila kuloñesha kwakuwahi, wayinkeli amakwawu kukoleka kwakwikala akwakuyula chimu naMwanindi muWanta wamwiwulu. Kusakula kwanidi izaza damwiwulu keña kumani.—Luka 22:29; Chimwekeshu 14:1-4.

11. (a) Izaza dimu didi dinakuhetelamu mukudiwunjika kwaYehova chayinu mpinji? (b) Indi afu akahetelamu ñahi?

 ¹¹ Indi chikuhwelelwinyi chikwetiwu antu akashakama hamaseki? Kudiwunjika kwaYehova kunakojeji kupompesha hamu “izaza deneni” kufuma kunyuza yejima. Kuvula kwawu kunashiki muyihita. Yehova nakani nindi idi izaza dakapuluka kukuma kwampata yamakonu nawa dikweti chikuhwelelu chakwikala nawumi wahaya nyaka muparadisa hamaseki. (Chimwekeshu 7:9, 10; Masamu 37:29; Yowanu 10:16) Mumpinji yapimayi Nzambi, antu amavulu afwa dehi, akayisañula nakuyinka kukoleka kwakwikala antu akayulewaña naWanta wamwiwulu. Izu daNzambi dashimwinañahu dehi haYililu 24:15 nawu: “Kwamba kekala kusañuka kwawaloña nikwawabula kuloña.”—Yowanu 5:28, 29.

12. (a) Chumanyi chitunadizi hadi Yehova kufuma mukutama kwetejayi? (b) Watiyaña ñahi hanjila yanazatilimu Yehova haniwu muloña?

¹² Komana mudi kubula kuloña muyuma yejimiyi? Inehi, muloña wakubula kuleta kujilumuna kwindi hadi antu atama, hela ‘hayuma yatela kuzuwilawu,’ Nzambi nakumwekesha luwi kudi antu amakwawu, kwesekeja nankeñelu yindi. Ichi chinamwekeshi chikupu nawu hisaluwi nawa hikukeña. Cheñi, kwikala nampiji yakushinshika hakutoha kwankeñelu yindi, tunateli kudiza yuma yayivulu hadi Yehova yomweni. Twahayamaña hayuma yashiyashana yawuntu windi yinasololiwu—niwuñaji windi, niluwi lwindi, nikudiwunjika kwindi, nimaana indi ashiyashana. Maana aYehova hakuzata namuloña wawanta wakuleña kwejima—wuswa windi wakuyula—amba katwalekahu haya nyaka kwikala wunsahu hamuloña wakwila mwayulilañayi dimwabadika chikupu. Twatela kuhosha hamu nakapostolu Pawulu netu: ‘Maheta amaana nayuma yeluka Nzambi, ochiyakunama! Wuñanji windi,  ochiwakañanya kuwiluka! Njila jindi, ochijakañanya kujishinshika!’—Aroma 11:33.

Mpinji Yakumwekesha Kwakama Kwetu

13. Neyi hitukuyanda lwakumunjimba, kukolekanyi kunatwinkiwu, nawa chumanyi chikatukwashaku kuzata chiwahi?

¹³ Ambuña Nzambi amavulu anakuyanda lwakumujimba. Anakutwalekahu nakuyanda muloña Nzambi kanda yojilumuni antu atama nawa kanda yafuntishi muchidi wamuntu chadiñayi neyi chashimwineñahu dehi. Chumichi komana chatela kututiyisha kutama? Tahindi tunateli kumona kuyanda kwamuchidiwu neyi hikukoleka kwakumwekeshelamu Diyabolu nawu hisakutwamba? Tunatweshi kukoleshewa neyi twanuka kulembelela kwakwila nawu: “Eyi mwanami, ikalaku mukwamaana, wutiyishaña muchima wami kuwaha, kulonda nakatweshi kwakula muntu wukunsawula.” (Yishimu 27:11) Satana, wamusawulaña Yehova, watwambili nindi neyi antu ajimbesha maheta hela ayanda lwakumujimba, atela kumutwika Nzambi muloña, hela kumutuka. (Yoba 1:9-11; 2:4, 5) Twamutiyishaña Yehova kuwaha neyi twikala ashinshika kudi yena hampinji yamakabi, nawa twamwekeshaña netu nhoshelu yaSatana yakutwamba kudetu.

14. Neyi tushindamena hadi Yehova hampinji yitudi mukukala, ihetanyi ditunateli kuwana?

¹⁴ Neyi tushindamena hadi Yehova hampinji yitudi mukukala, tunateli kwikala nayililu yayiwahi. Chakutalilahu, hamu neyi chakufumamu muyuma yakabakeniyi Yesu, “wadizili kwovwahila” munjila oyu yabuliliyi nikwiluka hatachi. Ninetu nawa tunateli kudizilaku chuma kukweseka kwetu, chakwila tunatweshi kumwekesha kudiwunjika, nikumika, nikuswejesha kusakilila hajinjila jaloña jaYehova.—Aheberu 5:8, 9; 12:11; Yakoba 1:2-4.

15. Hampinji yitunakumika kukala mukudiwunjika, indi amakwawu atela kuhetelamu ñahi?

 ¹⁵ Amakwawu atela kumona yuma yitunakwila. Hamuloña wayuma yitunakuhitamu hansañu yakukeña kuloña, amakwawu mukuhita kwampinji ayilukaña eniKristu alala makonu. Nawa kuhitila mukudibomba nanetu mukudifukula, atela kwikala nakukoleka kwakutambwila nkisu yawumi wahaya nyaka. (Matewu 25:34-36, 40, 46) Yehova niMwanindi anakukeña antu ekali naniku kukoleka.

16. Indi mmwenu yetu yamakabi akumujimba yinakundami ñahi kunsañu yakukwatankana?

 ¹⁶ Chikwikala chakuhameka neyi chakwila tumona mpinji yakala kwikala himpinji yakumwekesha kwakama kwetu kudi Yehova, cheñi nawa nikudibomba mukuwanisha nkeñelu yindi. Neyi tukwila mwenimu, tunakuhana wunsahu wakwila nawu tunakwendela hamu nakukwantakana naNzambi niKristu. Yesu wayilombeleliku eniKristu alala ejima kudi Yehova nindi: “Hinukukumina dakuyilombela wena [atumbanji twindi adiñayi nawu] hohuku; ilaña nukulombela niwena akunkuhwelela namazu awu; kulonda wejima wawu akekali wumu, neyi chiwekala eyi Tata mudami ninami mudeyi; kulonda niwena akekali mudetu.”—Yowanu 17:20, 21.

17. Chikuhwelelwinyi chitwatela kwikala nachu neyi twikala ashinshika kudi Yehova?

¹⁷ Neyi twikala ashinshika kudi Yehova, yena wakatwisomwena chikupu. Izu dindi dahosha nawu: “Ikalenu akola mbe chakadi kuswijewa. Swejenu kukalakala mudimu waMwanta mafuku ejima, muloña mweluka dehi kukalakala kwenu kumwakabakanaña mudi Mwanta hikwamukunkulwayuku.” (1 Akorinda 15:58) Dahoshaña cheñi nawu: “Nzambi waloña, hakavulamena mudimu wenu hela kukeña kumwakeñeli ijina dinduku.” (Aheberu 6:10) Yakoba 5:11 yahoshaña nawu: “Toñojokenu chitwatenaña antu atatakeneni, netu akooleka. Munatiyi mwatatakeneniyi Yoba; munamoni nimwakumishañayi Yehova, chaswejañayi Yehova kutiyila antu wushona niluwi.” Chumanyi chamumwekeneni Yoba? ‘Yehova wamukoolekesheli Yoba; kukooleka kwamukoolekesheliyi kwakukumininaku kwabadikili kwakusambila.’ (Yoba 42:10-16) Eña, Yehova ‘wasomwenaña antu amukeñakeñaña.’ (Aheberu 11:6) Denodu isomu ditunakutalila—dawumi wahaya nyaka muparadisa heseki!

18. Chumanyi chamba kamwekana kuyitoñojoka yatama yitukweti?

 ¹⁸ Kuyula kwaWanta waNzambi kwamba kafumishahu kutama kwejima kunakoñiwu kuyisaka yawantu hamakombakaji ayaaka yinahitihu. Muzañalu wahayina mpinji wakabadika lukadi lutunakumona makonu. Hiyakatuluwañesha nayitoñojoka yatama yamakabi akunyimaku. Yitoñojoka yayiwahi ninyidimu yakenzala muyihandilu yawantu yampinji yejima mwituña dadiha yakajimañeshaña yitoñojoka yatama chovu-chovu. Yehova nindi: “Hinukuleña mawulu amaha, [nfulumendi yayiha yaWanta wamwiwulu yikayula muchidi wamuntu] nimaseki amaha [muchidi wawantu waloña], yuma yakusambila hiyakayanuka nawaku, hiyakenza nikumuchimaku. Ilaña [enu antu] tiyenu kuwaha nakuzañalala haya nyaka nayuma yinukuleña.” Eña, mwituña dadiha daYehova, akwakuloña akatwesha kuhosha nawu: “Mwahita iseki dejima munanooki dehi, munamweni; [antu] hiyakuvwakuka nakwimba tumina.”—Isaya 14:7; 65:17, 18.

Kuhitulukamu kwaKuhanjeka

• Hamuloña wakwiteja kutama, indi Yehova namwekeshi ñahi kalemesha keneni kwijina dindi?

• Indi kwiteja kwaNzambi ‘kwayuma yatela kuzuwilawu’ kunahani ñahi luwi lwindi kushika kutudi?

• Chumanyi chitwatela kufwila kwiluka hanshakaminu yinabombelimu kuyanda kwahalwetu?

[Malwihu aKuzatisha haKudiza]

[Nyevulu yidi hefu 67]

Yehova ‘wamukoolekesheli Yoba; kukooleka kwamukoolekesheliyi kwakukumininaku kwabadikili kwakusambila’