Kapetulu 14

Indi Yehova Walombolaña Ñahi Kuloñesha Kwindi?

1. Nsañwinyi yalumbulula Bayibolu hansañu yakuloñesha kwaYehova, nawa muloñadi chichinekalili chalema kudetu?

KOMANA Nzambi wukweti kuloñesha? Nyikanda yonenawu yatulejaña nawu wukweti. Mwizu dindi, watulejaña mwantesha hachibalu chaniku kuloñesha kwamwiwulu kwakuchinisha. (Ezekeli 1:1, 4-14; Danyeli 7:9, 10, 13, 14) Hela chakwila hitunatweshi kumona ichi chibalu chakamwekanañaku, akwakudifukula alala makonu kwayikundama chikupu. (2 Anyanta 6:15-17) Kuloñesha kwaYehova kukweti chibalu chinakumwekana hamaseki. Bayibolu yatukwashañaku kwiluka chikwekala nichakwilombolañayi Yehova.

Kwiluka Kuloñesha Kunakumwekana

2. Chipompelwinyi chachiha chatuñiliyi Nzambi?

² Hadi yaaka 1,545 muza wawaIsarela wadiña chipompelu chaNzambi. (Yililu 7:38) Ilaña aIsarela akañenyi kuhemba nshimbi jaNzambi nawa amukanini Mwanindi. Chafuminimu, Yehova wachikaanini china chipompelu nakuchishiya. Yesu wayilejeli aYudeya nindi: “Talenu itala denu anayishiyilidu dehi.” (Matewu 23:38) Kufumahu, Nzambi watuñili cheñi chipompelu chachiha, ochakwatiliyi nachu chitiyañenu chachiha. Chipompelu chenichi chateleli kutuñewa nawa 144,000 antu atondeliwu kudi Nzambi kushakama hamu naMwanindi mwiwulu.—Chimwekeshu 14:1-4.

3. Chumanyi chamwekeni haPentekosta 33 C.E. chaheni wunsahu washikila wakwila nawu haniyi mpinji Nzambi wadiña nakuzatisha chipompelu chachiha?

 ³ Antu atachi kwikala muchina chipompelu chachiha ayiwayishili naspiritu yajila yaYehova haPentekosta 33 C.E. Kutalisha kuniyi mpinji yabadika kulema, twatañaña nawu: ‘Chelili ifuku dapentekosta dinashiki dehi, wejima wawu adiña hamu mwomumu. Kukasumuka mwiwulu himukufuma lushindu ludi neyi lwampepela yinakukunka nañovu yasweja nankashi, hilukwinzesha itala dejima mwadiña nakushakamawu. Hikukuyimwekena madimi aambuka, adi neyi nyizuzu yakesi; hiyikuwilawila hadi wena ejima hamuntu hamuntu. Wejima wawu hiyakwinzala naspiritu yajila.’ (Yililu 2:1-4) Komana spiritu yaNzambi yaheni wunsahu washikila wakwila nawu idi dadiña izaza dawantu dikuzatishañayi Nzambi hakwila nkeñelu yindi nawa dikulombolewaña naYesu Kristu mwiwulu.

4. Makonu, anyi anatuñi kuloñesha kwaYehova kunakumwekana?

⁴ Makonu, ashalahu awa 144,000 hohu diwu adi hamaseki. Ilaña hakushikijewa kwawuprofwetu waBayibolu, “izaza deneni” ‘danyikoku yacheñi,’ adi dehi muyihita, anayileti nakudibomba hamu nawashalahu awayishewa. Yesu, Kabiña Walala, nabombi hamu iyi nyikoku yacheñi nawashalahu kulonda atuñi mulaka wumu wunakulombolayi hamu neyi Kabiña kawu wumu. (Chimwekeshu 7:9; Yowanu 10:11, 16) Ejima awa anatuñi chipompelu chimu chadinuña, kuloñesha kwaYehova kunakumwekana.

Kuloñesha Kwalombolewaña naNzambi

5. Hinyi walombolaña kuloñesha kwaNzambi, nawa munjilanyi?

⁵ Nhoshelu yamuNsona yakwila nawu “chipompelu chaNzambi wamumi” yatena muntu wachilombolaña.  Kuloñeshiku kwayulewaña naNzambi. Yehova wahanaña wunlomboli kudi antu jindi kuhitila mudi Yesu, muntuwu Wunatondiyi kwikala Mutu wachipompelu wakamwekanaña, nawa nikuzatisha Izu Dindi donenewa, Bayibolu.—1 Timotewu 3:14, 15; Aefwesesa 1:22, 23; 2 Timotewu 3:16, 17.

6. (a) Indi wunlomboli wakwiwulu wachipompelu wamwekeni ñahi munkulakaji yanyaka yakusambila? (b) Chumanyi chinakumwekesha nawu Yesu wuchidi Mutu wachipompelu?

⁶ Wunlomboli wamuchidiwu wamwekeni hatooka haPentekosta. (Yililu 2:14-18, 32, 33) Wamwekeni helili kañelu kaYehova yalomboli kutandisha nsañu yayiwahi muAfrica, nihampinji yatiyakeni izu daYesu hakuhana wunlomboli wakufutumuna Sawulu wakuTarusa, nihampinji yatachikiliyi Petulu mudimu wakushimwina kudi aJentili. (Yililu 8:26, 27; 9:3-7; 10:9-16, 19-22) Hela chochu, mukuhita kwampinji, kwosi mazu atiyakeni cheñi kufuma mwiwulu, niañelu hiyayimwenihu cheñuku, nawa kwosi yawaana yakuspiritu yaheniwu yayihayamishaku. Ilaña Yesu washiikili nindi: “Tiyenu, ami nidi nenu mafuku ejima nikwakakumina nyaka.” (Matewu 28:20; 1 Akorinda 13:8) Makonu, aYinsahu jaYehova atiyililaña wunlomboli waYesu. Chakadi wunlomboliwu, kushimwina nsañu yaWanta hampinji yoyimu nakutalañana namakabisha chadi kwikala chakala.

7. (a) Anyi atuña izaza ‘danduñu wamaana nikashinshi,” nawa muloñadi? (b) Mudimwinyi wamwinkeliwu “nduñu”?

⁷ Kwakwihi nakufwa kwindi, Yesu hakwikala Mwanta, wayilejeli atumbanji twindi hansañu ‘yanduñu wamaana nikashinshi’ akwinkayi mudimu walema. Ona “nduñu” wukekala hohu hampinji yayiliyi Mwanta kwiwulu nawa wakatwalekahu kuzata nañovu sampu nihakufunta kwaKristu kwakamonewaña muñovu yaWanta. Kulumbulula  kwamuchidiwu hikunahoshi hadi muntu wumu hohuku, ilaña kunatalishi kuchipompelu chaKristu chawayishewa. Hamuloña wakuchilanda namashi indi, Yesu wachiteneni nindi “nduñu” yindi. Wayinkeli ayilolu anichi chipompelu mudimu wakwilisha atumbanji nikuyidyisha mpinji yejima, kuyinka ‘yakudya yawu [yakuspiritu] hampinji yatelela.’—Matewu 24:45-47; 28:19; Isaya 43:10; Luka 12:42; 1 Petulu 4:10.

8. (a) Nyidimwinyi yikweti izaza danduñu makonu? (b) Muloñadi chichalema kudetu kwiteja nshimbi jinakuhanewa kuhitila munjila yaNzambi?

⁸ Hamuloña wakwila izaza danduñu dakalakeli mudimu waMwanta nakashinshi sampu nihakufunta kwindi kwakamonewaña mu 1914, wunsahu wudi kwoku wakwila nawu adinkeli nyidimu yamaneni chikupu mu 1919. Yaaka yejimiyi yinahitihu kufuma hayina mpinji yinekali yakushimwina Wanta mukaayi kejima, nawa izaza deneni dawakwakudifukula aYehova anadipompeshi kulonda adamwini kulukadi lwasweja. (Matewu 24:14, 21, 22; Chimwekeshu 7:9, 10) Awa niwena anakukeña yakudya yakuspiritu, nawa ayinkaña kuhitila mwizaza danduñu. Hakwila nawu tumuzañaleshi Yehova, twatela kwiteja nshimbi jahanañayi kuhitila muniyi njila nawa nikwilamu.

9, 10. (a) Munkulakaji yanyaka yakusambila, ntanjikilwinyi yadiñaku yakumanishilamu malwihu hansañu yantañishilu nikuhana wunlomboli wakushimwina nsañu yayiwahi? (b) Ntanjikilwinyi yakulombwelamu nyidimu yawantu jaYehova yinakuzatika makonu?

⁹ Mpinji yikwawu kwekalaña malwihu kutalisha hansañu yantañishilu niyisemwa. Chumanyi chatela kuzatika? Yililu kapetulu 15 yatwilejaña chamanishiliwu muloña wawaJentili afutumukili. Iwu muloña awutweli kudi apostolu niakulumpi, adiña nakukalakala neyi izaza dalombolaña. Awa antu hiyadiña aloñaku, ilaña Nzambi  wayizatishili. Atañili jinsona jakundama kuniyi nsañu cheñi nawa amweni chazataña spiritu yaNzambi yajila hakwiteja kuyishimwina aJentili. Kufumahu afuukwili chakuzata naniyi nsañu. Nzambi wakiswilili iku kuloñesha. (Yililu 15:1-29; 16:4, 5) Adina izaza dalombolaña datondeli antu kulonda ayitemeshi kuya nakutwalekahu kushimwina nsañu yaWanta.

¹⁰ Mumafuku etu, Izaza Dalombolaña dawaYinsahu jaYehova datuñewa nawana kwetu awayishewa naspiritu akumatuña ashiyashana, nawa ekala hachishina chamukaayi chawaYinsahu jaYehova. Nawunlomboli waYesu Kristu, Izaza Dalombolaña datwalaña hambidi kudifukula kwalala mumatuña ejima, nikulombola nyidimu yakushimwina yawaYinsahu jaYehova mumakumi amakombakaji ayipompelu yawu. Ana ekala Mwizaza Dalombolaña akweti yitoñojoka neyi yakapostolu Pawulu wasonekeleleli akwawu eniKristu nindi: “Hituyanyanta akukuhwelela kwenuku, tuyankwashi amuzañalu wenu; muloña mwakolelaña mukukuhwelela.”—2 Akorinda 1:24.

11. (a) Indi aeluda niankoñi akuzatila ayitondaña ñahi? (b) Muloñadi wutwatela kuzatila hamu nawantu atondewa?

¹¹ A Yinsahu jaYehova mukaayi kejima atalaña Kwizaza Dalombolaña kutonda amana kwetu ashikahu owu enkawu niwena wuswa wakutonda aeluda niankoñi akuzatila atalaña yipompelu. Yuma yakeñekaña hadowu atondawu ayisoneka muBayibolu nawa eluka chikupu nawu awa antu hiyaloñaku nawa avulumunaña. Aeluda ahamekaña ninowu atondaña muntu ekala namudimu weneni chikupu kumesu aNzambi. (1 Timotewu 3:1-10, 12, 13; Titusa 1:5-9) Dichi alombaña wukwashu waspiritu yaNzambi nikukeña wunlomboli Mwizu dindi donenewa. (Yililu 6:2-4, 6; 14:23) Tumwekeshenu kuhameka kwetu hakutwinka ‘yamukunkulu mudi antu,’ atukwashañaku wonsu  wetu kushika “mukunuñañana kwakwitiya kwakukuhwelela.”—Aefwesesa 4:8, 11-16.

12. Indi Yehova wazatishaña ñahi ambanda mukuloñesha kwalombolañawu kudi Nzambi?

¹² Nsona yashimunaña nawu wunlomboli wamuchipompelu atela kuwakamena kudi amayala. Ichi hichinatwali mukuyisekesha ambandaku, muloña amakwawu hiyanswana amuWanta wakwiwulu, nawa akalakalaña mudimu weneni nankashi wakushimwina. (Masamu 68:11) Cheñi nawa, hakwikala nakashinshi kakwakamena nyidimu yayisaka yawu, ambanda aleteshaña chipompelu  kwipuka ivumba dadiwahi. (Titusa 2:3-5) Ilaña mudimu wakutañisha muchipompelu awakamenaña kudi amayala atondawu kwila mwenimu.—1 Timotewu 2:12, 13.

13. (a) Bayibolu yakonkomwenaña aeluda kwikala nammwenwinyi kutalisha kuyifulu yawu? (b) Kukolekanyi kutwatela kwikala naku wonsu wetu?

¹³ Mukaayi, muntu wukweti chifulu cheneni amumonaña kwikala walema, ilaña mukuloñesha kwaNzambi lushimbi ludi nawu: ‘Muntu wunakehi mukachi kenwenu ejima, diyi muneni.’ (Luka 9:46-48; 22:24-26) Nsona yayifumbaña aeluda kwikala ababala bayi kwikala anyanta anawa ayishililiwu kudi Nzambi kuhembaku, chiña nakwikala akutalilahu anyikoku. (1 Petulu 5:2, 3) Bayi neyi antu atensha atondewaku, ilaña aYinsahu jaYehova ejima, amayala niambanda akweti kukoleka kwakumwimenaku Mwanta wakuleña kwejima, nikutena hejina dindi mukudizoza nikuleja antu kwejima hansañu yaWanta windi.

14. Kuzatisha jinsona jinateniwu, hoshenu hamalwihu anatanjikiwu kunsa yaparakarafu.

¹⁴ Chikuwaha neyi tudihula etu aweni netu: ‘Komana chalala natiyishaña nikusakilila hanjila yinakulombwelamu Yehova kuloñesha kwindi kunakumwekana? Komana yililu yami, ninhoshelu, ninzatilu yamwekeshaña mwenimu?’ Kutoñojoka hayikuma yinalondelihu kunateli kutwikwasha wonsu wetu kudishinshika.

Neyi chalala namwovwahilaña Kristu hamu neyi Mutu wachipompelu, neyi chinamwekeshiwu munsona jinalondelihu, chumanyi chinatela kwilaña? (Matewu 24:14; 28:19, 20; Yowanu 13:34, 35)

Neyi chakwila niteja chikupu yuma yinaloñeshuwu yakuspiritu yenzaña kuhitila mwizaza danduñu niIzaza dachu Dalombolaña, kudinyi kunakumwekesha kalemesha? (Luka 10:16)

 Indi antu ejima muchipompelu, sweje-e aeluda atela kuzata ñahi wumu namukwawu? (Aroma 12:10)

15. (a) Twamwekeshañadi, kuhitila muyililu yetu kutalisha kukuloñesha kwaYehova kunakumwekana? (b) Kukolekanyi kutukweti kwakumwekesha Diyabolu kwikala sakutwamba nikuzañalesha muchima waYehova?

¹⁵ Makonu Yehova nakutulombola kuhitila mukuloñesha kwindi kunakumwekana kunakulombolayi Kristu. Yililu yetu kutalisha kuniku kuloñesha yamwekeshaña ochu chitwatoñojokaña hamuloña wawanta. (Aheberu 13:17) Satana wazuñañeshaña nindi chuma cheneni chitwakeña hikudimena. Ilaña neyi twilaña yuma yakeñekaña nikutondolwela yuma yatama yakojejaña kudimena, twamumwekesha Diyabolu kwikala sakutwamba. Neyi tuyikeña anakulombola mukachi ketu nikuyilemesha ilaña tukaana ‘kulemesha antu kumesu hamuloña wanetu aweni wakudiilaku yuma,’ tukumuzañalesha Yehova. (Yuda 16; Aheberu 13:7) Kuhitila mukwovwahila kuloñesha kwaYehova, twamwekeshaña nawu Yehova diyi Nzambi yetu nawa netu twekala anuñañana hakudifukula kudi yena.—1 Akorinda 15:58.

Kuhitulukamu kwaKuhanjeka

• Indi kuloñesha kwaYehova kunakumwekana makonu hichumanyi? Kukweti nkeñelwinyi?

• Hinyi atondawu kwikala Mutu wachipompelu, nawa ntanjikilwinyi yinakumwekana mwahaninañayi wunlomboli wawuwahi kudetu?

• Yililwinyi yayiwahi yitwatela kumwekesha kudi ana adi mukuloñesha kwaYehova?

[Malwihu aKuzatisha haKudiza]

[Nyevulu yidi hefu 133]

Yehova watwilombolaña kuhitila mukuloñesha kwindi kunakumwekana kunakuyulewa naKristu