Kapetulu 13

Izaza Deneni Kumesu Etanda daYehova

1. (a) Henohu ambuña Nzambi adiñaku hampinji yikwabulili wuKristu nia 144,000 kanda atambuli wuloku wawuku, chumanyi chiyatela kumonawu? (b) Chumanyi chikekala chaswayi kudi ‘ezaza deneni’ awa achidi amomi chayinu mpinji?

AMBUÑA aNzambi ashinshika kutachikila hadi Abeli ndo-o nikudi Yowanu Mpapatishu ashili mudimu wakwila nkeñelu yaNzambi hambidi mukuhanda kwawu. Ilaña wonsu wawu afwa dehi, anakuhembela kuyisañwila kuwumi mwituña daNzambi dadiha hamaseki. A 144,000, akayula naKristu muWanta waNzambi wamwiwulu, niwena chiña asambila kufwa mwaka dinu akatambwili wuloku wawu. Hela chochu, haChimwekeshu 7:9 hashimunaña nawu munanu mafuku akukuminina, kwakekala “izaza deneni” kufuma kunyuza yejima dakabula kumona kufwa, ilaña dakekala nachikuhwelelu chakushakama hamaseki haya nyaka. Aneyi nawa wudi hakachi kawu?

Kwiluka Izaza Deneni

2. Chumanyi chaletesheli kutiyishisha kwakwiluka izaza deneni dinashimunuwu haChimwekeshu 7:9?

² Mu 1923, ambuña aYehova elukili nawu “anyikoku” amuchishimu chaYesu ashimunawu haMatewu 25:31-46 ‘nianyikoku acheñi’ owu ateneniyi neyi chayisonekawu haYowanu 10:16 hiyantu akweti kukoleka kwakushakama hamaseki haya nyaka. Mu 1931, ana ashimunawu haEzekeli 9:1-11 nawu anakuyifunda nyifunda hamahamawu niwena ayimweni kwikala antu akweti chikuhwelelu chakushakama hamaseki. Kushika mu 1935, chelukeweli nawu izaza  deneni dinekali kukabadi kanyikoku yacheñi yashimwiniyi Yesu. Makonu, kuvula kwanidi izaza dakeñewa kunashiki muyihita.

3. Muloñadi nhoshelu ‘yakwimana kumesu etanda’ chiyinabulili kutalisha kwizaza dakwiwulu?

³ HaChimwekeshu 7:9, izaza deneni hidinakumwekana kwikala mwiwuluku. Hichinayi mukwila nawu chiña ekala mwiwulu mwaka dinu “[emani] kumesu etanda” daNzambuku. Adi kumesu aNzambi hohu. (Masamu 11:4) Chikuma chakwila nawu izaza deneni, “dakadi kutwesha kudichinda kudi muntu” hiizaza dakwiwuluku anachimwekeshi kuhitila mukwesekeja kuvula kwakadi kwiluka nachinasonekiwu haChimwekeshu 7:4-8 niChimwekeshu 14:1-4. Haniyi nsona, kuvula kwawantu anasendiwu mwiwulu kufuma hamaseki anayishimuni nawu adi 144,000.

4. (a) Indi ‘ihuñu deneni’ dikapulukawu ezaza deneni hichumanyi? (b) Neyi chinasonekiwu haChimwekeshu 7:11, 12, anyi ayitalaña ezaza deneni nikudibomba nawu hamu mukudifukula?

⁴ Chimwekeshu 7:14 hahosha hadi ezaza deneni nawu: “Wenawa anafumi kuyihuñu oyu yeneni.” Anapuluki kuyihuñu yamaneni chikupu yabula kumonahu dehi mukuhanda kwawantu. (Matewu 24:21) Hampinji yakahanawu kuhameka kwawamwinu wawu kudi Nzambi nikudi Kristu, yileñaleña yejima yashinshika yamwiwulu yikadibomba nawu nakuhosha nawu: “Amena; ninkisu, nikulema, nimaana, nikusakilila, nimpuhu, niñovu, niwudumi, yiikali yaNzambi yetu haya nyaka nanyaka. Amena.”—Chimwekeshu 7:11, 12.

Izaza Deneni Datela Kudimwekesha Ashikila Kupuluka

5. Tukwiluka ñahi chuma chinakukeñeka hakwila nawu twikali kukabadi kezaza deneni?

⁵ Kupuluka kwezaza deneni kwihuñu deneni kwendelaña  hamu nanshimbi jaYehova jaloña. Yililu yakwilukilaku ana ejima akahandishawu ayishimuna chiwahi muBayibolu. Dikwila nawu, chapela kudi antu akeña kuloña kuzatilahu chakatataka nayitoñojoka yakudimwekesha ashikilamu kupuluka. Indi antu wenawa atela kwiladi?

6. Muloñadi izaza deneni chidatela kudesekeja chikupu nawanyikoku?

⁶ Anyikoku ekala awunda nawa atiyililaña. Dichi Yesu hakuhosha nindi wadiña nanyikoku yikwawu yabulili kwikala mukanka wakwiwulu, hahosheleña hadi antu akakeña kushakama hamaseki haya nyaka hohuku, ilaña akwovwahilaña cheñi kuntañishilu yindi. Nindi: “Anyikoku ami atiyaña izu dami, ami nayiluka, niwena anlondaña.” (Yowanu 10:16, 27) Awa hiyantu atiyililaña chikupu nikwovwahila nakukoña mwejima mwakuhoshayi Yesu, nakwikala atumbanji twindi.

7. Yililwinyi yatela kwikala nawatumbanji twaYesu?

⁷ Yililwinyi yikwawu yatela kwikala nakambanji waYesu wudi wejima? Izu daNzambi dakulaña nawu: “Vuulenu muntu wenu wamukulu wachisemwa chachikulu, . . . [naku]vwala muntu wamwiha aleñeluwu mwekalilayi Nzambi mukuloña nakujila kwansañu yalala.” (Aefwesesa 4:22-24) Ekalaña nayililu yakoleshaña kunuñañana kwawambuña aNzambi yidi neyi—“kukeña, muzañalu, kuwunda, kukaba kabe-e, luwi, kuwaha, kushinshika, kwovwaha, [ni]kudihemba.”—Aŋalija 5:22, 23.

8. Chumanyi chakamonawu ezaza deneni hampinji yinakukwashawu ashalahu?

⁸ Izaza deneni dakwashaña izaza danyanya danana akweti chikuhwelelu chakwiwulu, alombolaña mudimu wakushimwina. (Matewu 24:14; 25:40) Anyikoku acheñi anakuhana iwu wukwashu hela chakwila aneluki nawu akamona yihuñu, muloña hakutachika kwananu mafuku akukuminina,  Kristu niañelu jindi amuumbili Satana niandemoni jindi kufuma mwiwulu. Chumichi chaleta ‘yihuñu yinakumona iseki . . . Muloña Diyabolu nayisulukili, wudi nandombu yayeni, chanelukiyi nindi kunashali dehi mpinji yindi yantesha hohu.’ (Chimwekeshu 12:7-12) Dimuloña wunakuvulishilayi Satana makabisha hadi ambuña aNzambi chineli kukuma kwampata yamakonu kudi kwakwihi.

9. Indi ambuña aNzambi anakutwesha ñahi kushimwina nsañu yayiwahi, nawa muloñadi?

⁹ Hela chakwila kudi makabisha asweja, mudimu  wakushimwina wunakuyilaku hambidi. Kutachika tuhu namakombakaji antesha awakwakushimwina Wanta hakumana kwaNjita yaKaayi ya I, chayinu mpinji anashiki muyihita, muloña Yehova washiikili nindi: “Hikwakekala chitwa, chakachilawu nawu akukatishi nachu, chakakolaku.” (Isaya 54:17) Hela chilolu wamuchota cheneni chanyiloña chawaYudeya welukili nindi mudimu waNzambi hiwatela kujiyaku. Wayilejeli aFwarisi amunkulakaji yakusambila kutalisha hadi atumbanji nindi: ‘Yilekenu kwawu. Muloña neyi mpuñiyi hela mudimu iwu wawantu, akawifomona. Ilaña neyi himudimu waNzambi, himwakatwesha kuyifwomonaku, mwakenda kela mudi nakulwisha naNzambi yomweni.’—Yililu 5:38, 39.

10. (a) Indi “mufunda” wanana amwizaza deneni walumbulukadi? (b) Indi ambuña aNzambi ovwahilaña ñahi ‘izu dakwiwulu’?

¹⁰ Ejima amwizaza deneni anayilumbululi nawu anakuyifunda mufunda wakuhanda. (Ezekeli 9:4-6) “Mufunda” hichinjikijilu chinakumwekesha nawu anadihani kudi Yehova, anapapatishewi nakwikala atumbanji twaYesu, nawa anakufwila chikupu kwikala nayililu yaKristu. Ovwahilaña ‘izu dakwiwulu’ dahoshaña kutalisha kuwanta waSatana wansakililu yakutwamba nawu: “Fumenu muñandoyu, mubuli kutiyañana nanyiloña yindi, mubuli kutambula nindi yipupu.”—Chimwekeshu 18:1-5.

11. Munjilanyi yalema muyamwekeshelañawu amwizaza deneni nawu hiyambuña aYehova?

¹¹ Cheñi, Yesu wayilejeli atumbanji twindi nindi: “Neyi mukukeñañana, dihu hakayilukilawu antu ejima nawu mudi atumbanji twami.” (Yowanu 13:35) Kwambukaku, antu ansakililu yakaayi kanu ajahaña akwawu munjita, kakavulu hamuloña wakwila nawu akundama kunyuza yacheñi! Izu daNzambi dahoshaña nawu: “Kweniku diku  kwamwekenaña anyana kaNzambi nianyana ka[Diyabolu]; muntu wabulaña kwila yaloña, hela wabulaña kukeña mana kwindi, hiwakudi Nzambuku. . . . Tukeñañani. Tubuli kwikala neyi Kena wadiña wanowu watama, wajahili mana kwindi.”—1 Yowanu 3:10-12.

12. Hehuñu deneni, indi Yehova wakayila ñahi ‘nyitondu’ yansakililu yasoñaña nyikabu yatama?

¹² Yesu washimwini nindi: “Nyitondu yayiwahi yejima yasoñaña nyikabu yayiwahi, ilaña mutondu watama wasoñaña nyikabu yatama. Mutondu wawuwahi hiwukutwesha kusoña nyikabu yatamaku, nimutondu watama hiwukutwesha kusoña nyikabu yayiwahuku. Nyitondu yejima yabulaña kusoña nyikabu yayiwahi ayitemaña, ayinatilaña mukesi. Dichi dinu mukuyilukila kunyikabu yawu.” (Matewu 7:17-20) Nyikabu yasoñaña nsakililu yakanu kaayi yayilukishaña nawu ‘hinyitondu’ yatama, Yehova keña yoyikisañani hehuñu deneni.—Chimwekeshu 17:16.

13. Indi izaza deneni damwekeshaña ñahi nawu ekala adinuña “[hakwimana] kumesu etanda” daYehova?

¹³ HaChimwekeshu 7:9-15 hahoshaña hayuma yinakundami kukupulwisha kwezaza deneni. Anayishimuni nawu “[anemani] kumesu etanda” daYehova hamu, nakunyamuna wanta windi wakuleña kwejima. “Anakosi dehi mahinawu, anayitookeshi namashi aKana kamukoku to-o,” anakumwekesha nawu aneluki mulambu waYesu wakubuta nshidi. (Yowanu 1:29) Anadihani aweni kudi Nzambi nawa anamwekeshi chumichi kuhitila mukuyijimika mumenji. Adiluñishaña nañimenu yayiwahi kumesu aNzambi, yinafwikijiwu namahina atooka, nakumukalakela ‘mudimu wajila mwana niwufuku.’ Komana kudihu jinjila jikwawu jiwatela kuzatishilamu wumi weyi kwendela hamu nayuma yinashimunewi hanu tahindi?

 Nkisu yaKatataka

14. Yumanyi yayiwahi yambukaku yenzaña hadi ambuña Yehova hela chakatataka?

¹⁴ Nineyi nawa wamonahu dehi yuma yasweja kuwaha yinakumonawu owu anakumukalakela Yehova chakatataka. Chakutalilahu, hampinji yiwadizili hankeñelu yaYehova yayiwahi, wadizili neyi kudi kuchiñeja kwakuwahi kumpinji yakumbidi. Chayinu mpinji wudi nankeñelu yayeni muwumi—yakumukalakela Nzambi walala namuzañalu wachikuhwelelu chawumi wahaya nyaka muparadisa hamaseki. Eña, Mwanta Yesu Kristu ‘wakayilombolaña [ezaza deneni] kutuseloki twamenji awumi.’—Chimwekeshu 7:17.

15. Indi aYinsahu jaYehova ahetelañamu ñahi kuhitila mukuhemba nshimbi yaBayibolu kutalisha kunsañu jamatuña ninsañu jayililu?

¹⁵ Nkisu yayiwahi yadiluñishañawu ezaza deneni hikukeña, kunuñañana, nikutiyashana kwekala mukachi kawambuña aYehova iseki dejima. Hamuloña wakwila wonsu wetu twadyaña yakudya yoyimu yakuspiritu, wonsu wetu twovwahilaña nshimbi niyishina yoyimu yekala Mwizu daNzambi. Dimuloña waweni nsañu jamatuña hela nsañu janyuza chijabulilaña kutwambula. Cheñi, twahembaña nshimbi jajiwahi nankashi jakeñañayi Nzambi kudi antu jindi. (1 Akorinda 6:9-11) Chatela kwila adiñijeña mumadombu, nikubula kutiyashana niwuvumbi wunatandi mukaayi, antu jaYehova adiluñisha chuma chatenañawu nawu paradisa yakuspiritu. Talaku chinashimuniwu nsañwiyi haIsaya 65:13, 14.

16. Hela chakwila kukala kunavuli muwumi, kuchiñejanyi kukwetuwu ezaza deneni?

¹⁶ Inehi, ambuña Yehova awantu hiyaloñaku. Niwena amonaña makabi anavuli muwumi mukanu kaayi, chidi neyi kumona lukadi hela kufwa chakadi yiteela mujinjita  jawakamatuña. Atalañanaña cheñi nayikatu, kuyanda, nikufwa. Ilaña adi nachikuhwelelu chakwila nawu mwituña dadiha, Nzambi “wakayikombola madilu ejima kumesu awu; hikwakekala nawa cheñi kufwaku; hikwakekala nawa cheñi hela kuneña hela kudila hela kukataku.”—Chimwekeshu 21:4.

17. Hichikweti muloña nayuma yatela kutumwekena makonuku, nkiswinyi yidi kumbidi yinahembeluwu ana adifukulaña kudi Nzambi walala?

¹⁷ Hela chakwila wukufwa hayinu mpinji hamuloña wakushinakaja, kukata, maposu, hela makabisha, Yehova wakakusañwila kuwumi muParadisa. (Yililu 24:15) Kufumahu, wukatwalekahu kudiluñisha nachawija chakuspiritu hampinji yaKuyula kwaKristu Kwekombakaji danyaka. Wukasweja kumukeña Nzambi hakumona kushikijewa kwankeñelu yindi yalema. Nawa ninkisu yakumujimba yamba kahanayi Yehova yakakuletesheyi kusweja kumukeña nankashi. (Isaya 25:6-9) Yenoyu nkisu kuwaha yinahembeluwu antu jaNzambi!

Kuhitulukamu kwaKuhanjeka

• Bayibolu yesekejaña izaza deneni nachumanyi chasweja kubadika?

• Neyi tunakukeña chikupu netu twikali hakachi kezaza deneni dinakudiluñisha luwi lwaNzambi, chumanyi chitwatela kwila katataka?

• Nkisu yinakudiluñishawu ezaza deneni makonu nawa yakadiluñishawu mwituña dadiha daNzambi yalema ñahi kudeyi?

[Malwihu aKuzatisha haKudiza]

[Mwevulu wudi hefu 123]

Yihita yezaza deneni anuñañana mukudifukula kudi Nzambi walala